ഗുവാഹത്തി: ഐപിഎൽ 2026-ലെ മൂന്നാം മത്സരത്തിൽ ഇന്ന് കരുത്തരായ രാജസ്ഥാൻ റോയൽസും ചെന്നൈ സൂപ്പർ കിംഗ്‌സും നേർക്കുനേർ. ഗുവാഹത്തിയിലെ ബർസപാര ക്രിക്കറ്റ് സ്റ്റേഡിയത്തിൽ തിങ്കളാഴ്ച വൈകുന്നേരമാണ് മത്സരം. മുൻ രാജസ്ഥാൻ നായകൻ സഞ്ജു സാംസൺ ഇക്കുറി സിഎസ്കെ ജേഴ്സിയിൽ കളത്തിലിറങ്ങുന്നു എന്ന പ്രത്യേകതയും ഈ പോരാട്ടത്തിനുണ്ട്.

മാറിയ ടീമുകൾ, പുതിയ നായകന്മാർ

സീസണിന് മുന്നോടിയായുള്ള മിനി ലേലത്തിൽ വലിയ മാറ്റങ്ങളാണ് ഇരു ടീമുകളിലും സംഭവിച്ചത്.

രാജസ്ഥാൻ റോയൽസ്: സഞ്ജു സാംസണ് പകരം രവീന്ദ്ര ജഡേജയെ ടീമിലെത്തിച്ച രാജസ്ഥാൻ, യുവതാരം റിയാൻ പരാഗിനെ പുതിയ നായകനായി പ്രഖ്യാപിച്ചു. ജോഫ്ര ആർച്ചർ, ഷിംറോൺ ഹെറ്റ്മെയർ എന്നിവരുടെ പ്രകടനവും യുവ ഓപ്പണർ വൈഭവ് സൂര്യവംശിയുടെ പ്രകടനവും ആരാധകർ ഉറ്റുനോക്കുന്നു.

ചെന്നൈ സൂപ്പർ കിംഗ്‌സ്: പരിക്കിനെത്തുടർന്ന് എം.എസ് ധോണി ആദ്യ രണ്ടാഴ്ച കളിക്കില്ല എന്നത് സിഎസ്കെയ്ക്ക് തിരിച്ചടിയാണ്.പരിക്കേറ്റ നഥാൻ എല്ലിസിന് പകരം സ്പെൻസർ ജോൺസൺ ടീമിലെത്തിയിട്ടുണ്ട്.

ഹെഡ്-ടു-ഹെഡ് റെക്കോർഡുകൾ

ഐപിഎൽ ചരിത്രത്തിൽ ഇരുടീമുകളും തമ്മിൽ നേരിയ വ്യത്യാസം മാത്രമാണുള്ളത്:

• ആകെ മത്സരങ്ങൾ: 31
• ചെന്നൈ വിജയിച്ചത്: 16
• രാജസ്ഥാൻ വിജയിച്ചത്: 15

കഴിഞ്ഞ സീസണിൽ ഏറ്റുമുട്ടിയ രണ്ട് തവണയും വിജയം രാജസ്ഥാൻ റോയൽസിനൊപ്പമായിരുന്നു.

ഗുവാഹത്തിയിലെ കണക്കുകൾ

ബർസപാര സ്റ്റേഡിയത്തിൽ ഇതുവരെ ഒരു തവണ മാത്രമാണ് ഇരുടീമുകളും ഏറ്റുമുട്ടിയത്. അന്ന് 182 റൺസ് പ്രതിരോധിച്ച രാജസ്ഥാൻ 6 റൺസിന് ചെന്നൈയെ പരാജയപ്പെടുത്തിയിരുന്നു.

അവസാന അഞ്ച് മത്സരങ്ങൾ: രാജസ്ഥാന്റെ ആധിപത്യം

സിഎസ്കെയ്ക്കെതിരായ അവസാന അഞ്ച് മത്സരങ്ങളിൽ നാലിലും വിജയിച്ചത് രാജസ്ഥാനാണ്.

സഞ്ജു സാംസൺ തന്റെ പഴയ ടീമിനെതിരെ ചെന്നൈയ്ക്കായി എന്ത് മാജിക് കാണിക്കുമെന്നും, നായകനായി റിയാൻ പരാഗ് എങ്ങനെ തിളങ്ങുമെന്നും കാണാൻ കാത്തിരിക്കുകയാണ് ആരാധകർ.