തിരുവനന്തപുരം: തലസ്ഥാനത്ത് ഇന്നു പുലര്‍ച്ചെ പാളയത്തുള്ള പെട്രോള്‍ പമ്പില്‍ പുലര്‍ച്ചെ നടന്ന മോഷണത്തില്‍ സിനിമയെ വെല്ലുന്ന തരത്തിലുള്ള ട്വിസ്റ്റ്. പമ്പിലെ ഓഫീസില്‍ നിന്ന് ഒന്നര ലക്ഷം രൂപയുമായി കടക്കുകയായിരുന്ന കള്ളന്‍, സിസിടിവി ദൃശ്യങ്ങള്‍ നശിപ്പിക്കാനായി എടുത്തു കൊണ്ടുപോയത് മോഡവും. ഹാര്‍ഡ് ഡിസ്‌ക് ആണെന്ന് കരുതി എടുത്ത ഉപകരണം മോഡമാണെന്ന് തിരിച്ചറിഞ്ഞ കള്ളന്‍ അത് പമ്പിന് പുറത്തെ ശുചിമുറിക്ക് മുകളിലേക്ക് വലിച്ചെറിയുകയും ചെയ്തു.

പുലര്‍ച്ചെയാണ് മോഷണം നടക്കുന്നത്, വലിയ ആസൂത്രണത്തോടെ എത്തിയ കള്ളന്‍ സ്‌ക്രൂ ഡ്രൈവര്‍ ഉപയോഗിച്ച് ഓഫീസിന്റെ വാതില്‍ കുത്തിത്തുറക്കുകയും അകത്തുള്ള അലമാര തകര്‍ത്ത് അതിലുണ്ടായിരുന്ന ഒന്നര ലക്ഷം രൂപയും കൈക്കലാക്കി. കഴിഞ്ഞ രണ്ട് ദിവസത്തെ കളക്ഷന്‍ തുകയാണ് നഷ്ടപ്പെട്ടതെന്നാണ് ജീവനക്കാര്‍ പറഞ്ഞത്.

മുറിയില്‍ സിസിടിവി ഉണ്ടെന്ന് കള്ളന് കൃത്യമായി അറിയാമായിരുന്നു. അതുകൊണ്ട് തന്നെ മോഷണം കഴിഞ്ഞിറങ്ങുമ്പോള്‍ ദൃശ്യങ്ങള്‍ അടങ്ങിയ ഹാര്‍ഡ് ഡിസ്‌ക് കൊണ്ടുപോകാന്‍ ഇയാള്‍ തീരുമാനിക്കുകയും ചെയ്തു. എന്നാല്‍ ഇരുട്ടില്‍ ഹാര്‍ഡ് ഡിസ്‌കിന് പകരം മോഡമാണ് കള്ളന്‍ കൊണ്ടുപോയത്. അതുകൊണ്ട് തന്നെ മോഷണത്തിന്റെ കൃത്യമായ ദൃശ്യങ്ങളും പൊലിസിനു ലഭിച്ചു. മുഖം മറയ്ക്കാതെയാണ് ഇയാള്‍ മോഷണം നടത്തിയത്.

ALSO READ: ആശാ ഭോസ്‌ലെ ഇനി ഓര്‍മ; സംഗീതസാമ്രാജ്യത്തിലെ വെള്ളിനക്ഷത്രത്തിനു രാജ്യം ഇന്ന് വിട നല്‍കും

മോഡം ഉപയോഗശൂന്യമെന്ന് കണ്ട് ശുചിമുറിയുടെ മുകളിലേക്ക് വലിച്ചെറിഞ്ഞ ശേഷം വളരെ കൂളായി ഒരു ഓട്ടോറിക്ഷ പിടിച്ചാണ് കള്ളന്‍ സ്ഥലം വിട്ടത്. പൊലിസ് സംഭവസ്ഥലത്തെത്തി സിസിടിവി ദൃശ്യങ്ങള്‍ ശേഖരിച്ച് അന്വേഷണം തുടങ്ങിയിട്ടുണ്ട്. കള്ളന്റെ മുഖം വ്യക്തമായതിനാല്‍ പ്രതി ഉടന്‍ വലയിലാകുമെന്നാണ് സൂചന.

A thief who broke into a petrol pump at Palayam, Thiruvananthapuram, and stole ₹1.5 lakh, mistakenly took away the internet modem instead of the CCTV hard drive in an attempt to destroy evidence.