ന്യൂഡൽഹി: പശ്ചിമേഷ്യൻ രാജ്യങ്ങളിലെ നിലവിലെ പ്രത്യേക സാഹചര്യം കണക്കിലെടുത്ത്, പന്ത്രണ്ടാം ക്ലാസ് വിദ്യാർഥികൾക്കായി പുതിയ ബദൽ മൂല്യനിർണ്ണയ പദ്ധതിയുമായി സെൻട്രൽ ബോർഡ് ഓഫ് സെക്കൻഡറി എജ്യുക്കേഷൻ (സിബിഎസ്ഇ). യുഎഇ, സഊദി അറേബ്യ, കുവൈത്ത്, ഖത്തർ, ഒമാൻ, ബഹ്‌റൈൻ, ഇറാൻ എന്നീ രാജ്യങ്ങളിലെ വിദ്യാർഥികൾക്കാണ് ഈ ആനുകൂല്യം ലഭിക്കുക. ഇതുസംബന്ധിച്ച ഔദ്യോഗിക സർക്കുലർ സിബിഎസ്ഇ പുറത്തിറക്കി.

മേഖലയിലെ അപ്രതീക്ഷിത സാഹചര്യങ്ങൾ കാരണം പരീക്ഷാ ഷെഡ്യൂളിലുണ്ടായ തടസ്സങ്ങളും ചില പരീക്ഷകൾ റദ്ദാക്കേണ്ടി വന്നതും കണക്കിലെടുത്താണ് ബോർഡിന്റെ ഈ നിർണ്ണായക നീക്കം.

മൂല്യനിർണ്ണയം എങ്ങനെ?

പുതുക്കിയ പദ്ധതി അനുസരിച്ച്, പരീക്ഷ എഴുതാൻ സാധിക്കാത്ത വിദ്യാർഥികളുടെ ഫലം ആന്തരിക മൂല്യനിർണ്ണയത്തിലൂടെ (Internal Assessment) തയ്യാറാക്കും. പരീക്ഷ പൂർത്തിയാക്കി വിഷയങ്ങളിൽ വിദ്യാർഥികൾ നേടിയ യഥാർത്ഥ മാർക്കിന്റെ അടിസ്ഥാനത്തിലായിരിക്കും ഫലം.

പരീക്ഷ എഴുതാൻ കഴിയാത്തവർക്ക് പ്രായോഗിക പരീക്ഷകൾ (Practical), പ്രോജക്ട് വർക്കുകൾ, ഇന്റേണൽ അസസ്‌മെന്റ്, ലഭ്യമായ തിയറി മാർക്കുകൾ എന്നിവ സംയോജിപ്പിച്ചാണ് അന്തിമ ഗ്രേഡ് നിശ്ചയിക്കുന്നത്.

തിയറി മാർക്കുകൾ, പ്രീ-ബോർഡ് പരീക്ഷകൾ, ക്ലാസ് ടെസ്റ്റുകൾ, മറ്റ് അക്കാദമിക് റെക്കോർഡുകൾ എന്നിവ മൂല്യനിർണ്ണയത്തിനായി പരിഗണിക്കും.

മാർക്ക് കണക്കാക്കുന്ന രീതി

ഗണിതം, ഇംഗ്ലീഷ്, ചരിത്രം, ജീവശാസ്ത്രം തുടങ്ങിയ 70 അല്ലെങ്കിൽ 80 മാർക്കിന്റെ തിയറി പരീക്ഷകൾക്ക് പ്രത്യേക മാനദണ്ഡം ഏർപ്പെടുത്തിയിട്ടുണ്ട്. സ്കൂളുകൾ വിദ്യാർത്ഥികളുടെ പാദവാർഷിക പരീക്ഷ, അർദ്ധവാർഷിക പരീക്ഷ (Half-yearly Exam), പ്രീ-ബോർഡ് പരീക്ഷ (Pre-board Exam) എന്നീ മൂന്ന് പരീക്ഷകളുടെ സ്കോറുകൾ സമർപ്പിക്കണം. ഇവയിൽ ഏറ്റവും ഉയർന്ന മാർക്ക് ലഭിച്ച പരീക്ഷയിലെ സ്കോർ ആയിരിക്കും അന്തിമ ഫലത്തിനായി കണക്കിലെടുക്കുക.

വിദ്യാർഥികൾക്ക് അർഹമായ നീതി ഉറപ്പാക്കാനും അവരുടെ ഉപരിപഠനത്തിന് തടസ്സമില്ലാത്ത രീതിയിൽ അക്കാദമിക് തുടർച്ച നിലനിർത്താനുമാണ് ഈ പദ്ധതിയെന്ന് സിബിഎസ്ഇ വ്യക്തമാക്കി. പദ്ധതിയുടെ വിശദവിവരങ്ങൾ എല്ലാ സ്കൂളുകൾക്കും ബന്ധപ്പെട്ടവർക്കും കൈമാറിയിട്ടുണ്ട്.

The Central Board of Secondary Education (CBSE) has announced a special assessment scheme for Class 12 students in West Asian countries, including the UAE, Saudi Arabia, Kuwait, Qatar, Oman, Bahrain, and Iran. This move follows disruptions in the exam schedule due to regional circumstances.