അബുദബി: മേഖലയിലെ വർദ്ധിച്ചുവരുന്ന സംഘർഷങ്ങൾക്കിടയിൽ യുഎഇ അതീവ വിവേകത്തോടെയും സംയമനത്തോടെയുമാണ് സാഹചര്യങ്ങളെ നേരിടുന്നതെന്ന് യുഎഇ പ്രസിഡന്റ് ശൈഖ് മുഹമ്മദ് ബിൻ സായിദ് അൽ നഹ്യാൻ. യുഎഇ സന്ദർശനത്തിനെത്തിയ ഉക്രേനിയൻ പ്രസിഡന്റ് വൊളോഡമിർ സെലെൻസ്‌കിയുമായി നടത്തിയ കൂടിക്കാഴ്ചയിലാണ് അദ്ദേഹം ഇക്കാര്യം വ്യക്തമാക്കിയത്. സഊദി സന്ദർശനത്തിന് ശേഷമാണ് സെലെൻസ്‌കി യുഎഇയിലെത്തിയത്.

സാധാരണക്കാരെയും രാജ്യത്തെ നിർണ്ണായക അടിസ്ഥാന സൗകര്യങ്ങളെയും ലക്ഷ്യം വെച്ചുള്ള ഭീകരാക്രമണങ്ങളെ നേരിടുന്നതിൽ യുഎഇ വിട്ടുവീഴ്ച ചെയ്യില്ലെന്ന് ശൈഖ് മുഹമ്മദ് അടിവരയിട്ടു. രാജ്യത്തിന്റെ പരമാധികാരം സംരക്ഷിക്കാൻ ദൃഢനിശ്ചയത്തോടെയുള്ള നടപടികൾ തുടരും. ഏത് തരത്തിലുള്ള ഭീഷണികളെയും നേരിടാൻ യുഎഇ സായുധസേന പൂർണ്ണ സജ്ജമാണെന്നും അദ്ദേഹം കൂട്ടിച്ചേർത്തു.

ALSO READ: ഇറാൻ ആക്രമണങ്ങളുമായി ബന്ധപ്പെട്ട യുഎഇയുടെ നിലപാട് മാധ്യമങ്ങൾ തെറ്റായി വ്യാഖ്യാനിച്ചു: അൻവർ ഗർഗാഷ്

സ്വയം പ്രതിരോധത്തിനുള്ള അവകാശം

അന്താരാഷ്ട്ര നിയമങ്ങൾക്കനുസൃതമായി രാജ്യത്തെ സംരക്ഷിക്കാനും സ്വയം പ്രതിരോധിക്കാനുമുള്ള പൂർണ്ണ അവകാശം യുഎഇക്കുണ്ട്. മേഖലയിൽ കൂടുതൽ സംഘർഷങ്ങളും പ്രതിസന്ധികളും ഉണ്ടാകാതിരിക്കാനാണ് രാജ്യം മുൻഗണന നൽകുന്നത്. സമാധാനപരമായ അന്തരീക്ഷം പുനഃസ്ഥാപിക്കാനുള്ള നയതന്ത്ര നീക്കങ്ങൾക്ക് യുഎഇ എന്നും പിന്തുണ നൽകുമെന്നും പ്രസിഡന്റ് സെലെൻസ്‌കിയെ അറിയിച്ചു.

കൂടുതൽ തന്ത്രപ്രധാനമായ വിഷയങ്ങളും ഉക്രൈൻ-റഷ്യ സംഘർഷം ലഘൂകരിക്കാനുള്ള നയതന്ത്ര ഇടപെടലുകളും കൂടിക്കാഴ്ചയിൽ ചർച്ചയായി. സന്ദർശനത്തിന് ശേഷം സെലെൻസ്‌കി ഖത്തറിലേക്ക് തിരിച്ചു.

the uae is addressing ongoing global challenges with wisdom and restraint, as sheikh mohammed holds a key meeting with ukrainian president volodymyr zelenskyy, highlighting diplomacy, stability, and international cooperation during a time of rising geopolitical tensions and uncertainty worldwide