ബാംഗ്ലൂർ: ഐപിഎൽ പുതിയ സീസൺ  വിജയത്തോടെ തുടങ്ങി നിലവിലെ ചാമ്പ്യന്മാരായ റോയൽ ചലഞ്ചേഴ്‌സ് ബെംഗളൂരു. സ്വന്തം തട്ടകമായ ചിന്നസ്വാമി സ്റ്റേഡിയത്തിൽ നടന്ന മത്സരത്തിൽ സൺറൈസേഴ്‌സ് ഹൈദരാബാദിനെ ആറ് വിക്കറ്റുകൾക്ക് തകർത്താണ് രജത് പടിതാറും സംഘവും തേരോട്ടം തുടങ്ങിയത്. മത്സരത്തിൽ ആദ്യം ബാറ്റ് ചെയ്ത ഹൈദരാബാദ് നിശ്ചിത ഓവറിൽ ഒമ്പത് വിക്കറ്റ് നഷ്ടത്തിൽ 201 റൺസാണ് നേടിയത്. മറുപടി ബാറ്റിങ്ങിനിറങ്ങിയ ആർസിബി നാല് വിക്കറ്റുകളും 26 പന്തുകളും ബാക്കി നിൽക്കെ ലക്ഷ്യം മറികടന്നു. 

ദേവദത്ത് പടിക്കലിന്റെയും വിരാട് കോഹ്‌ലിയുടെയും അർദ്ധ സെഞ്ച്വറിയുടെ കരുത്തിലാണ് ആർസിബി ജയിച്ചു കയറിയത്. 38 പന്തിൽ പുറത്താവാതെ 69 റൺസാണ് കോഹ്‌ലി നേടിയത്. അഞ്ചു വീതം ഫോറുകളും സിക്സുകളും അടങ്ങുന്നതാണ് കോഹ്‌ലിയുടെ ഇന്നിംഗ്സ്. പടിക്കൽ 26 പന്തിൽ ഏഴു ഫോറുകളും നാല് സിക്സുകളും അടക്കം 61 റൺസും നേടി വിജയത്തിൽ നിർണായകമായി. ക്യാപ്റ്റൻ പടിതാർ 12 പന്തിൽ 31 റൺസും നേടി വിജയത്തിലെത്തിച്ചു.  

ക്യാപ്റ്റൻ ഇഷാൻ കിഷന്റെ തകർപ്പൻ പ്രകടനമാണ് ഓറഞ്ച് ആർമിക്ക് മികച്ച ടോട്ടൽ സമ്മാനിച്ചത്. 38 പന്തിൽ 80 റൺസ് നേടിയാണ് ഇഷാൻ തിളങ്ങിയത്. എട്ട് ഫോറുകളും അഞ്ചു സിക്സുകളും അടങ്ങുന്നതാണ് ഹൈദരാബാദ് ക്യാപ്റ്റന്റെ ഇന്നിംഗ്സ്. തുടക്കത്തിൽ മുൻ നിര വിക്കറ്റുകൾ നഷ്ടമായതിന് ശേഷം ചിന്നസ്വാമിയിൽ ഇഷാൻ ഹൈദരാബാദിനെ കരകയറ്റുകയായിരുന്നു. 

അവസാന ഓവറുകളിൽ അനികേത് വർമ്മ തകർത്താടിയപ്പോൾ ഹൈദരാബാദ് സ്കോർ 200 കടന്നു. 18 പന്തിൽ മൂന്ന് ഫോറുകളും നാല് സിക്‌സും അടക്കം 43 റൺസാണ് താരം നേടിയത്. ഹെൻറിച്ച് ക്ലാസൻ 22 പന്തിൽ 31 റൺസും സ്വന്തമാക്കി. 

ആർസിബിയുടെ ബൗളിങ്ങിൽ ജേക്കബ് ഡഫി, റൊമാരിയോ ഷെപ്പേർഡ് എന്നിവർ മൂന്ന് വീതം വിക്കറ്റുകൾ നേടി മികച്ച പ്രകടനം നടത്തി. ഭുവനേശ്വർ കുമാർ, അഭിനന്ദൻ സിംഗ്, സുയാഷ് ശർമ്മ എന്നിവർ ഓരോ വിക്കറ്റ് വീതവും വീഴ്ത്തി.  

ഏപ്രിൽ അഞ്ചിന് ചെന്നൈ സൂപ്പർ കിങ്സിനെതിരെയാണ് ചെന്നൈയുടെ അടുത്ത മത്സരം. അതേസമയം ഏപ്രിൽ രണ്ടിന് നടക്കുന്ന മത്സരത്തിൽ കൊൽക്കത്ത നൈറ്റ് റൈഡേഴ്‌സ് ആണ് ഇഷാൻ കിഷന്റെയും സംഘത്തിന്റെയും എതിരാളികൾ.