തിരുവനന്തപുരം: വാണിജ്യ എല്‍പിജി വിതരണത്തില്‍ ഗ്യാസ് ഏജന്‍സികള്‍ മനപൂര്‍വം വീഴ്ച്ച വരുത്തുവെന്ന ആരോപണത്തില്‍ കര്‍ശന നടപടി സ്വീകരിക്കുമെന്ന് സിവില്‍ സപ്ലൈസ് കമ്മീഷണര്‍ കെ. ഹിമ അറിയിച്ചു. ഗ്യാസ് വിതരണത്തിലെ നിയന്ത്രണങ്ങളില്‍ ഇളവ് വരുത്തിയിട്ടും വ്യാപകമായ പരാതികള്‍ ഉയരുന്നതിനിടെയാണ് തീരുമാനം. 

പോര്‍ട്ടല്‍ വഴി ബുക് ചെയ്ത് അലോട്ട്‌മെന്റ് ലഭിച്ചിട്ടും ചില ഗ്യാസ് ഏജന്‍സികള്‍ സിലണ്ടര്‍ വിതരണം ചെയ്യാന്‍ മടിക്കുകയാണെന്നാണ് ആരോപണം. ഏതെങ്കിലും വിഭാഗത്തിന് അനുവദിച്ച എല്‍പിജി ബില്‍ അടിച്ച ശേഷം മറ്റേതെങ്കിലും വിഭാഗത്തിന് വിതരണം ചെയ്യുന്നതായി കണ്ടെത്തിയാലോ, ബില്ലില്‍ രേഖപ്പെടുത്തിയതിലും ഉയര്‍ന്ന വില ഈടാക്കിയാലോ ഏജന്‍സികള്‍ക്കെതിരെ നടപടിയെടുക്കാനാണ് തീരുമാനം. അവശ്യ സാധന നിയമവും, എല്‍പിജി വിതരണ നിയന്ത്രണ ഉത്തരവും അനുസരിച്ച് പ്രോസിക്യൂഷന്‍ നടപടി സ്വീകരിക്കും. കൂടാതെ ഡിസിപ്ലിന്‍ ഗൈഡന്‍സിന്റെ ഭാഗമായി ലൈസന്‍സ് റദ്ദാക്കല്‍ അടക്കം നടപടി സ്വീകരിക്കുന്നതിന് എണ്ണക്കമ്പനികള്‍ക്ക് ശിപാര്‍ശ ചെയ്യുമെന്നും കമ്മീഷണര്‍ വ്യക്തമാക്കി. 

ALSO READ: ജനപിന്തുണ നഷ്ടപ്പെട്ട ട്രംപ് രാഷ്ട്രീയ അതിജീവനത്തിന് പുതിയ തന്ത്രങ്ങൾ മെനയുന്നു; രാജ്യത്തെ ഉടൻ അഭിസംബോധന ചെയ്യും 

രാജ്യത്ത് എല്‍പിജി സാഹചര്യം മെച്ചപ്പെട്ടതിനാല്‍ അവശ്യ മേഖലകളിലേക്ക് നൂറ് ശതമാനം വാണിജ്യ എല്‍പിജി വിതരണത്തിനും, ഹോട്ടല്‍, റസ്റ്ററന്റ് ഉള്‍പ്പെടെയുള്ള മേഖലകളിലേക്ക് ആവശ്യകതയുടെ 62 ശതമാനം മുതല്‍ 66 ശതമനം വരെയും വിതരണത്തിന് നിര്‍ദേശമുണ്ട്. എന്നാല്‍ പലയിടങ്ങളിലും ഗ്യാസ് ഏജന്‍സികളില്‍ നിന്ന് ഈ അളവ് ലഭിക്കുന്നില്ലെന്ന പരാതി ഉയരുന്നുണ്ട്.