മുളങ്കുന്നത്തുകാവ്: വിധി കാത്തുവച്ച മരണക്കയത്തില്‍ നിന്ന് 75കാരിയായ ലീലമ്മയെ ജീവിതത്തിലേക്ക് തിരികെക്കയറ്റിയത് അത്ഭുതകരമായി. മുളങ്കുന്നത്തുകാവ് മെഡിക്കല്‍ കോളജ് കാംപസിലെ 35 അടി താഴ്ചയുള്ള പാഴ്ക്കിണറ്റില്‍ വീണ ലീലമ്മയെ രക്ഷിച്ചത് അവര്‍ ധരിച്ചിരുന്ന സാരിയുടെ നിറമാണ്. കടും ചുവപ്പ് നിറമുള്ള സാരിയായിരുന്നു അവര്‍ ധരിച്ചത് . വെള്ളിയാഴ്ച രാത്രി വീണതാണെന്ന് കരുതുന്ന ഇവരെ ശനിയാഴ്ച രാവിലെയാണ് ഒരു വഴിയാത്രക്കാരന്‍ കാണുന്നത്.

നിറയെ പൊന്തക്കാട് മൂടിക്കിടന്ന ജലസംഭരണിയിലേക്ക് ആരും നോക്കാന്‍ പോലും സാധ്യതയില്ലായിരുന്നു. എന്നാല്‍ കാടിനിടയില്‍ തെളിഞ്ഞുനിന്ന കടും ചുവപ്പും പച്ചയും നിറങ്ങള്‍ കണ്ട വഴിയാത്രക്കാരന്‍ സംശയം തോന്നി ചെന്നു നോക്കിയതാണ് ലീലമ്മയുടെ ജീവന്‍ രക്ഷിക്കാന്‍ കഴിഞ്ഞത്. ഉടന്‍ തന്നെ മെഡിക്കല്‍ കോളജ് എസ്.ഐ ആര്‍ രാജേഷും സംഘവും സ്ഥലത്തെത്തുകയും ലീലാമ്മയെ രക്ഷിക്കാന്‍ കയര്‍ കെട്ടി താഴെയിറങ്ങുകയും ലീലമ്മയെ പൊലിസ് പുറത്തെത്തിക്കുകയുമായിരുന്നു.

വീഴ്ചയുടെ ആഘാതത്തിലും 'രക്ഷിക്കണേ' എന്ന നിലവിളിയോടെ അവര്‍ പൊലിസിനെ വരവേറ്റു. 20 വര്‍ഷമായി ഉപയോഗശൂന്യമായി കിടക്കുന്ന ഈ കുഴിയിലേക്ക് കാല്‍ വഴുതി വീണതാണെന്നാണ് ലീലമ്മ പറയുന്നത്. പൊന്തക്കാട്ടിലേക്ക് വീണതുകൊണ്ട് വലിയ പരിക്കേല്‍ക്കാതെ രക്ഷപ്പെട്ടു. രണ്ടു ദിവസം മുമ്പ് വീട്ടില്‍ നിന്നും കാണാതായ ലീലമ്മയെ തിരയുകയായിരുന്നു ബന്ധുക്കള്‍. ചാവക്കാട് പൊലിസ് സംഘവും നാട്ടുകാരും ചേര്‍ന്നാണ് ഈ സാഹസിക രക്ഷാപ്രവര്‍ത്തനം നടത്തിയത്.

Leela, a 75-year-old woman who fell into a deep abandoned water tank at Mulankunnathukavu Medical College, was miraculously rescued after a passerby spotted the bright colors of her red saree through dense bushes.