തിരുവനന്തപുരം: കണ്ണൂര്‍ അഞ്ചരക്കണ്ടി മെഡിക്കല്‍ കോളജില്‍ ഒന്നാം വര്‍ഷ ബി.ഡി.എസ് വിദ്യാര്‍ഥിയായ നിതിന്‍ രാജ് അനുഭവിച്ചത് കൊടിയ മാനസിക പീഡനങ്ങളെന്ന് ബന്ധുക്കള്‍. അധ്യാപകരില്‍ നിന്ന് നിതിന് കൊടിയ ജാതി അധിക്ഷേപം നേരിടേണ്ടി വന്നതായി ബന്ധുക്കള്‍ ചൂണ്ടിക്കാട്ടുന്നു.

കോളജിലെ അധ്യാപകരില്‍ നിന്ന് നിതിന് ഗുരുതരമായ മാനസിക പീഡനം നേരിടേണ്ടി വന്നിരുന്നതായി സഹോദരി നിഖിത ചൂണ്ടിക്കാട്ടുന്നു. 'അവര്‍ അവനെ 'തെരുവ് പട്ടി' എന്നാണ് വിളിച്ചിരുന്നതെന്ന് അവര്‍ പറയുന്നു. പുഴുത്ത പട്ടിയെന്നും പേപ്പട്ടിയെന്നും വരെ വിളിച്ചു. എഴുത്തും വായനയും അറിയില്ലെന്ന് പറഞ്ഞ് നിരന്തരം പരിഹസിച്ചു' ചൂണ്ടിക്കാട്ടി. ജാതിയുടെയും നിറത്തിന്റേയും പേരില്‍ നിതിന്‍ അധിക്ഷേപം നേരിട്ടതായും അവര്‍ കൂട്ടിച്ചേര്‍ത്തു. 

ALSO READ: 'കൊലക്കളത്തിലേക്ക് അയച്ചല്ലോ എന്റെ മകനെ'; അഞ്ചരക്കണ്ടിയില്‍ പിടഞ്ഞുവീണ നിതിന്‍രാജിന് നാടിന്റെ കണ്ണീര്‍ വിട

ക്ലാസില്‍ വെച്ച് നിതിന്റെ ഉത്തരക്കടലാസുകള്‍ മറ്റ് വിദ്യാര്‍ഥികള്‍ക്ക് കൈമാറി അധ്യാപകന്‍ പരസ്യമായി പരിഹസിച്ചിട്ടുണ്ട്.  ഈ സമയത്ത് നിതിനെ നോക്കി ചിരിക്കാന്‍ മറ്റ് വിദ്യാര്‍ഥികളെ ഇയാള്‍ നിര്‍ബന്ധിച്ചു. കളിയാക്കുമ്പോള്‍ ചിരിക്കാത്ത കുട്ടികളെ അധ്യാപകന്‍ മര്‍ദിച്ചിരുന്നതായും സഹോദരി ചൂണ്ടിക്കാട്ടി. 

ഹോസ്റ്റലിലും നിതിന്‍ കടുത്ത വിവേചനം അനുഭവിച്ചെന്നും കുടുംബം പറയുന്നു. പനി വന്ന സമയത്ത് നിതിനെ ഹോസ്റ്റല്‍ മുറിയില്‍ നിന്ന് മാറ്റി സിക്ക് റൂമില്‍ ഒറ്റക്ക് പാര്‍പ്പിച്ചിരുന്നു. നിതിനെ ഹോസ്റ്റലില്‍ നിര്‍ത്താന്‍ അധികൃതര്‍ക്ക് താത്പര്യമില്ലായിരുന്നു. ഈ അധ്യാപകനില്‍ നിന്ന് മറ്റ് ചില വിദ്യാര്‍ഥികള്‍ക്കും സമാനമായ ദുരനുഭവങ്ങള്‍ ഉണ്ടായിട്ടുണ്ടെന്നും അവര്‍ വ്യക്തമാക്കി.

നിതിന്റെ മരണത്തിലും അവര്‍ ദുരൂഹത ആരോപിച്ചു.  മെഡിക്കല്‍ കോളജ് ആശുപത്രി കെട്ടിടത്തിന് മുകളില്‍ നിന്നാണ് നിതിന്‍ താഴേക്ക് വീണത്. എന്നാല്‍ അവന് അവിടെ പോകേണ്ട യാതൊരു സാഹചര്യവും ഉണ്ടായിരുന്നില്ല. കെട്ടിടത്തില്‍ നിന്ന് ചാടി ജീവനൊടുക്കിയതല്ല, മറിച്ച് അധ്യാപകര്‍ തള്ളിയിട്ടതാണോ എന്ന് സംശയിക്കുന്നതായും അവര്‍ ആരോപിച്ചു. വെള്ളിയാഴ്ചയാണ് കോളജ് കെട്ടിടത്തിന് മുകളില്‍ നിന്ന് വീണ് നിതിന്‍ മരണപ്പെട്ടത്. 

മരിക്കുന്നതിന്റെ തലേദിവസം രാത്രി പതിനൊന്നര വരെ നിതിന്‍ വീട്ടുകാരുമായി വിഡിയോ കോളില്‍ വളരെ സന്തോഷത്തോടെ സംസാരിച്ചിരുന്നുവെന്ന് ബന്ധുക്കള്‍ പറയുന്നു. യാതൊരുവിധത്തിലുള്ള മാനസിക പ്രയാസങ്ങളും അവനില്ലായിരുന്നു. നിതിന്‍ ഒരിക്കലും ആത്മഹത്യ ചെയ്യില്ലെന്നും, മരിക്കുന്ന അന്ന് നാട്ടിലേക്ക് വരാന്‍ അവന്‍ ടിക്കറ്റ് എടുത്തിരുന്നതായും സഹോദരി ഭര്‍ത്താവ് അശോക് കുമാര്‍ മാധ്യമങ്ങളോട് പറഞ്ഞു.

പോസ്റ്റ്മോര്‍ട്ടത്തിന് ശേഷം മൃതദേഹം തിരുവനന്തപുരത്തെ വീട്ടിലെത്തിച്ചു. ജാതി അധിക്ഷേപമാണ് മരണത്തിന് കാരണമെന്ന കുടുംബത്തിന്റെ പരാതിയെ തുടര്‍ന്ന് രണ്ട് അധ്യാപകരെ കോളജ് മാനേജ്മെന്റ് സസ്‌പെന്‍ഡ് ചെയ്തിരുന്നു. 
 
സംഭവവുമായി ബന്ധപ്പെട്ട് കണ്ണൂര്‍ ചക്കരക്കല്‍ പൊലിസില്‍ കുടുംബം പരാതി നല്‍കിയിട്ടുണ്ട്. അന്വേഷണം പുരോഗമിക്കുകയാണ്. 

family alleges severe mental harassment and caste abuse led to death of bds student in kannur medical college probe underway after suspicious fall