മഞ്ചേരി: പെരുന്നാളാഘോഷം കൊഴുപ്പിക്കാന്‍ കഞ്ചാവും ചരസും ഉപയോഗിച്ച യുവാക്കളെ മഞ്ചേരി പൊലിസ് പിടികൂടി. ഏഴംഗ സംഘത്തിലെ പ്രധാനികളായ രണ്ടുപേരെയാണ് മഞ്ചേരി സി.ഐ കെ.എം ബിജുവിന്റെ നിര്‍ദേശ പ്രകാരം എസ്.ഐ കൈലാസ്‌നാഥും സംഘവും പയ്യനാട് സ്റ്റേഡിയത്തിന് സമീപത്ത് വെച്ച് പിടികൂടിയത്.
മഞ്ചേരി സ്വദേശി മുഹമ്മദ് ഷഹീദ്, പയ്യനാട് സ്വദേശി ആഷിഖ് എന്നിവരെയാണ് എസ്.ഐയും സംഘവും പിടികൂടിയത്.
ഇവരില്‍ നിന്ന് കഞ്ചാവ് വലിക്കാനുപയോഗിക്കുന്ന ഹുക്ക, നാല് പൊതി കഞ്ചാവ്, കഞ്ചാവടിച്ച ശേഷം കണ്ണു ചുവക്കാതിരിക്കുന്നതിനുള്ള തുള്ളിമരുന്ന്, വാസനയറിയാതിരിക്കാനായി പെര്‍ഫ്യൂം എന്നിവയും പിടികൂടിയിട്ടുണ്ട്. ക്രൈം സ്‌ക്വാഡ് അംഗങ്ങളായ ഉണ്ണികൃഷ്ണന്‍ മാരാത്ത്, സഞ്ജീവ്, അരുണ്‍, സഞ്ജയന്‍ എന്നിവരും അന്വേഷണ സംഘത്തിലുണ്ടായിരുന്നു.