പാലാ: സഭാ നേതൃത്വം രാഷ്ട്രീയത്തില്‍ ഇടപെടുന്നതിനെതിരെ കഴിഞ്ഞ ദിവസം ബിജെപി നേതാവ് പി.സി ജോര്‍ജ് നടത്തിയ പരാമര്‍ശത്തില്‍ രൂക്ഷ വിമര്‍ശനവുമായി പാലാ രൂപതാധ്യക്ഷന്‍ മാര്‍ ജോസഫ് കല്ലറങ്ങാട്ട്. ഭീഷണിയുടെ സ്വരം വിലപ്പോകില്ലെന്ന് അദ്ദേഹം തുറന്നടിച്ചു. ആരും തങ്ങളെ പേടിപ്പിക്കേണ്ടതില്ലെന്നും അദ്ദേഹം വ്യക്തമാക്കി. മെത്രാന്മാരും വൈദികരും എപ്പോഴും നിഷ്പക്ഷരായിരിക്കണം എന്ന് ആര്‍ക്കും പറയാനാകില്ല. പരസ്യമായി തന്നെ വോട്ട് ചോദിക്കാന്‍ സഭക്ക് അവകാശമുണ്ടെന്നും ബിഷപ്പ് ചൂണ്ടിക്കാട്ടി. 

'ഭീഷണിയുടെ സ്വരം വിലപോകില്ല, അത് നമ്മള്‍ തിരിച്ചറിയണം. അങ്ങനെ ആരും പേടിപ്പിക്കേണ്ടതില്ല. എല്ലാ സമയവും മെത്രാന്മാരും വൈദികരും ന്യൂട്രല്‍ ആയിരിക്കണമെന്ന് പറയാന്‍ സാധിക്കില്ല. മിണ്ടാപ്രാണികള്‍ ആയിരിക്കണം എന്നാണ് അങ്ങനെ പറയുന്നതിന്റെ അര്‍ഥം. ഈ ജനാധിപത്യ സംവിധാനത്തില്‍ അത് നടക്കുമെന്ന് ഞാന്‍ കരുതുന്നില്ല' അദ്ദേഹം പറഞ്ഞു. രഹസ്യമായിട്ടല്ല, പരസ്യമായി തന്നെ വോട്ട് ചോദിക്കാന്‍ നമുക്ക് അവകാശമില്ലേ? എന്നും അദ്ദേഹം ചോദിച്ചു.

ALSO READ: നിതിന്‍ രാജിന്റെ മരണം: ലോണ്‍ ആപ്പുകാരുടെ ഭീഷണി സാധ്യത തള്ളാതെ പൊലിസ് 

പൊതുരംഗത്ത് പ്രവര്‍ത്തിക്കുന്നവര്‍ മാന്യതയുടെ അതിര്‍വരമ്പുകള്‍ ലംഘിക്കുകയാണെന്ന് കുറ്റപ്പെടുത്തിയ ബിഷപ്പ്  ചില രാഷ്ട്രീയ നേതാക്കള്‍ മതനേതാക്കളെക്കുറിച്ച് എന്തും വിളിച്ചുപറയുകയാണെന്നും ചൂണ്ടിക്കാട്ടി.  വിമര്‍ശനങ്ങള്‍ മാന്യമായ ഭാഷയിലായിരിക്കണമെന്നും അദ്ദേഹം തുറന്നടിച്ചു.  സഭയുടെ മെത്രാന്മാരുടെ മുറികള്‍ക്ക് മുന്നില്‍ വരെ ഭീഷണിയുടെ സ്വരമെത്തിയെന്നും അദ്ദേഹം കൂട്ടിച്ചേര്‍ത്തു.

സഭാ നേതൃത്വം രാഷ്ട്രീയത്തില്‍ ഇടപെടുന്നതിനെതിരെ കഴിഞ്ഞ ദിവസങ്ങളില്‍ പി.സി ജോര്‍ജ് രൂക്ഷവിമര്‍ശനമാണ് ഉന്നയിച്ചത്.  ഇതിനാണ് പാലാ ബിഷപ്പിന്റെ മറുപടി. നേരത്തെ, മറ്റൊരു ബിഷപ്പിന്റെ ജന്മദിനവുമായി ബന്ധപ്പെട്ട് പാലാ ബിഷപ്പ് ഹൗസില്‍ എത്തിയ പി.സി ജോര്‍ജ് ബിഷപ്പ് ഹൗസിന് മുന്നില്‍ വെച്ച് മാധ്യമങ്ങളോട് സംസാരിച്ചതിലും സഭാ നേതൃത്വത്തിന് കടുത്ത അതൃപ്തിയുണ്ടായിരുന്നു.  

the pala diocese bishop indirectly criticized P. C. George, stating that the tone of threats will not be accepted.