കോഴിക്കോട്: യു.ഡി.എഫ് സ്ഥാനാര്‍ഥി അഡ്വ. ഫാത്തിമ തഹ്‌ലിയക്കും തെരഞ്ഞെടുപ്പ് കമീഷന്റെ നോട്ടിസ്. പേരാമ്പ്രയില്‍ അനൗണ്‍സ്‌മെന്റ് വിവാദം കത്തുന്നതിനിടെയാണ് നോട്ടിസ്. വീട്ടിലെത്തി സമുദായത്തിന്റെ പേരില്‍ വോട്ട് തേടിയെന്ന എല്‍.ഡി.എഫ് പരാതിയുടെ അടിസ്ഥാനത്തിലാണ് നോട്ടിസ് അയച്ചിരിക്കുന്നത്. ഇതുമായി ബന്ധപ്പെട്ട് മൂന്നു പരാതികളാണ് എല്‍.ഡി.എഫ് നല്‍കിയിട്ടുള്ളത്. മൂന്നു പരാതികള്‍ക്കും സമാന സ്വഭാവമാണ്. അതേസംയം, പരാതിക്കൊപ്പം തെളിവുകളൊന്നും സമര്‍പ്പിച്ചിട്ടില്ല. 

ALSO READ: പേരാമ്പ്രയിലെ അനൗണ്‍സ്‌മെന്റ് വിവാദത്തില്‍ നോട്ടിസ് കിട്ടിയിട്ടില്ലെന്ന് ടി.പി രാമകൃഷ്ണന്‍; സമാധാനാന്തരീക്ഷം തകര്‍ക്കാനുള്ള ശ്രമം

പേരാമ്പ്രയിലെ എല്‍.ഡി.എഫ് സ്ഥാനാര്‍ഥി  ടി.പി. രാമകൃഷ്ണന് അനൗണ്‍സ്‌മെന്റ് വിവാദത്തില്‍ തെരഞ്ഞെടുപ്പ് കമീഷന്‍ നേരത്തെ നോട്ടിസ് നല്‍കിയിരുന്നു. യു.ഡി.എഫിന്റെ പരാതിയിലായിരുന്നു നടപടി. മാതൃക പെരുമാറ്റ ചട്ടലംഘനം നടത്തിയെന്നായിരുന്നു പരാതി. ഇതിലാണ് വിശദീകരണം തേടി ഡെപ്യൂട്ടി കലക്ടര്‍ നോട്ടിസ് നല്‍കിയത്.

വിവാദ അനൗണ്‍സ്‌മെന്റിന്റെ ദൃശ്യങ്ങളടക്കമാണ് യു.ഡി.എഫ് പരാതി നല്‍കിയത്. എല്‍.ഡി.എഫിന്റെ പ്രചാരണ വാഹനത്തില്‍നിന്ന് യു.ഡി.എഫ് സ്ഥാനാര്‍ഥി ഫാത്തിമ തഹ്‌ലിയക്കെതിരെ ഉയര്‍ന്ന വര്‍ഗീയ പരാമര്‍ശമുള്ള അനൗണ്‍സ്‌മെന്റാണ് വിവാദങ്ങള്‍ക്ക് തിരികൊളുത്തിയത്. മുസ്‌ലിം വീടുകളില്‍ പോയി 'നമ്മുടെ വോട്ട് നമ്മുടെ ഖൗമിലെ കുട്ടിക്ക്' എന്ന് പറഞ്ഞാണ് മുസ്‌ലിം ലീഗ് വോട്ടുപിടിക്കുന്നതെന്ന് എല്‍.ഡി.എഫ് നടത്തിയ അനൗണ്‍സ്‌മെന്റില്‍ പറഞ്ഞിരുന്നു. റെക്കോഡു ചെയ്ത അനൗണ്‍സ്‌മെന്റാണ് നടത്തിയത്. ഈ വാഹനത്തില്‍ ഇടതുമുന്നണി സ്ഥാനാര്‍ഥി ടി.പി. രാമകൃഷ്ണന് വോട്ടഭ്യര്‍ഥിക്കുന്ന ബോര്‍ഡ് സ്ഥാപിച്ചായിരുന്നു പ്രചാരണം.

അതേസമയം, അനൗണ്‍സ്‌മെന്റുമായി ബന്ധപ്പെട്ട ചോദ്യങ്ങളോട് ക്ഷുഭിതനായാണ് ടി.പി രാമകൃഷ്ണന്‍ പ്രതികരിച്ചത്. നോട്ടിസ് കിട്ടിയിട്ടില്ലെന്നാണ് അദ്ദേഹം മാധ്യമങ്ങളോട് പറഞ്ഞത്.

adv fathi thahliya receives notice following ldf complaint accusing her of seeking votes in the name of community raising political concerns in kerala