വേങ്ങര: പള്ളിയില്‍ പെരുന്നാള്‍ നിസ്‌കാരം നടക്കുന്നതിനിടെ നിസ്‌കാരത്തിനെത്തിയവരുടെ വാഹനങ്ങള്‍ കുത്തിത്തുറന്ന് വ്യാപക മോഷണം. നാലായിരം രൂപയും ഉപകരണങ്ങളം നഷ്ടപ്പെട്ടു. തിങ്കളാഴ്ച്ച രാവിലെ എട്ടോടെ അരീക്കുളം ജുമാ മസ്ജിദിലെ ഈദ് നിസ്‌കാരത്തിനെത്തി വേങ്ങര -പുത്തനങ്ങാടി റോഡില്‍ നിര്‍ത്തിയിട്ട ആറിലധികം ഓട്ടോറിക്ഷകളുടെ ഡാഷ് ബോക്‌സ് കുത്തിതുറന്നാണ് മോഷണം നടത്തിയത്.
ലക്ഷം വീട് കോളനിയിലെ കുന്നഞ്ചേരി ജാഫറിന്റ ഓട്ടോയില്‍ പേഴ്‌സിലാക്കി സൂക്ഷിച്ച നാലായിരം രൂപയും മറ്റു വാഹനങ്ങളില്‍ നിന്ന് ഉപകരണങ്ങളും നഷ്ടപ്പെട്ടു. പ്രദേശത്ത് മോഷണവും പിടിച്ചുപറിയും വ്യാപകമാവുന്നതായി പരാതിയുണ്ട്. ഇതേത്തുടര്‍ന്ന് കഴിഞ്ഞ ആഴ്ച നാട്ടുകാര്‍ ചേര്‍ന്ന് കര്‍മസമിതി രൂപീകരിച്ച് പ്രവര്‍ത്തനം തുടങ്ങിയിരുന്നു.
നടപടി ആവശ്യപ്പെട്ട് മുഖ്യമന്ത്രി, സ്ഥലം എം.എല്‍.എ, ജില്ലാ പോലിസ് മേധാവി എന്നിവര്‍ക്ക് ഭീമ ഹര്‍ജി നല്‍കുന്നതിനായി ആക്ഷന്‍ കമ്മിറ്റിയുടെ നേതൃത്വത്തില്‍ പള്ളിയില്‍ നിന്നും പരിസര പ്രദേശങ്ങളില്‍ നിന്നും ഒപ്പുശേഖരണം നടത്തുന്നതിനിടെയാണ് വീണ്ടും മോഷണം നടന്നത്.