പെരിന്തല്‍മണ്ണ: ജില്ലയില്‍ സാമൂഹ്യക്ഷേമ പെന്‍ഷന്‍ വിതരണം നിശ്ചിത തിയതിക്കകം 90 ശതമാനം പൂര്‍ത്തിയാക്കിയത് 20 സഹകരണ ബാങ്കുകള്‍. ഓണത്തിനു മുന്‍പ് ഈ മാസം ഒന്‍പതിനകം പൂര്‍ത്തിയാക്കണമെന്നായിരുന്നു സഹകരണ ബാങ്കുകള്‍ക്കു നിര്‍ദേശം നല്‍കിയിരുന്നത്. നിശ്ചിത തിയതിക്കകം നാലു സഹകരണ ബാങ്കുകള്‍ നൂറു ശതമാനം വിതരണം പൂര്‍ത്തിയാക്കി.
പെരിന്തല്‍മണ്ണ താലൂക്കിലെ കടന്നമണ്ണ സര്‍വിസ് സഹകരണ ബാങ്ക്, കോഡൂര്‍ സര്‍വിസ് സഹകരണ ബാങ്ക്. തിരുവാലി സര്‍വിസ് സഹകരണ ബാങ്ക്, പോരൂര്‍ സര്‍വിസ് സഹകരണ ബാങ്ക് എന്നിവയാണ് നിശ്ചിത തിയതിക്കകം നൂറു ശതമാനം പൂര്‍ത്തിയാക്കിയത്. വണ്ടണ്ടൂര്‍, ചാലിയാര്‍, കരുളായി, മൂത്തേടം, പെരുമണ്ണ ക്ലാരി സഹകരണ ബാങ്കുകള്‍ 95 ശതമാനം പൂര്‍ത്തിയാക്കി.
ജില്ലാ സഹകരണ ബാങ്കിന്റെ ചങ്ങരംകുളം, താനൂര്‍ ബ്രാഞ്ചുകള്‍ ഉള്‍പ്പെടെ 123 സഹകരണ ബാങ്കുകള്‍ വഴിയാണ് പെന്‍ഷന്‍ വിതരണം നടക്കുന്നത്. അന്‍പതോളം സഹകരണ ബാങ്കുകളില്‍ മന്ദഗതിയിലായിരുന്നു വിതരണം. പെന്‍ഷന്‍ വിതരണത്തിനായി നല്‍കിയ പട്ടികയില്‍ ഭര്‍ത്താവിന്റെയോ പിതാവിന്റെയോ പേര് ഉള്‍ക്കൊള്ളിക്കാതിരുന്നതും പെന്‍ഷന്‍ തുകയുമായി വീട്ടിലെത്തുമ്പോള്‍ സ്ഥലത്തില്ലാത്തതും ഇതിനു കാരണമായിട്ടുണ്ട്.
മലപ്പുറം ജില്ലാ ബാങ്കിന്റെ നേതൃത്വത്തില്‍ ആവശ്യമായ ക്രമീകരണങ്ങളെല്ലാം നടത്തിയാണ് വിതരണം ഏകോപിപ്പിക്കുന്നത്. കാര്‍ഷിക തൊഴിലാളി പെന്‍ഷന്‍, വികലാംഗ പെന്‍ഷന്‍, വാര്‍ധക്യ കാലപെന്‍ഷന്‍, വിധവാ പെന്‍ഷന്‍, അവിവാഹിതര്‍ക്കുള്ള പെന്‍ഷന്‍ എന്നീ അഞ്ചിനങ്ങളാണ് പ്രാഥമിക സഹകരണ ബാങ്കുകളിലൂടെ വിതരണം ചെയ്യുന്നത്. പെന്‍ഷന്‍ വിതരണം ചെയ്യുന്നതിനു പ്രാഥമിക സഹകരണ ബാങ്കുകളില്‍ കളക്ഷന്‍ ഏജന്റുമാരെയാണ് ചുമതലപ്പെടുത്തിയിരിക്കുന്നത്. പെന്‍ഷന്‍ വിതരണം കുറ്റമറ്റ രീതിയിലാക്കുന്നതിന് തികഞ്ഞ ജാഗ്രതയോടെയാണ് സഹകരണ ബാങ്കുകള്‍ പ്രവര്‍ത്തിക്കുന്നത്. വിതരണം പൂര്‍ത്തിയായിട്ടില്ലാത്ത പ്രദേശങ്ങളില്‍ കഴിഞ്ഞ ഒഴിവ് ദിവസങ്ങളില്‍ വിതരണം നടന്നിരുന്നു. അടുത്ത ദിവസങ്ങളിലും വിതരണം നടക്കും. ഇതുവരെയുള്ള കണക്കനുസരിച്ചു ജില്ലയില്‍ പെന്‍ഷന്‍ വിതരണം 90 ശതമാനവും പൂര്‍ത്തിയായതായി സഹകരണ സംഘം ജോയിന്റ് രജിസ്ട്രാര്‍ എം.ടി ദേവസ്യ അറിയിച്ചു.