ദോഹ: ഖത്തറിനും മേഖലയിലെ മറ്റ് രാജ്യങ്ങൾക്കും നേരെയുള്ള ഇറാന്റെ പ്രകോപനങ്ങൾ അടിയന്തരമായി അവസാനിപ്പിക്കണമെന്ന് ഖത്തർ പ്രധാനമന്ത്രിയും വിദേശകാര്യ മന്ത്രിയുമായ ശൈഖ് മുഹമ്മദ് ബിൻ അബ്ദുൾറഹ്മാൻ ബിൻ ജാസിം അൽ താനി. ശനിയാഴ്ച വിവിധ രാജ്യങ്ങളിലെ വിദേശകാര്യ മന്ത്രിമാരുമായി നടത്തിയ ടെലിഫോൺ സംഭാഷണത്തിനിടെയാണ് അദ്ദേഹം ഖത്തറിന്റെ ശക്തമായ നിലപാട് വ്യക്തമാക്കിയത്.

പാകിസ്ഥാൻ ഉപപ്രധാനമന്ത്രിയും വിദേശകാര്യ മന്ത്രിയുമായ മുഹമ്മദ് ഇഷാഖ് ദാർ, തായ്‌ലൻഡ് വിദേശകാര്യ മന്ത്രി സിഹാസക് ഫുവാങ്‌കെറ്റ്‌കിയോ, അർമേനിയ വിദേശകാര്യ മന്ത്രി അരാരത്ത് മിർസോയൻ എന്നിവരുമായാണ് ഖത്തർ പ്രധാനമന്ത്രി ചർച്ച നടത്തിയത്. മേഖലയിലെ സൈനിക സംഘർഷം വർദ്ധിക്കുന്നതിലെ ആശങ്കയും പ്രാദേശിക-ആഗോള സുരക്ഷയിൽ ഇത് ചെലുത്തുന്ന അപകടകരമായ പ്രത്യാഘാതങ്ങളും നേതാക്കൾ വിലയിരുത്തി.

ALSO READ: സുരക്ഷാ ഉദ്യോഗസ്ഥരുമായി സഹകരിക്കുക; പൊതുജനങ്ങളോട് ആഭ്യന്തര മന്ത്രാലയം

അടിസ്ഥാന സൗകര്യങ്ങൾക്ക് നേരെയുള്ള ആക്രമണം

വെള്ളം, ഭക്ഷണം, ഊർജ്ജം എന്നിവയുമായി ബന്ധപ്പെട്ട നിർണായകമായ അടിസ്ഥാന സൗകര്യങ്ങളെ നിരുത്തരവാദപരമായ രീതിയിൽ ലക്ഷ്യം വയ്ക്കുന്നതിനെതിരെ ഖത്തർ പ്രധാനമന്ത്രി മുന്നറിയിപ്പ് നൽകി. ഇത്തരം നീക്കങ്ങൾ ജനജീവിതത്തെയും മേഖലയുടെ സ്ഥിരതയെയും സാരമായി ബാധിക്കുമെന്ന് അദ്ദേഹം ചൂണ്ടിക്കാട്ടി.

തർക്കങ്ങൾ സമാധാനപരമായ മാർഗങ്ങളിലൂടെ പരിഹരിക്കേണ്ടതിന്റെ ആവശ്യകത അദ്ദേഹം ചൂണ്ടിക്കാട്ടി. ആഗോള ഊർജ്ജ സുരക്ഷ, ​ഗതാ​ഗതം, പരിസ്ഥിതി സുരക്ഷ എന്നിവ ഉറപ്പാക്കുന്നതിനായി എല്ലാ രാജ്യങ്ങളും സംയുക്ത ശ്രമങ്ങൾ വർദ്ധിപ്പിക്കണം. പ്രതിസന്ധി നിയന്ത്രിക്കാൻ ഏകോപനം ശക്തിപ്പെടുത്തണമെന്നും, യുക്തിയുടെയും വിവേകത്തിന്റെയും ഭാഷയ്ക്ക് മുൻഗണന നൽകിക്കൊണ്ട് എല്ലാവരും ചർച്ചയുടെ മേശയിലേക്ക് മടങ്ങണമെന്നും ഖത്തർ ആഹ്വാനം ചെയ്തു.

qatar’s prime minister has urged iran to stop provocations and avoid actions that threaten global security. the statement highlights growing concerns over regional instability, calling for restraint, dialogue, and diplomatic efforts to maintain peace and stability in the middle east.