മാള: രൂക്ഷമായ ഗതാഗത കുരുക്ക് മൂലമുള്ള  യാത്ര ദുരിതത്തിന് പരിഹാരം കാണുന്നതിന് വേണ്ടി ആരംഭിച്ച മാള ടൗണ്‍ വികസന പ്രവര്‍ത്തനങ്ങള്‍ ഇഴയുന്നു. മാസങ്ങള്‍ക്ക് ശേഷവും ടൗണ്‍ വികസനം എങ്ങുമെത്താത്ത അവസ്ഥയാണുള്ളത്. പദ്ധതി എന്ന് പൂര്‍ത്തീകരക്കാനാകും എന്ന കാര്യത്തില്‍ ആര്‍ക്കും ഒരു വ്യക്തതയില്ലെന്ന് മാത്രമല്ല നിര്‍മാണം പൂര്‍ത്തീകരിക്കാനുള്ള നീക്കം ആരുടെ ഭാഗത്ത് നിന്നും ഉണ്ടാകുന്നുമില്ല.
ആറ് മാസം മുന്‍പാണ് മൂന്നരകോടി രൂപ ടൗണിലെ പഴയ കെട്ടിടങ്ങള്‍ പൊളിക്കുന്നതിനും സ്ഥലമേറ്റെടുക്കുന്നതിനുമായി സര്‍ക്കാര്‍ വിതരണം ചെയ്തത്.
കഴിഞ്ഞ നിയമസഭാ തെരഞ്ഞെടുപ്പിന് മുന്‍പ് ടി.എന്‍ പ്രതാപന്‍ എം.എല്‍.എ ആയിരിക്കുമ്പോള്‍ തന്നെ  നഷ്ടപരിഹാരം  വിതരണം ചെയ്തിരുന്നു. നഷ്ടപരിഹാര തുക സ്വീകരിച്ച കെട്ടിട ഉടമകള്‍ എല്ലാവരും സമയബന്ധിതമായി കെട്ടിടങ്ങള്‍ പൊളിച്ച് മാറ്റിയിട്ടില്ല. ചിലര്‍ പൂര്‍ണമായും, ചിലര്‍ ഭാഗീകമായും പൊളിച്ചപ്പോള്‍ ചിലര്‍ പൊളിച്ചിട്ടുമില്ല. കെട്ടിടങ്ങള്‍ പൊളിച്ചിടത്ത് പുതുതായി നിര്‍മിച്ചവ തര്‍ക്കത്തിലായിരിക്കുകയുമാണ്.
കെട്ടിട നിര്‍മാണചട്ടങ്ങള്‍ പാലിക്കാതെയായിരുന്നു കെട്ടിടങ്ങള്‍ പലതും നിര്‍മാണം തുടങ്ങിയത്. നിര്‍മാണം തുടങ്ങിയ സമയത്ത് ഇടപെടാതിരുന്ന ഗ്രാമപഞ്ചായത്ത് അധികൃതര്‍ അന്തിമഘട്ടത്തില്‍ എത്തിയപ്പോള്‍ മാത്രമാണ് ഇടപെട്ടത്. നിയമ വിരുദ്ധമായി നിര്‍മിച്ചവ പൊളിച്ച് നീക്കണമെന്ന് നോട്ടീസ് നല്‍കിയതില്‍ അവസാനിച്ചിരിക്കുകയാണ് നടപടികള്‍. റോഡില്‍ നിന്ന് പല അകലത്തിലാണ് പലരും കെട്ടിടങ്ങള്‍  നിര്‍മിച്ചിരിക്കുന്നത്. കെട്ടിടങ്ങള്‍ സമയ ബന്ധിതമായി പൊളിപ്പിക്കുന്നതിനോ ടൗണ്‍ വികസനം വേഗത്തില്‍ പൂര്‍ത്തീകരിക്കുന്നതിനോ, അധികൃതരുടെ ഭാഗത്ത് നിന്ന് നടപടികളൊന്നും ഉണ്ടാകാത്തത് നാട്ടുകാരുടെ പ്രതിഷേധത്തിന് കാരണമായിട്ടുണ്ട്.
കഴിഞ്ഞ  മാസം വി.ആര്‍ സുനില്‍കുമാര്‍ എം.എല്‍.എ നിര്‍മാണം വേഗത്തില്‍ നടത്താന്‍ അധികൃതര്‍ക്ക് നിര്‍ദേശം നല്‍കിയെങ്കിലും ഇത് വരെ ഒരു പുരോഗതിയും ഉണ്ടായിട്ടില്ല.
ടൗണ്‍ വികസനത്തിനായി ഒരു കോടി രൂപ പുതിയ ബജറ്റില്‍ വയിരുത്തിയിട്ടുണ്ടെങ്കിലും നിര്‍മാണം ഒച്ചിഴയുന്ന വേഗത്തില്‍ നീങ്ങുന്നതിനാല്‍ പദ്ധതി പൂര്‍ത്തീകരണം ഏറെ വൈകാനുള്ള സാധ്യതയാണ് കാണുന്നത്. കെ കരുണാകരന്‍ മുഖ്യമന്ത്രിയായിരിക്കെ മാള ടൗണ്‍ വികസന ശ്രമങ്ങള്‍ നടന്നെങ്കിലും തര്‍ക്കങ്ങള്‍ കാരണം യാഥാര്‍ഥ്യമായില്ല.