കൊടകര: കൊച്ചിയില്‍ നിന്നും തമിഴ്‌നാട്ടിലേക്ക് പെട്രോളിയം ഉല്‍പ്പനങ്ങള്‍ കൊണ്ടുപോകാന്‍ പൈപ്പ് ലൈന്‍ സ്ഥാപിക്കനായി ഭൂമി വിട്ട്‌നല്‍കിയവരുടെ കൂട്ടായ്മ രംഗത്ത്. ഇതേ ഭൂമിയിലൂടെ ഗ്യാസ് പൈപ്പ് ലൈന്‍ നിര്‍മിക്കാനുള്ള നീക്കത്തിനെതിരെയാണ് ഭൂവുടമകളുടെ പ്രതിഷേധം.
2000ല്‍ പെട്രോളിയം പൈപ്പ് ലൈന്‍ നിര്‍മിച്ചപ്പോള്‍ തുച്ഛമായ തുക നല്‍കി കമ്പനി തങ്ങളെ വഞ്ചിക്കുകയായിരുന്നെന്ന് ഇവര്‍ ആരോപിച്ചു. 18 മീറ്റര്‍ വീതിയിലാണ് കമ്പനി സ്ഥലം ഏറ്റെടുത്തത്. ഇപ്പോള്‍ ഇതേ ഭൂമിയിലൂടെ വീണ്ടും പൈപ്പ്‌ലൈന്‍ സ്ഥാപിക്കുമെന്ന് അറിയിപ്പ് ലഭിച്ചു. എന്നാല്‍ വിട്ട്‌കൊടുത്ത ഭൂമിയോ, സമീപ ഭൂമികളോ യാതൊരു തരത്തിലും ഉപയോഗിക്കാനാകാത്ത സ്ഥിതിയാണെന്ന് ഇവര്‍ പറയുന്നു.
ഭൂമിയില്‍ നിര്‍മാണ പ്രവര്‍ത്തനങ്ങളോ കൃഷിയോ ചെയ്യാന്‍ കഴിയാത്ത സ്ഥിതിയാണ്. ശേഷിച്ച ഭൂമിയ്ക്ക് ലക്ഷങ്ങള്‍ മാര്‍ക്കറ്റ് വിലയുണ്ടെങ്കിലും അപകടഭീഷണി ചൂണ്ടിക്കാട്ടി ആരും വാങ്ങാന്‍ തയാറാകുന്നില്ല. ഇവിടെ വീട് വെച്ച് താമസിക്കാനും കഴിയാത്ത സ്ഥിതിയാണെന്നും ഇവര്‍ പറഞ്ഞു. പുതിയ പൈപ്പ് ലൈന്‍ സ്ഥാപിക്കും മുമ്പ് തങ്ങളുടെ ഭൂമിക്ക് ന്യായമായ നഷ്ടപരിഹാരം നല്‍കണമെന്നും സമീപവാസികളായ കുടുംബങ്ങള്‍ക്ക് സുരക്ഷിതത്വം ഉറപ്പാക്കണമെന്നും ഇവര്‍ ആവശ്യപ്പെട്ടു.
ഇതിനായി ജനകീയ സമിതിയുടെ നേതൃത്വത്തില്‍ പരാതി നല്‍കിയതായും ഭാരവാഹികളായ ഒ.എസ് അനില്‍കുമാര്‍, തോമസ് പാട്ടത്തില്‍, ജോസ് പുല്ലന്‍, ഒ.എന്‍ ശശിധരന്‍ എന്നിവര്‍ വാര്‍ത്താ സമ്മേളനത്തില്‍ പറഞ്ഞു.