ന്യൂഡൽഹി: ഇന്ത്യയിലെലെ ഇന്ധന വിപണിയിൽ വിപ്ലവകരമായ മാറ്റത്തിന് തുടക്കം കുറിച്ചുകൊണ്ട്, 2026 ഏപ്രിൽ 1 മുതൽ രാജ്യത്തുടനീളം 20% എത്തനോൾ കലർന്ന പെട്രോൾ (E20) വിതരണം ചെയ്യാൻ കേന്ദ്ര സർക്കാർ ഉത്തരവിട്ടു. വിദേശത്തു നിന്നുള്ള അസംസ്‌കൃത എണ്ണ ഇറക്കുമതി കുറയ്ക്കാനും പരിസ്ഥിതി മലിനീകരണം തടയാനും ലക്ഷ്യമിട്ടുള്ള ഈ നീക്കം രാജ്യത്തെ ദശലക്ഷക്കണക്കിന് വാഹന ഉടമകളെ നേരിട്ട് ബാധിക്കുന്ന ഒരു വിക്ഷയമാണ്.

എന്താണ് E20 പെട്രോൾ?

80 ശതമാനം പെട്രോളും 20 ശതമാനം എത്തനോളും ചേർന്ന മിശ്രിതമാണ് E20. കരിമ്പ്, ചോളം, കേടായ ധാന്യങ്ങൾ എന്നിവയിൽ നിന്നാണ് എത്തനോൾ ഉത്പാദിപ്പിക്കുന്നത്. 2022-ൽ നടപ്പിലാക്കിയ 10% മിശ്രിതത്തിന് (E10) പിന്നാലെയാണ് ഇപ്പോൾ അതിന്റെ ഇരട്ടി അളവിലേക്ക് രാജ്യം മാറിയിരിക്കുന്നത്.

നിങ്ങളുടെ വാഹനത്തെ എങ്ങനെ ബാധിക്കും?

ഈ മാറ്റം എല്ലാ വാഹനങ്ങൾക്കും ഒരുപോലെയല്ല ഗുണകരമാകുന്നത്. വാഹനത്തിന്റെ പഴക്കം അനുസരിച്ച് ഇതിന്റെ ആഘാതം വ്യത്യാസപ്പെടും.

പുതിയ വാഹനങ്ങൾ (2023-ന് ശേഷം നിർമ്മിച്ചവ):

ഏപ്രിൽ 2023-ന് ശേഷം വിപണിയിലെത്തിയ മിക്കവാറും എല്ലാ വാഹനങ്ങളും 'E20 Compatible' ആണ്. ഇവയിൽ പുതിയ ഇന്ധനം ഉപയോഗിക്കുന്നത് കൊണ്ട് എൻജിന് തകരാറുകൾ സംഭവിക്കില്ലെന്ന് മാത്രമല്ല, മികച്ച പെർഫോമൻസ് ലഭിക്കുമെന്നും പറയപ്പെടുന്നു.

പഴയ വാഹനങ്ങൾ (2023-ന് മുമ്പുള്ളവ):

2023-ന് മുമ്പ് നിർമ്മിച്ച വാഹനങ്ങൾ ഉപയോഗിക്കുന്നവർക്ക് ഈ നയം വലിയ ആശങ്കയുണ്ടാക്കുന്നവയാണ്. എത്തനോൾ സ്വാഭാവികമായും ഈർപ്പം ആഗിരണം ചെയ്യുന്ന ഒന്നായതിനാൽ (Hygroscopic), പഴയ എൻജിനുകളിലെ റബ്ബർ ഭാഗങ്ങൾ, പ്ലാസ്റ്റിക് സീലുകൾ, സ്റ്റീൽ ടാങ്കുകൾ എന്നിവയിൽ തുരുമ്പെടുക്കാനും തേയ്മാനം സംഭവിക്കാനും സാധ്യതയേറെയാണ്.

ഗുണങ്ങളും ദോഷങ്ങളും

• കാർബൺ ഉദ്‌വമനം കുറയുന്നതിനാൽ മലിനീകരണം കുറയ്ക്കാം.
• ഇറക്കുമതി കുറയുന്നതിലൂടെ വിദേശനാണ്യം ലാഭിക്കാം.
• എത്തനോൾ ഉത്പാദനത്തിനായി കാർഷിക വിളകൾ ഉപയോഗിക്കുന്നത് കർഷകരുടെ വരുമാനം വർദ്ധിപ്പിക്കും.

വെല്ലുവിളികൾ:

• എത്തനോളിന് പെട്രോളിനേക്കാൾ ഊർജ്ജസാന്ദ്രത കുറവായതിനാൽ മൈലേജിൽ 3-7% വരെ കുറവുണ്ടാകാൻ സാധ്യതയുണ്ട്.
• പഴയ വാഹനങ്ങളിൽ ഇന്ധന പമ്പുകൾ, ഇൻജെക്ടറുകൾ എന്നിവ പെട്ടെന്ന് കേടാകാൻ സാധ്യതയുണ്ട്.

ശ്രദ്ധിക്കേണ്ട കാര്യങ്ങൾ

• നിങ്ങളുടെ വാഹനത്തിന്റെ Owner's Manual പരിശോധിച്ച് അത് E20 ഇന്ധനത്തിന് അനുയോജ്യമാണോ എന്ന് ഉറപ്പുവരുത്തുക.
• പഴയ വാഹനമാണെങ്കിൽ എൻജിൻ ട്യൂൺ ചെയ്യാനും ഇന്ധന പൈപ്പുകൾ നവീകരിക്കാനുമുള്ള സംവിധാനങ്ങൾ ഇപ്പോൾ വിപണിയിൽ ലഭ്യമാണ്.

പെട്രോൾ പമ്പുകളിൽ ഇപ്പോൾ നൽകുന്ന ഇന്ധനത്തിന്റെ ഗുണനിലവാരം ബിഐഎസ് (BIS) മാനദണ്ഡങ്ങൾ അനുസരിച്ചുള്ളതാണെന്ന് ഉറപ്പുവരുത്താൻ എണ്ണക്കമ്പനികൾക്ക് കർശന നിർദ്ദേശം നൽകിയിട്ടുണ്ട്. രാജ്യം ഹരിത ഇന്ധനത്തിലേക്ക് മാറുമ്പോൾ വാഹന ഉടമകൾ കൂടുതൽ ജാഗ്രത പാലിക്കേണ്ടത് അത്യാവശ്യമാണ്.