അബുദാബി: യു.എ.ഇയില്‍ സ്വദേശികള്‍ക്ക് സ്വകാര്യ മേഖലയില്‍ തൊഴിലവസരങ്ങള്‍ ഉറപ്പാക്കുന്ന 'നാഫിസ്' (Nafis) പദ്ധതി 2040 വരെ നീട്ടി.  യു.എ.ഇ വൈസ് പ്രസിഡന്റും ഉപപ്രധാനമന്ത്രിയും പ്രസിഡന്‍ഷ്യല്‍ കോര്‍ട്ട് ചെയര്‍മാനുമായ ശൈഖ് മന്‍സൂര്‍ ബിന്‍ സായിദ് അല്‍ നഹ്യാനാണ് പദ്ധതി നീട്ടിയതായി പ്രഖ്യാപിച്ചത്. തൊഴിലുകളുടെ എണ്ണത്തിനപ്പുറം ഗുണനിലവാരത്തിനും സുസ്ഥിരതയ്ക്കും മുന്‍ഗണന നല്‍കുന്നതാണ് പുതിയ മാറ്റം. ആര്‍ട്ടിഫിഷ്യല്‍ ഇന്റലിജന്‍സിന്റെ സാധ്യതകള്‍ പ്രയോജനപ്പെടുത്തുന്നതിനൊപ്പം സ്വദേശി കുടുംബങ്ങള്‍ക്ക് കൂടുതല്‍ സാമ്പത്തിക ആനുകൂല്യങ്ങളും പുതിയ മാറ്റങ്ങളില്‍ ഉള്‍പ്പെടുത്തിയിട്ടുണ്ട്.
2021 സെപ്റ്റംബറിലാണ് 24 ബില്യണ്‍ (2400 കോടി) ദിര്‍ഹമിന്റെ നാഫിസ് പദ്ധതി ആരംഭിച്ചത്. 2025ഓടെ 75,000 സ്വദേശികളെ സ്വകാര്യ മേഖലയില്‍ നിയമിക്കുക എന്നതായിരുന്നു ലക്ഷ്യമെങ്കിലും, വന്‍ വിജയമാണ് പദ്ധതി കൈവരിച്ചത്. ഇതുവരെ 1,76,000 പേര്‍ക്ക് പദ്ധതിയിലൂടെ തൊഴില്‍ ലഭിച്ചു. ഇതില്‍ 1,52,000 പേര്‍ ഇപ്പോഴും സ്വകാര്യ മേഖലയില്‍ ജോലി ചെയ്യുന്നുണ്ട്. മുന്‍പ് 15 ശതമാനം സ്വദേശി ബിരുദധാരികള്‍ മാത്രമാണ് സ്വകാര്യ മേഖല തിരഞ്ഞെടുത്തിരുന്നതെങ്കില്‍, ഇപ്പോഴത് 58 ശതമാനമായി ഉയര്‍ന്നത് പദ്ധതിയുടെ വലിയ വിജയമായാണ് കണക്കാക്കുന്നത്. നാഫിസ് ഗുണഭോക്താക്കളില്‍ 74 ശതമാനവും സ്ത്രീകളാണെന്നതും ശ്രദ്ധേയമാണ്.
യു.എ.ഇയുടെ 'കുടുംബ വര്‍ഷ'ത്തോടനുബന്ധിച്ച് മികച്ച ആനുകൂല്യങ്ങളാണ് നാഫിസില്‍ ഉള്‍പ്പെടുത്തിയിരിക്കുന്നത്. കുട്ടികള്‍ക്കുള്ള അലവന്‍സ് പദ്ധതിയിലെ പരിധി എടുത്തുകളഞ്ഞു എന്നതാണ് ഇതില്‍ പ്രധാനം. നേരത്തെ പരമാവധി നാല് കുട്ടികള്‍ക്ക് മാത്രമായിരുന്നു പ്രതിമാസം 3,200 ദിര്‍ഹം വരെ ആനുകൂല്യം ലഭിച്ചിരുന്നത്. ഈ നിബന്ധനയാണ് ഇപ്പോള്‍ ഒഴിവാക്കിയത്. കൂടാതെ, സ്വകാര്യ മേഖലയില്‍ ജോലി ചെയ്യുന്ന സ്വദേശി വനിതകളുടെ മക്കള്‍ക്കും സ്വദേശികളുടെ ഭാര്യമാര്‍ക്കും പ്രത്യേക ശമ്പള പിന്തുണയും പുതിയതായി പ്രഖ്യാപിച്ചിട്ടുണ്ട്. 
50ല്‍ കൂടുതല്‍ ജീവനക്കാരുള്ള സ്ഥാപനങ്ങളില്‍ പ്രതിവര്‍ഷം രണ്ട് ശതമാനം വീതം സ്വദേശിവല്‍ക്കരണം നടപ്പാക്കണമെന്നാണ് നിയമം. 2026ഓടെ ഇത് 10 ശതമാനമാക്കുകയാണ് ലക്ഷ്യം. 2024 മുതല്‍ 20 മുതല്‍ 49 വരെ ജീവനക്കാരുള്ള പ്രത്യേക മേഖലകളിലെ സ്ഥാപനങ്ങളിലും കുറഞ്ഞത് ഒരു സ്വദേശിയെയെങ്കിലും നിയമിക്കണം. ഇത് പാലിക്കാത്തവരില്‍ നിന്ന് 96,000 ദിര്‍ഹമാണ് പിഴ ഈടാക്കുക. 

Summary: The UAE has extended the Nafis programme to 2040 after shattering its initial goals. The initiative has successfully employed over 176,000 Emiratis in the private sector, far exceeding the original target of 75,000 by 2025. Aligning with the UAE's "Year of the Family," the updated scheme removes the previous cap on the Child Allowance. It also introduces targeted salary support for the children of Emirati mothers and the wives of Emirati citizens working in the private sector.