ഇടുക്കി: രാജ്യത്ത് പലയിടത്തും സി.പി.എമ്മിന് കോണ്‍ഗ്രസിന്റെ കൊടിക്കൊപ്പമേ തങ്ങളുടെ കൊടി ഉയര്‍ത്താന്‍ സാധിക്കൂ എന്ന് മുസ്‌ലിം ലീഗ് ദേശീയ ജനറല്‍ സെക്രെട്ടറി പി.കെ കുഞ്ഞാലിക്കുട്ടി. തൊടുപുഴയില്‍ സംസാരിക്കവെയായിരുന്നു കുഞ്ഞാലിക്കുട്ടിയുടെ സി.പി.എം വിമര്‍ശനം. രാഹുല്‍ ഗാന്ധിക്ക് സിന്ദാബാദ് വിളിക്കാന്‍ മാത്രമെ രാജ്യത്ത് പലയിടത്തും സി.പി.എമ്മിനാകൂവെന്നും അദേഹം കൂട്ടിച്ചേര്‍ത്തു.

നേരത്തെ വയനാട്ടില്‍ എത്തിയ രാഹുല്‍ ഗാന്ധിയുടെ റോഡ് ഷോയില്‍ കോണ്‍ഗ്രസിന്റെയും ലീഗിന്റെയും പതാക ഒഴിവാക്കിയതില്‍ യു.ഡി.എഫിനെ സി പി എം കടന്നാക്രമിച്ചിരുന്നു. ലീഗിന്റെ പതാക ഒഴിവാക്കാനാണ് കോണ്‍ഗ്രസ് പതാകക്ക് അയിത്തം കല്‍പ്പിച്ചതെന്നായിരുന്നു മുഖ്യമന്ത്രി പിണറായി വിജയന്റെ പ്രതികരണം. ബി.ജെ.പിയെ ഭയന്നാണ് സ്വന്തം പതാക കോണ്‍ഗ്രസ് ഒളിപ്പിച്ചതെന്നും ഇത് ഭീരുത്വമാണെന്നും മുഖ്യമന്ത്രി വിമര്‍ശിച്ചു.

ലീഗിന്റെ പതാക കണ്ടാല്‍ ഉത്തരേന്ത്യയില്‍ പാകിസ്താന്‍ കൊടിയാണെന് പറയുമെന്നും ഇതില്‍ ഭയന്നാണ് പ്രചാരണത്തില്‍ ലീഗിന്റെ കൊടി ഉപേക്ഷിച്ചതെന്നായിരുന്നു സി.പി.എം സംസ്ഥാന സെക്രട്ടറി എം.വി ഗോവിന്ദന്റെ വിമര്‍ശനം.