കോവളം: ടൂറിസ്റ്റ് കേന്ദ്രങ്ങളിലും ബീച്ചിലും കഞ്ചാവ് വില്‍പന നടത്തുന്ന സംഘത്തിലെ പ്രധാനിയെ കോവളം പൊലിസ് അറസ്റ്റ് ചെയ്തു.
നേമം മനുകുലാദിച്ചമംഗലം സ്വദേശിയും ഇപ്പോള്‍ കാരയ്ക്കാമണ്ഡപം പെട്രോള്‍ പമ്പിന് സമീപം മുസ്ലീം കോളനിയില്‍ താമസിച്ചുവരുന്ന അനീഷാ (19) ണ് പിടിയിലായത്. കോവളം ബീച്ച് ഭാഗത്ത് കഞ്ചാവ് ബീഡി വലിച്ചുകൊണ്ടുനിന്ന കുട്ടികളെ ചുറ്റിപ്പറ്റി നടത്തിയ അന്വേഷണത്തിനൊടുവിലാണ് വിഴിഞ്ഞം സി.ഐ. ബിജു കോവളം എസ് ഐ.ജി അജയകുമാര്‍, ക്രൈം എസ് ഐ.എഫ് അജയകുമാര്‍, എസ് ഐ പിയൂസ്, ദിനേശ് എന്നിവരടങ്ങിയ സംഘം തന്ത്രപൂര്‍വ്വം പ്രതിയെ അറസ്റ്റ് ചെയ്തത്. കഞ്ചാവ് കടത്തിലെ മറ്റ് കണ്ണികളെക്കുറിച്ചുള്ള വിവരം ലഭിച്ചതായും അന്വേഷണം ഊര്‍ജിതമാക്കിയതായും എസ്.ഐ പറഞ്ഞു. കോടതിയില്‍ ഹാജരാക്കിയ പ്രതിയെ റിമാന്റ് ചെയ്തു.