അബുദബി: യുഎഇക്ക് നേരെയുള്ള ഇറാന്റെ മിസൈൽ-ഡ്രോൺ ആക്രമണങ്ങൾ തുടരുന്നു. ഇന്ന് മാത്രം 16 ബാലിസ്റ്റിക് മിസൈലുകളും 42 ഡ്രോണുകളും യുഎഇ വ്യോമ പ്രതിരോധ സേന വിജയകരമായി തകർത്തതായി പ്രതിരോധ മന്ത്രാലയം അറിയിച്ചു. അതിനൂതനമായ പ്രതിരോധ സംവിധാനങ്ങൾ ഉപയോഗിച്ചാണ് ശത്രുപക്ഷത്തുനിന്നുള്ള ഭീഷണികളെ ആകാശത്തുവെച്ച് തന്നെ നിർവീര്യമാക്കിയത്.

ഇറാന്റെ ഭാഗത്തുനിന്നുള്ള ആക്രമണ പരമ്പരകൾ ആരംഭിച്ചത് മുതൽ ഇതുവരെ 414 ബാലിസ്റ്റിക് മിസൈലുകളും 15 ക്രൂയിസ് മിസൈലുകളും 1914 ഡ്രോണുകളുമാണ് യുഎഇ പ്രതിരോധസേന തകർത്തത്.

രാജ്യത്തിന്റെ പരമാധികാരം സംരക്ഷിക്കുന്നതിനിടെ യുഎഇ സായുധ സേനയിലെ രണ്ട് അംഗങ്ങൾ വീരമൃത്യു വരിച്ചിരുന്നു. കൂടാതെ, സായുധ സേനയിൽ സേവനമനുഷ്ഠിച്ചിരുന്ന മൊറോക്കൻ പൗരനായ കോൺട്രാക്ടറും കൊല്ലപ്പെട്ടു. സിവിലിയൻ മേഖലകളെ ലക്ഷ്യമിട്ടുള്ള ആക്രമണങ്ങളിൽ ഇന്ത്യ, പാകിസ്ഥാൻ, നേപ്പാൾ, ബംഗ്ലാദേശ്, ഫലസ്തീൻ എന്നിവിടങ്ങളിൽ നിന്നുള്ള 8 പേർക്ക് ജീവൻ നഷ്ടമായിരുന്നു. വിവിധ രാജ്യങ്ങളിൽ നിന്നുള്ള 178 പേർക്ക് പരുക്കേറ്റതായും റിപ്പോർട്ടുകൾ വ്യക്തമാക്കുന്നു.

ALSO READ: യു.എ.ഇയില്‍നിന്ന് ഇന്ത്യയിലേക്കും തിരിച്ചുമുള്ള ഇന്നത്തെ വിമാന സര്‍വിസുകള്‍ ഇങ്ങനെ | UAE-India Flights

തുടർച്ചയായുണ്ടാകുന്ന പ്രകോപനങ്ങളെ നേരിടാൻ യുഎഇ സായുധ സേനയും സിവിൽ ഡിഫൻസും പൂർണ്ണ സജ്ജമാണ്. സിവിലിയൻ കേന്ദ്രങ്ങളെയും തന്ത്രപ്രധാനമായ അടിസ്ഥാന സൗകര്യങ്ങളെയും സംരക്ഷിക്കുന്നതിൽ വിട്ടുവീഴ്ചയില്ലെന്ന് മന്ത്രാലയം ആവർത്തിച്ചു. ജനങ്ങൾ പരിഭ്രാന്തരാകേണ്ടതില്ലെന്നും ഔദ്യോഗിക അറിയിപ്പുകൾ മാത്രം ശ്രദ്ധിക്കണമെന്നും അധികൃതർ നിർദ്ദേശിച്ചു.

the uae successfully thwarted iranian attack attempts by intercepting 16 ballistic missiles and 42 drones, showcasing its advanced defense capabilities. authorities confirmed no major damage, highlighting strong preparedness and commitment to national security amid rising regional tensions.