കാൺപൂർ: ഉത്തർപ്രദേശിലെ ഹാമിർപൂരിൽ നിന്ന് നാടുകടത്തപ്പെട്ട ക്രിമിനൽ പശ്ചാത്തലമുള്ള വ്യക്തിയെ കാൺപൂരിലെ വീട്ടിൽ കഴുത്തുഞെരിച്ചു കൊലപ്പെടുത്തിയ നിലയിൽ കണ്ടെത്തിയ സംഭവത്തിൽ ഭാര്യ പിടിയിലായി. 50 വയസ്സുള്ള ആശിഷ് ശർമ്മയാണ് കൊല്ലപ്പെട്ടത്. സ്വാഭാവിക മരണമെന്ന് കരുതിയ സംഭവത്തിൽ സിസിടിവി ദൃശ്യങ്ങൾ കേന്ദ്രീകരിച്ച് നടത്തിയ അന്വേഷണത്തിലാണ് ഞെട്ടിക്കുന്ന കൊലപാതക വിവരം പുറത്തുവന്നത്.

പൊലിസ് പറയുന്നതനുസരിച്ച്, 2022-ൽ വനമേഖലയിൽ വെച്ച് പെൺകുട്ടിയെ പീഡിപ്പിച്ച കേസിൽ ജയിലിലായ ക്രിമിനലാണ് ആശിഷ് ശർമ്മ. ജയിലിൽ നിന്നിറങ്ങിയ ശേഷം ഹാമിർപൂർ ജില്ലയിൽ നിന്ന് ഇയാളെ നാടുകടത്തി. ഇതോടെ ആശിഷ് കാൺപൂരിലേക്ക് താമസം മാറി. ഈ സമയത്താണ് ഹാമിർപൂരിൽ താമസിച്ചിരുന്ന ഭാര്യ ആരതി, ഭർത്താവിനൊപ്പം ജയിലിൽ കഴിഞ്ഞിരുന്ന സബ്ലു എന്ന യുവാവുമായി പ്രണയത്തിലായത്.

കൊലപാതകത്തിലേക്ക് നയിച്ച ഗൂഢാലോചന

ഭർത്താവിനെ കൊല്ലാൻ ആരതിയും കാമുകൻ സബ്ലുവും ചേർന്ന് ആസൂത്രിതമായ പദ്ധതി തയ്യാറാക്കുകയായിരുന്നു. ഏപ്രിൽ 1-ന് രാത്രി കാമുകനൊപ്പം നൂറുകണക്കിന് കിലോമീറ്ററുകൾ സഞ്ചരിച്ച് ആരതി കാൺപൂരിലെത്തി. ഭർത്താവ് മദ്യലഹരിയിലായിരിക്കുമെന്ന് ഉറപ്പുവരുത്തിയ ശേഷമാണ് ഇവർ വീട്ടിലേക്ക് കടന്നത്. ഉറങ്ങിക്കിടക്കുകയായിരുന്ന ആശിഷിനെ ഇരുവരും ചേർന്ന് കഴുത്തുഞെരിച്ചു കൊലപ്പെടുത്തുകയായിരുന്നു.

പൊലിസിനെ കുഴപ്പിച്ച അന്വേഷണം

ഏപ്രിൽ 2-നാണ് മൃതദേഹം കണ്ടെത്തുന്നത്. അമിതമായി മദ്യപിക്കുന്ന ആളായതിനാൽ സ്വാഭാവിക മരണമെന്ന് കരുതിയെങ്കിലും പോസ്റ്റ്മോർട്ടം റിപ്പോർട്ടിൽ കൊലപാതകമാണെന്ന് തെളിഞ്ഞു. മകൻ ലവ്‌കുഷ് നൽകിയ പരാതിയിൽ അന്വേഷണം ആരംഭിച്ച ചകേരി പൊലിസ് 200-ലധികം സിസിടിവി ക്യാമറകളാണ് പരിശോധിച്ചത്. അർദ്ധരാത്രിയിൽ ഒരു യുവാവിനൊപ്പം ഒരു സ്ത്രീ വീട്ടിൽ വന്നുപോകുന്നത് ദൃശ്യങ്ങളിൽ വ്യക്തമായി. തുടർന്ന് നടത്തിയ അന്വേഷണത്തിലാണ് ഇത് ആരതിയാണെന്ന് തിരിച്ചറിഞ്ഞത്.

തെറ്റായ മൊഴിയും അറസ്റ്റും

പിടിക്കപ്പെടുമെന്ന് ഉറപ്പായപ്പോൾ വീട്ടുടമസ്ഥനാണ് കൊലപാതകത്തിന് പിന്നിലെന്ന് പറഞ്ഞ് പൊലിസിനെ തെറ്റിദ്ധരിപ്പിക്കാൻ ആരതി ശ്രമിച്ചു. എന്നാൽ പൊലിസ് ചോദ്യം ചെയ്യലിൽ സത്യം വെളിപ്പെട്ടു. ഭർത്താവ് തന്നെ നിരന്തരം മർദ്ദിക്കാറുണ്ടായിരുന്നെന്നും ഇതാണ് കൊലപാതകത്തിന് പ്രേരിപ്പിച്ചതെന്നും ഇവർ മൊഴി നൽകി.

"സംഭവം പൂർണ്ണമായും ആസൂത്രിതമായിരുന്നു. ഭാര്യ ആരതിയെ ഞങ്ങൾ അറസ്റ്റ് ചെയ്തിട്ടുണ്ട്. മൂന്ന് കുട്ടികളുടെ അമ്മയായ അവർ കാമുകനൊപ്പം ചേർന്നാണ് ഈ ക്രൂരകൃത്യം നടത്തിയത്. നിലവിൽ ഒളിവിലുള്ള കാമുകൻ സബ്ലുവിനായുള്ള തിരച്ചിൽ ഊർജ്ജിതമാക്കിയതായി" കാൺപൂർ എഡിസിപി അഞ്ജലി വിശ്വകർമ പറഞ്ഞു.