ബാഴ്‌സലോണ: ഗസ്സയിലേക്ക് വീണ്ടും ഫ്‌ലോട്ടില്ലകള്‍. ഇസ്‌റാഈല്‍ ഏര്‍പ്പെടുത്തിയ ഉപരോധം മറികടക്കാനും ദുരിതബാധിതര്‍ക്ക് മാനുഷിക സഹായങ്ങള്‍ എത്തിക്കാനുമായി ഗ്ലോബല്‍ സുമൂദ് ഫ്‌ലോട്ടില്ലയുടെ (ജി.എസ്.എഫ്) രണ്ടാമത് നാവിക ദൗത്യം സ്‌പെയിനിലെ ബാഴ്‌സലോണയില്‍ നിന്ന് ഞായറാഴ്ച യാത്ര തിരിച്ചു. അന്താരാഷ്ട്ര ആക്ടിവിസ്റ്റുകളുടെയും സന്നദ്ധ സംഘടനകളുടെയും നേതൃത്വത്തിലാണ് യാത്ര.

2025 സെപ്റ്റംബറില്‍ നടന്ന ആദ്യ ദൗത്യത്തേക്കാള്‍ വിപുലമാണ് ഇത്തവണത്തേത്.  എഴുപത് രാജ്യങ്ങളില്‍ നിന്നുള്ള ആയിരത്തോളം സന്നദ്ധ പ്രവര്‍ത്തകരാണ് യാത്രയിലുള്ളത്.  എഴുപതോളം ബോട്ടുകളും ഈ ദൗത്യത്തിനായി ക്രമീകരിച്ചിരിക്കുന്നു.  ഗസ്സയുടെ ദുരിതത്തിലേക്ക് ലോകശ്രദ്ധ തിരിക്കാനും കടല്‍ മാര്‍ഗവും കരമാര്‍ഗവും മാനുഷിക ഇടനാഴികള്‍ തുറക്കാന്‍ സമ്മര്‍ദ്ദം ചെലുത്താനും ലക്ഷ്യമിട്ടുള്ള യാത്രയാണിതെന്ന് സംഘാടകര്‍ വ്യക്തമാക്കി. 

ALSO READ: ഇറാന്‍-യു.എസ് വെടിനിര്‍ത്തല്‍ ചര്‍ച്ച പരാജയം?; ധാരണയില്‍ എത്തിയിട്ടില്ലെന്ന് വൈസ് പ്രസിഡന്റ് ജെ.ഡി വാന്‍സ്, യു.എസ് സംഘം മടങ്ങുന്നു 
 
'ഗസ്സയില്‍ നടക്കുന്ന കാര്യങ്ങളിലെ അന്താരാഷ്ട്ര പങ്കാളിത്തത്തെ അപലപിക്കുക, ഉത്തരവാദിത്തം ആവശ്യപ്പെടുക, കടല്‍ വഴിയും കര വഴിയും ഒരു മാനുഷിക ഇടനാഴി തുറക്കുക' എന്നിവയാണ് യാത്രയുടെ പ്രധാന ലക്ഷ്യമെന്ന് ഫ്‌ലോട്ടില്ല വക്താവ് പാബ്ലോ കാസ്റ്റില്ല പ്രസ്താവിച്ചു. ഇറാനും ലെബനനും ഉള്‍പ്പെട്ട പ്രാദേശിക സംഘര്‍ഷങ്ങള്‍ക്കിടയില്‍ ഗസ്സയിലെ സാഹചര്യം അവഗണിക്കപ്പെടുന്നതില്‍ കാസ്റ്റില്ല ആശങ്ക പ്രകടിപ്പിച്ചു.

'ഇസ്‌റാഈല്‍ ഗസ്സയിലെ ഉപരോധം ശക്തമാക്കി, സഹായത്തിനുള്ള പ്രവേശനം നിയന്ത്രിച്ചു, കുടിയേറ്റ കേന്ദ്രങ്ങള്‍ വിപുലീകരിച്ചു, ഭൂമി കണ്ടുകെട്ടല്‍ ത്വരിതപ്പെടുത്തി,' അദ്ദേഹം പറഞ്ഞു.

 ഗ്രീന്‍പീസ്, ഓപ്പണ്‍ ആംസ് തുടങ്ങിയ പ്രമുഖ സംഘടനകളും ബാഴ്‌സലോണ മുനിസിപ്പാലിറ്റിയും ഈ നീക്കത്തിന് പിന്തുണ പ്രഖ്യാപിച്ചിട്ടുണ്ട്.

ALSO READ: ഒരു അമേരിക്കൻ കപ്പലും ഹോർമുസ് കടലിടുക്ക് കടന്നിട്ടില്ല; ട്രംപിന്റെ അവകാശവാദം തള്ളി ഇറാൻ; ഇസ്‌ലാമാബാദിൽ നിർണ്ണായക ചർച്ചകൾ തുടരുന്നു

സംഘത്തിന്റെ ആദ്യ ശ്രമം അന്താരാഷ്ട്ര സമുദ്രാതിര്‍ത്തിയില്‍ വെച്ച് തടയപ്പെടുകയും പങ്കെടുത്തവരെ തടങ്കലിലാക്കി നാടുകടത്തുകയും ചെയ്തിരുന്നു. നിയമവിരുദ്ധമായ ഇടപെടലായാണ് സംഘാടകരും അന്താരാഷ്ട്ര സമൂഹവും  ഇതിനെ വിശേഷിപ്പിച്ചത്. ഗസ്സ തീരത്ത് നിന്ന് ഏകദേശം 70 നോട്ടിക്കല്‍ മൈല്‍ (130 കിലോമീറ്റര്‍) അകലെ വെച്ച് ഇസ്‌റാഈലി നാവിക സേന ബോട്ടുകളില്‍ കയറി, ആശയവിനിമയം വിച്ഛേദിക്കുകയും തത്സമയ സംപ്രേക്ഷണം തടസ്സപ്പെടുത്തുകയും ചെയ്തിരുന്നു. അതേസമയം, നിയമത്തിനുള്ളില്‍ നിന്നാണ് തങ്ങള്‍ പ്രവര്‍ത്തിക്കുന്നതെന്ന് സംഘാടകര്‍ ഊന്നിപ്പറഞ്ഞു.
 
2007 മുതല്‍ ഇസ്‌റആഈല്‍ തുടരുന്ന ഉപരോധവും 2023 ഒക്ടോബറില്‍ ആരംഭിച്ച വംശഹത്യാ യുദ്ധവും ഗസ്സയിലെ അടിസ്ഥാന സൗകര്യങ്ങളെയും ജനജീവിതത്തെയും പൂര്‍ണ്ണമായും തകര്‍ത്തിരിക്കുകയാണ്.

international flotillas head to gaza with 1000 volunteers from 70 countries aiming to deliver aid amid ongoing humanitarian crisis