തെല്‍അവീവ്: ഇറാന്‍ -യു.എസ് -ഇസ്‌റാഈല്‍ വെടിനിര്‍ത്തല്‍ രാജ്യത്തിന്റെ ചരിത്രത്തിലെ ഏറ്റവും വലിയ രാഷ്ട്രീയ പരാജയമെന്ന് ഇസ്‌റാഈല്‍ പ്രതിപക്ഷ നേതാവ് യെയര്‍ ലാപിഡ്. യുദ്ധത്തിന്റെ ലക്ഷ്യങ്ങള്‍ കൈവരിക്കുന്നതില്‍ പ്രധാനമന്ത്രി ബിന്യമിന്‍ നെതന്യാഹു പരാജയപ്പെട്ടതായി ലാപിഡ് കൂട്ടിച്ചേര്‍ത്തു. 

'നമ്മുടെ മുഴുവന്‍ ചരിത്രത്തിലും ഇതുപോലൊരു രാഷ്ട്രീയ ദുരന്തം ഉണ്ടായിട്ടില്ല. നമ്മുടെ ദേശീയ സുരക്ഷയുടെ കാതലിനെക്കുറിച്ച് തീരുമാനങ്ങള്‍ എടുക്കുമ്പോള്‍ ഇസ്‌റാഈല്‍ ചര്‍ച്ചയുടെ അടുത്തുപോലും ഉണ്ടായിരുന്നില്ല,' ലാപിഡ് എക്സില്‍ എഴുതി.

'സൈന്യം അതിനോട് ആവശ്യപ്പെട്ടതെല്ലാം നടപ്പിലാക്കി, പൊതുജനങ്ങള്‍ ശ്രദ്ധേയമായ പ്രതിരോധശേഷി കാണിച്ചു, പക്ഷേ നെതന്യാഹു രാഷ്ട്രീയമായി പരാജയപ്പെട്ടു, തന്ത്രപരമായി പരാജയപ്പെട്ടു, താന്‍ തന്നെ നിശ്ചയിച്ച ലക്ഷ്യങ്ങളൊന്നും നെതന്യാഹു നേടിയില്ല.'ലാപിഡ് തുറന്നടിച്ചു. 

ALSO READ: വെടിനിര്‍ത്തലില്‍ ലെബനാന്‍ ഉള്‍പെടുന്നില്ലെന്ന് നെതന്യാഹു; പ്രദേശത്ത് നിന്ന് സൈന്യത്തെ പിന്‍വലിക്കില്ല, ആക്രമണം തുടരും 

ഇറാന്റെ ആണവ പദ്ധതി ഇല്ലാതാക്കുകയോ കുറഞ്ഞത് ഗുരുതരമായി നശിപ്പിക്കുകയോ ചെയ്യുക എന്നതായിരുന്നു യുദ്ധത്തിന്റെ കേന്ദ്ര ലക്ഷ്യമായി നെതന്യാഹു നിശ്ചയിച്ചിരുന്നത്, അത് ഇസ്‌റാഈലിന്റെ 'അസ്തിത്വത്തിന് ഭീഷണി'യാണെന്നാണ് നെതന്യാഹു പറഞ്ഞിരുന്നത്. 

'അഹങ്കാരം, അശ്രദ്ധ, തന്ത്രപരമായ ആസൂത്രണത്തിന്റെ അഭാവം എന്നിവ കാരണം നെതന്യാഹു ഉണ്ടാക്കിയ രാഷ്ട്രീയവും തന്ത്രപരവുമായ നാശനഷ്ടങ്ങള്‍ പരിഹരിക്കാന്‍ ഞങ്ങള്‍ക്ക് വര്‍ഷങ്ങളെടുക്കും,' ലാപിഡ് പറഞ്ഞു.

ഇറാനെതിരെയുള്ള ആക്രമണങ്ങള്‍ രണ്ടാഴ്ചത്തേക്ക് നിര്‍ത്തിവെക്കാനുള്ള അമേരിക്കയുടെ തീരുമാനത്തെ പ്രധാനമന്ത്രി ബിന്യമിന്‍ നെതന്യാഹു സ്വാഗതം ചെയ്തിരുന്നു. എന്നാല്‍ ഈ താല്‍ക്കാലിക വെടിനിര്‍ത്തല്‍ കരാര്‍ ലബനാന് ബാധകമല്ലെന്നും നെതന്യാഹു വ്യക്തമാക്കി. എക്സിലൂടെ പുറത്തുവിട്ട പ്രസ്താവനയിലാണ് നെതന്യാഹു നിലപാട് അറിയിച്ചത്.

യുദ്ധത്തില്‍ തങ്ങള്‍ക്ക് നേരിട്ട നാശനഷ്ടങ്ങള്‍ക്ക് നഷ്ടപരിഹാരം നല്‍കുക എന്നതുള്‍പെടെ 10 ഇന നിര്‍ദേശങ്ങള്‍ മുന്നോട്ടുവെച്ച് കൊണ്ടാണ് ഇറാന്‍ വെടിനിര്‍ത്തലിന് തയ്യാറായത്. തങ്ങള്‍ക്ക് നേരെ നടത്തുന്ന ആക്രമണങ്ങള്‍ നിര്‍ത്തിയാല്‍ രണ്ടാഴ്ച തിരിച്ചടി നിര്‍ത്തുമെന്നും മറിച്ച് സംഭവിച്ചാല്‍ സ്ഥിതി മാറുമെന്നാണ് ഇറാന്‍ വ്യക്തമാക്കിയിട്ടുള്ളത്. 

israeli opposition leader yair lapid criticizes the iran us israel ceasefire calling it the biggest political failure and accuses benjamin netanyahu of failing war objectives