തിരുവനന്തപുരം: നേമം നിയമസഭാ മണ്ഡലത്തിൽ എസ്ഡിപിഐ പിന്തുണ പ്രഖ്യാപിച്ചതിനോട് പ്രതികരിച്ച് എൽഡിഎഫ് സ്ഥാനാർഥി വി. ശിവൻകുട്ടി. ആര് വോട്ട് നൽകിയാലും അത് സ്വീകരിക്കുമെന്നും ഒരു വിഭാ​ഗത്തിന്റെയും വോട്ട് വേണ്ടെന്ന് വയ്ക്കില്ലെന്നും ശിവൻകുട്ടി വ്യക്തമാക്കി.

ഒരു മതേതര ജനാധിപത്യ മുന്നണിയുടെ സ്ഥാനാർഥിയായാണ് താൻ മത്സരിക്കുന്നത്. അതിനാൽ തന്നെ മണ്ഡലത്തിലെ മുഴുവൻ വോട്ടർമാരുടെയും പിന്തുണ തനിക്ക് ആവശ്യമാണ്. നേരത്തെ, എസ്ഡിപിഐ പിന്തുണ യുഡിഎഫിനാണെന്ന് എൽഡിഎഫ് പറഞ്ഞിട്ടുണ്ടാകാം, എന്നാൽ രാഷ്ട്രീയത്തിൽ സാഹചര്യങ്ങളും വിഷയങ്ങളും മാറിമറഞ്ഞു വരും അദ്ദേഹം കൂട്ടിച്ചേർത്തു.

ALSO READ: "മുഖ്യമന്ത്രിയുടെ സമനില തെറ്റി, സിപിഎം ഇപ്പോൾ കോർപ്പറേറ്റ് പാർട്ടി"; മുഖ്യമന്ത്രിയെയും സിപിഎമ്മിനെയും കടന്നാക്രമിച്ച് കെസി വേണുഗോപാൽ

‌നേരത്തെ എസ്ഡിപിഐ പിന്തുണക്കുന്നത് യുഡിഎഫിനെയാണെന്ന് എൽഡിഎഫ് ആരോപിച്ചിരുന്നു. എന്നാൽ പിന്നീട് എസ്ഡിപിഐ ഇടതുമുന്നണിക്ക് പിന്തുണ പ്രഖ്യാപിച്ചതിനെക്കുറിച്ച് ചോദിച്ചപ്പോഴാണ് രാഷ്ട്രീയത്തിൽ മാറ്റങ്ങൾ സ്വാഭാവികമാണെന്ന് ശിവൻകുട്ടി വ്യക്തമാക്കിയത്. ത്രികോണ മത്സരം നിലനിൽക്കുന്ന നേമത്ത് എസ്ഡിപിഐയുടെ ഈ നിലപാട് മാറ്റം വലിയ ചർച്ചകൾക്കാണ് വഴിയൊരുക്കിയിരിക്കുന്നത്.