കോഴിക്കോട്: കുന്നമംഗലത്ത് വിദ്യാര്‍ഥികളെ സ്‌കൂളില്‍ വിട്ട് മടങ്ങിയെത്തി നിര്‍ത്തിയിട്ട സ്‌കൂള്‍ വാന്‍ കത്തിനശിച്ചു. കോണോട്ട് എല്‍.പി സ്‌കൂളിന് വേണ്ടി സര്‍വീസ് നടത്തുന്ന വാനാണ് അപകടത്തില്‍പ്പെട്ടത്. വിദ്യാര്‍ഥികളെ ഇറക്കി മിനിറ്റുകള്‍ക്കുള്ളില്‍ തീപിടിത്തമുണ്ടായതിനാല്‍ വന്‍ ദുരന്തം ഒഴിവായി.

കോണോട്ട് തൂമ്പറ്റച്ചാലില്‍ അബ്ദുറഹിമാന്റെ വീട്ടു മുറ്റത്ത് നിര്‍ത്തിയിട്ട ഉടനെയാണ് വാഹനത്തില്‍ നിന്ന് പുകയുയര്‍ന്നത്. വാഹന ഉടമയായ പ്രദീഷ് കാട്ടില്‍ അബ്ദുറഹിമാന്റെ വീട്ടില്‍ വാടകയ്ക്ക് താമസിച്ചു വരുകയായിരുന്നു. ഉടന്‍ തന്നെ നാട്ടുകാര്‍ ചേര്‍ന്ന് തീ അണയ്ക്കാന്‍ ശ്രമിച്ചെങ്കിലും ഇന്ധന ടാങ്കിലേക്ക് തീ പടര്‍ന്നതോടെ നിയന്ത്രിക്കാനാവാത്ത വിധം ആളിപ്പടരുകയായിരുന്നു.

ALSO READ: ഉത്സവത്തിനിടെയുണ്ടായ തര്‍ക്കം: കൊല്ലത്ത് 19കാരനെ കുത്തിക്കൊലപ്പെടുത്തി; അഞ്ചുപേര്‍ പിടിയില്‍

വാഹനത്തില്‍ നിന്നുള്ള തീ വീടിന്റെ ഒരു ഭാഗത്തേക്കും വ്യാപിച്ചു. വിവരമറിഞ്ഞ് വെള്ളിമാടുകുന്ന് അഗ്‌നിശമന നിലയത്തില്‍ നിന്നും രണ്ട് യൂണിറ്റ് ഫയര്‍ഫോഴ്‌സ് സംഘം സ്ഥലത്തെത്തിയാണ് തീ പൂര്‍ണമായും അണച്ചത്. വാഹനം പൂര്‍ണമായും കത്തിനശിച്ച നിലയിലാണ്. തീപിടിത്തത്തിന്റെ കാരണം വ്യക്തമല്ല.

A school van caught fire and was completely gutted shortly after dropping off students in Kunnamangalam, Kozhikode, with the blaze also partially damaging a nearby house.