തിരുവനന്തപുരം: തിരുവനന്തപുരം മെഡിക്കല്‍ കോളജ് ആശുപത്രിയിലെ പാര്‍ക്കിങ് ഗ്രൗണ്ടില്‍ ബാഗില്‍ ഉപേക്ഷിച്ച നിലയില്‍ നവജാതശിശുവിന്റെ മൃതദേഹം കണ്ടെത്തി. മാസം തികയാതെ പ്രസവിച്ച കുഞ്ഞിന്റെ മൃതദേഹമാണ് ഇന്ന് രാവിലെ സുരക്ഷാ ജീവനക്കാര്‍ കണ്ടെത്തിയത്. സംഭവത്തില്‍ പൊലിസ് അന്വേഷണം ആരംഭിച്ചു.

മെഡിക്കല്‍ കോളജിലെ മള്‍ട്ടി സ്‌പെഷാലിറ്റി ബ്ലോക്കിന് സമീപമുള്ള പാര്‍ക്കിങ് ഏരിയയില്‍ ഉപേക്ഷിക്കപ്പെട്ട നിലയില്‍ ഒരു ബാഗ് സുരക്ഷാ ജീവനക്കാരുടെ ശ്രദ്ധയില്‍ പെടുകയായിരുന്നു. സംശയം തോന്നി ബാഗ് തുറന്നു പരിശോധിച്ചപ്പോഴാണ് ഉള്ളില്‍ കുഞ്ഞിന്റെ മൃതദേഹം കണ്ടെത്തിയത്.

 ആശുപത്രിയില്‍ ചികിത്സ തേടിയെത്തിയ ആരുടെയെങ്കിലും കുഞ്ഞാകാം ഇതെന്നാണ് പൊലിസിന്റെ പ്രാഥമിക നിഗമനം. പുറത്തു നിന്നുള്ളവര്‍ക്ക് ഈ ഭാഗത്തേക്ക് പ്രവേശിക്കുന്നത് പ്രയാസകരമായതിനാലാണ് ഇത്തരമൊരു സംശയം ബലപ്പെടുന്നത്.

നിലവില്‍ ആശുപത്രി പരിസരത്തെ സിസിടിവി ദൃശ്യങ്ങള്‍ കേന്ദ്രീകരിച്ചാണ് മെഡിക്കല്‍ കോളജ് പൊലിസ് അന്വേഷണം നടത്തുന്നത്. ബാഗ് അവിടെ ഉപേക്ഷിച്ചത് ആരെന്ന് കണ്ടെത്താനുള്ള ശ്രമങ്ങള്‍ ഊര്‍ജ്ജിതമാക്കി.

The body of a premature newborn was discovered abandoned in a bag at the Thiruvananthapuram Medical College parking area, prompting a police investigation and CCTV scrutiny.