തിരുവനന്തപുരം: രാഷ്ട്രീയ പാര്‍ട്ടികള്‍ക്ക് നല്‍കിയ കത്തില്‍ ബിജെപി സീല്‍ പതിച്ച സംഭവത്തില്‍ കൂടുതല്‍ നടപടികളിലേക്ക് തെരഞ്ഞെടുപ്പ് കമ്മീഷന്‍. വീഴ്ച്ച കണ്ടെത്തിയതിനെ തുടര്‍ന്ന് ഡെപ്യൂട്ടി സിഇഒ, സെക്ഷന്‍ ഓഫീസര്‍ എന്നിവരെ തെരഞ്ഞെടുപ്പ് ചുമതലകളില്‍ നിന്ന് അടിയന്തരമായി നീക്കം ചെയ്തതായി മുഖ്യ തെരഞ്ഞെടുപ്പ് ഓഫീസര്‍ രത്തന്‍ ഖേല്‍ക്കര്‍ അറിയിച്ചു. അഡീഷണല്‍ സിഇഒ പി.ബി നൂഹ് സമര്‍പ്പിച്ച അന്വേഷണ റിപ്പോര്‍ട്ടിന്റെ അടിസ്ഥാനത്തിലാണ് നടപടി. 

സ്ഥാനാര്‍ഥികളുടെ ക്രിമിനല്‍ പശ്ചാത്തലം പ്രസിദ്ധീകരിക്കുന്നത് സംബന്ധിച്ച മാര്‍ഗനിര്‍ദേശങ്ങള്‍ അടങ്ങിയ ഔദ്യോഗിക കത്തിലാണ് ബിജെപി സീല്‍ പ്രത്യക്ഷപ്പെട്ടത്. ഇതിനെതിരെ രാഷ്ട്രീയ പാര്‍ട്ടികള്‍ രംഗത്ത് വരികയും, വലിയ വിവാദമാവുകയും ചെയ്തു. സംഭവത്തില്‍ അസിസ്റ്റന്റ് സെക്ഷന്‍ ഓഫീസറെ നേരത്തെ സസ്‌പെന്‍ഡ് ചെയ്തിരുന്നു. തുടര്‍ന്നാണ് കൂടുതല്‍ നടപടികളിലേക്ക് കമ്മീഷന്‍ കടക്കുന്നത്. 

ALSO READ: തമിഴ്‌നാട് തെരഞ്ഞെടുപ്പ്: ഡിഎംകെ സ്ഥാനാർഥികളെ പ്രഖ്യാപിച്ചു; മുൻ മുഖ്യമന്ത്രി ഒ. പനീർസെൽവം മത്സരിക്കും

ബിജെപി മുന്‍പ് കമ്മീഷന് നല്‍കിയ ഒരു കത്തിന്റെ ഫോട്ടോകോപ്പി സൂക്ഷമപരിശോധനയില്ലാതെ മറ്റ് പാര്‍ട്ടികള്‍ക്ക് അയച്ച് കൊടുത്തതാണ് പിഴവിന് കാരണമെന്നാണ് തെരഞ്ഞെടുപ്പ് കമ്മീഷന്‍ നല്‍കിയ വിശദീകരണം. ഉദ്യോഗസ്ഥരുടെ ഭാഗത്തുനിന്നുണ്ടായ ജാഗ്രതക്കുറവും, ക്ലറിക്കല്‍ പിഴവുമാണ് ഇതിന് കാരണമെന്നാണ് അന്വേഷണ റിപ്പോര്‍ട്ടില്‍ ചൂണ്ടിക്കാട്ടുന്നത്. തെരഞ്ഞെടുപ്പ് കമ്മീഷന്റെ വിശ്വാസ്യതയെ ചോദ്യം ചെയ്യുന്ന നപടിയായി കത്ത് വിവാദം മാറിയിട്ടുണ്ട്.