കടുത്തുരുത്തി: മാഞ്ഞൂര്‍ പഞ്ചായത്തിലെ ചാമക്കാലാ ഗ്രാമത്തിലെ ഓണാഘോഷ പരിപാടികളുടെ ഭാഗമായി നടന്ന മാഞ്ഞൂര്‍ മണ്‍സൂണ്‍ മേളയുടെയും നാട്ടുപച്ചയുടെയും ചൂണ്ടയിടീലിന്റെയും ഉദ്ഘാടനം കെ.പി.സി.സി പ്രസിഡന്റ് വി.എം സുധീരന്‍ നിര്‍വഹിച്ചു. സുധീരന്‍ കാളവണ്ടിയിലെത്തിയാണ് ഉദ്ഘാടനം നിര്‍വഹിച്ചത്.
കുഴിയാഞ്ചാല്‍ തോട്ടില്‍ മോന്‍സ് ജോസഫ് എം.എല്‍.എയ്‌ക്കൊപ്പം ചൂണ്ടയിട്ടുക്കൊണ്ട് പരിപാടിയുടെ ഭാഗമായി നടന്ന ചൂണ്ടയിടീല്‍ മത്സരം വി.എം സുധീരന്‍ ഉദ്ഘാടനം ചെയ്തത്. ഉദ്ഘാടന സമ്മേളനത്തില്‍ മാഞ്ഞൂര്‍ പഞ്ചായത്ത് പ്രസിഡന്റ് കെ.സി മാത്യു അധ്യക്ഷത വഹിച്ചു. അഡ്വ. ടി ജോസഫ്, ജില്ലാ പഞ്ചായത്ത് വൈസ് പ്രസിഡന്റ് മേരി സെബാസ്റ്റ്യന്‍, ജില്ലാ പഞ്ചായത്ത് സ്റ്റാന്‍ഡിങ് കമ്മിറ്റി ചെയര്‍മാന്‍ സഖറിയാസ് കുതിരവേലി, ഉഴവൂര്‍ ബ്ലോക്ക് പഞ്ചായത്ത് പ്രസിഡന്റ് മോളി ലൂക്കാ, മാഞ്ഞൂര്‍ പഞ്ചായത്ത് വൈസ് പ്രസിഡന്റ് മഞ്ചു അജിത്ത്, കോണ്‍ഗ്രസ് കടുത്തുരുത്തി ബ്ലോക്ക് പ്രസിഡന്റ് ബേബി തൊണ്ടാംകുഴി എന്നിവര്‍ സംസാരിച്ചു. നാലു ദിവസങ്ങളിലായി നടക്കുന്ന മേള നാളെ സമാപിക്കും.