ദുബൈ: യുഎഇയുടെ വിവിധ ഭാഗങ്ങളിൽ അസ്ഥിരമായ കാലാവസ്ഥ തുടരുന്നു. അബുദബിയിൽ രാവിലെ മുതൽ ആകാശം മേഘാവൃതമാകുകയും ചിലയിടങ്ങളിൽ മിതമായ മഴ ലഭിക്കുകയും ചെയ്തു. ദുബൈയിൽ നേരിയ ചാറ്റൽ മഴയോടെ തുടങ്ങിയ അന്തരീക്ഷം നിലവിൽ ഇരുണ്ട നിലയിലാണുള്ളത്. വരും മണിക്കൂറുകളിൽ കനത്ത മഴ പെയ്യാൻ സാധ്യതയുണ്ടെന്ന് ദേശീയ കാലാവസ്ഥാ നിരീക്ഷണ കേന്ദ്രം (NCM) മുന്നറിയിപ്പ് നൽകി.

യുഎഇയുടെ തെക്കുപടിഞ്ഞാറൻ മേഖലയിൽ രൂപപ്പെട്ട മഴമേഘങ്ങൾ ഇപ്പോൾ വടക്കുകിഴക്കൻ ദിശയിലേക്ക് നീങ്ങിക്കൊണ്ടിരിക്കുകയാണ്. ഉച്ചയോടെ ഇവ ഗൾഫ് തീരപ്രദേശങ്ങളിൽ എത്തുമെന്നാണ് പ്രവചനം. അന്തരീക്ഷത്തിന്റെ ഉപരിതലത്തിലും മുകളിലുമായി രൂപപ്പെട്ട താഴ്ന്ന മർദ്ദ സംവിധാനങ്ങളാണ് മേഘങ്ങൾ ശക്തി പ്രാപിക്കാനും മഴയ്ക്കും അനുകൂല സാഹചര്യം ഒരുക്കുന്നത്.

കാലാവസ്ഥാ വ്യതിയാനത്തിന്റെ പശ്ചാത്തലത്തിൽ രാജ്യത്തിന്റെ വിവിധ ഭാ​ഗങ്ങളിൽ യെല്ലോ അലർട്ട് പ്രഖ്യാപിച്ചിട്ടുണ്ട്. ചിലയിടങ്ങളിൽ ശക്തമായ ഇടിയോടു കൂടിയ മഴയ്ക്കും സാധ്യതയുണ്ട്. മഴ പെയ്യുന്നതോടെ രാജ്യത്തെ താപനിലയിൽ ഗണ്യമായ കുറവുണ്ടാകുമെന്നും റിപ്പോർട്ടുകൾ സൂചിപ്പിക്കുന്നു. കൂടാതെ, ശക്തമായ കാറ്റ് വീശാൻ സാധ്യതയുള്ളതിനാൽ പൊടിപടലങ്ങൾ ഉയരാനും കാഴ്ചപരിധി കുറയാനും ഇടയുണ്ട്.

ALSO READ: യുവതിയുടെ സ്വകാര്യ ദൃശ്യങ്ങൾ പകർത്തി ബ്ലാക്ക്‌മെയിൽ ചെയ്തു; ഷിപ്പിംഗ് കമ്പനി ഉടമയെ നാടുകടത്താൻ ഉത്തരവിട്ട് യുഎഇ കോടതി

സുരക്ഷാ മുൻകരുതലിന്റെ ഭാഗമായി താമസക്കാർ അതീവ ജാഗ്രത പാലിക്കണമെന്ന് ആഭ്യന്തര മന്ത്രാലയം നിർദ്ദേശിച്ചു. അനാവശ്യ യാത്രകൾ ഒഴിവാക്കാനും വാഹനം ഓടിക്കുന്നവർ കുറഞ്ഞ വേഗതയിൽ ലോ-ബീം ഹെഡ്‌ലൈറ്റുകൾ ഉപയോഗിക്കാനും അധികൃതർ ആവശ്യപ്പെട്ടു. വെള്ളപ്പൊക്കത്തിന് സാധ്യതയുള്ള താഴ്ന്ന പ്രദേശങ്ങളിൽ നിന്നും വാദികളിൽ നിന്നും വിട്ടുനിൽക്കണമെന്നും കർശന നിർദ്ദേശമുണ്ട്.

ഔദ്യോഗിക ചാനലുകൾ വഴിയുള്ള കാലാവസ്ഥാ അപ്‌ഡേറ്റുകൾ മാത്രം വിശ്വസിക്കണമെന്നും കിംവദന്തികൾ പ്രചരിപ്പിക്കരുതെന്നും ദേശീയ കാലാവസ്ഥാ കേന്ദ്രം അറിയിച്ചു. മാർച്ച് അവസാന വാരത്തിൽ യുഎഇയിൽ ഉണ്ടായ റെക്കോർഡ് മഴയുടെ പശ്ചാത്തലത്തിൽ, മുൻകരുതൽ നടപടികൾ കർശനമാക്കാനാണ് അധികൃതരുടെ തീരുമാനം.

the uae has issued a yellow alert in abu dhabi and dubai as heavy rain is expected. authorities urge residents to stay cautious and follow safety guidelines during unstable weather conditions.