ചെന്നൈ: ഐപിഎൽ 2026 സീസണിൽ വമ്പൻ പ്രതീക്ഷകളോടെ ചെന്നൈ സൂപ്പർ കിംഗ്‌സ് (CSK) നിരയിലെത്തിയ സഞ്ജു സാംസണ് കടുത്ത തിരിച്ചടി. തുടർച്ചയായ മൂന്ന് മത്സരങ്ങളിലും ബാറ്റിംഗിൽ പരാജയപ്പെട്ടതോടെ ആരാധകർ താരത്തിന് നേരെ തിരിഞ്ഞിരിക്കുകയാണ്. രാജസ്ഥാൻ റോയൽസിൽ നിന്ന് ചെന്നൈയിലേക്ക് ചേക്കേറിയ സഞ്ജുവിന് പുതിയ ഫ്രാഞ്ചൈസിയുമായി പൊരുത്തപ്പെടാൻ കഴിയുന്നില്ലെന്നും കളിക്കളത്തിൽ താരം 'ഡിസ്കണക്റ്റഡ്' ആണെന്നുമാണ് സോഷ്യൽ മീഡിയയിലെ വിമർശനം.

2026-ലെ ടി20 ലോകകപ്പിൽ ഇന്ത്യയുടെ കിരീടധാരണത്തിൽ നിർണ്ണായക പങ്കുവഹിച്ച സഞ്ജുവിന് ഐപിഎല്ലിൽ ആ മികവ് തുടരാനാകാത്തതാണ് ആരാധകരെ ചൊടിപ്പിക്കുന്നത്. ഇതുവരെ കളിച്ച മൂന്ന് മത്സരങ്ങളിൽ നിന്ന് വെറും 22 റൺസ് മാത്രമാണ് സഞ്ജുവിന്റെ സമ്പാദ്യം.

ഒറ്റ അക്ക സ്കോറുകളുടെ ഘോഷയാത്ര

സീസണിലെ ആദ്യ മൂന്ന് മത്സരങ്ങളിൽ 6, 7, 9 എന്നിങ്ങനെയാണ് സഞ്ജുവിന്റെ സ്കോറുകൾ. ലോകകപ്പിൽ ലോകോത്തര ബൗളർമാരെ അനായാസം നേരിട്ട താരം ഐപിഎല്ലിൽ തുടക്കത്തിലേ വിക്കറ്റ് വലിച്ചെറിയുന്നത് ചെന്നൈയുടെ ടോപ് ഓർഡറിനെ തളർത്തുന്നുണ്ട്. സഞ്ജുവിന്റെ ഈ മോശം ഫോം ടീമിന് തുടർച്ചയായ മൂന്ന് തോൽവികൾ സമ്മാനിക്കാനും കാരണമായി.

"വിശപ്പില്ലാത്ത ശരീരഭാഷ"; ആരാധകരുടെ പ്രതിഷേധം

സഞ്ജുവിന്റെ മോശം സ്കോറുകളേക്കാൾ ഉപരി അദ്ദേഹത്തിന്റെ ശരീരഭാഷയാണ് ആരാധകരെ നിരാശരാക്കുന്നത്. സഞ്ജുവിന് കളിയോട് താല്പര്യമില്ലാത്തതു പോലെയാണ് മൈതാനത്ത് കാണപ്പെടുന്നതെന്ന് സോഷ്യൽ മീഡിയയിൽ വിമർശകർ കുറിക്കുന്നു. കഴിഞ്ഞ ദിവസം റോയൽ ചലഞ്ചേഴ്സ് ബെംഗളൂരുവിനെതിരെ (RCB) നടന്ന മത്സരത്തിലും സഞ്ജു പരാജയപ്പെട്ടതോടെ ഒരു സിഎസ്‌കെ ആരാധകൻ കുറിച്ചതിങ്ങനെ:

"പ്രിയ സഞ്ജു, നിങ്ങൾക്ക് മാനസികമായി താല്പര്യമില്ലെങ്കിൽ കുറച്ച് മത്സരങ്ങളിൽ നിന്ന് മാറി നിൽക്കുക. നിങ്ങളുടെ ശരീരഭാഷയിൽ ആവേശമോ പോരാട്ടവീര്യമോ കാണുന്നില്ല. ക്യാമറ നിങ്ങളുടെ നേരെ വരുമ്പോഴെല്ലാം നിരാശയും താല്പര്യമില്ലായ്മയുമാണ് മുഖത്ത്. അഭിനിവേശം എവിടെപ്പോയി? നിങ്ങൾ ടീമിനായി പൊരുതുന്നുണ്ടെന്ന് അല്പമെങ്കിലും കാണിക്കുക."

ആർസിബിയുടെ തകർപ്പൻ ബാറ്റിംഗ്; ചെന്നൈ തകർന്നു

ഞായറാഴ്ച നടന്ന മത്സരത്തിൽ സിഎസ്‌കെയെ ആർസിബി തകർത്തുവിട്ടു. ആദ്യം ബാറ്റ് ചെയ്ത ആർസിബി നിശ്ചിത ഓവറിൽ 250/3 എന്ന കൂറ്റൻ സ്കോറാണ് പടുത്തുയർത്തിയത്. ടിം ഡേവിഡ് (25 പന്തിൽ 70*), ക്യാപ്റ്റൻ രജത് പട്ടീദർ (19 പന്തിൽ 48*), ദേവ്ദത്ത് പടിക്കൽ (50) എന്നിവരുടെ തകർപ്പൻ ബാറ്റിംഗാണ് ചെന്നൈ ബൗളർമാരെ നിലംപരിശാക്കിയത്.

251 റൺസ് വിജയലക്ഷ്യവുമായി ഇറങ്ങിയ ചെന്നൈയ്ക്ക് തുടക്കത്തിലേ സഞ്ജുവിനെ നഷ്ടമായി. സർഫറാസ് ഖാൻ (50), പ്രശാന്ത് വീർ (43) എന്നിവർ പൊരുതിയെങ്കിലും 19.4 ഓവറിൽ 207 റൺസിന് ചെന്നൈ ഓൾഔട്ടായി. ഇതോടെ സീസണിലെ ആദ്യ വിജയത്തിനായി ചെന്നൈ ഇനിയും കാത്തിരിക്കണം. സഞ്ജു സാംസണിന്റെ ഫോമും മാനസികാവസ്ഥയും ടീം മാനേജ്മെന്റിന് ഇപ്പോൾ വലിയ തലവേദനയായി മാറിയിരിക്കുകയാണ്