ദുബൈ: യുഎഇയും ചൈനയും തമ്മിലുള്ള സാമ്പത്തിക പങ്കാളിത്തം പുതിയ ഉയരങ്ങളിലേക്ക്. വ്യാപാരം, നിക്ഷേപം, സാങ്കേതികവിദ്യ തുടങ്ങി വിവിധ മേഖലകളിൽ സഹകരണം ഉറപ്പാക്കുന്ന 24 പുതിയ കരാറുകളിൽ ഇരുരാജ്യങ്ങളും ഒപ്പുവച്ചു. അബുദബി കിരീടാവകാശി ശൈഖ് ഖാലിദ് ബിൻ മുഹമ്മദ് ബിൻ സായിദ് അൽ നഹ്യാന്റെ ചൈന സന്ദർശനത്തോടനുബന്ധിച്ച് ബീജിംഗിൽ നടന്ന യുഎഇ-ചൈന ബിസിനസ് പ്രമോഷൻ കോൺഫറൻസിലാണ് ഇതുസംബന്ധിച്ച പ്രഖ്യാപനമുണ്ടായത്.

യുഎഇയും ചൈനയും തമ്മിലുള്ള എണ്ണയിതര വ്യാപാരം 2025-ൽ ആദ്യമായി 100 ബില്യൺ ഡോളർ എന്ന നാഴികക്കല്ല് പിന്നിട്ടിരുന്നു. മുൻവർഷത്തെ അപേക്ഷിച്ച് 24.5% വളർച്ചയോടെ 111.5 ബില്യൺ ഡോളറിലെത്തിയാണ് റെക്കോർഡ് നേട്ടം കൈവരിച്ചത്. ബന്ധം വളർച്ചയുടെ പുതിയ ഘട്ടത്തിലേക്ക് കടന്നതായും ഇരുരാജ്യങ്ങളുടെയും താൽപ്പര്യങ്ങൾ സംരക്ഷിക്കുന്ന സുസ്ഥിരമായ സാമ്പത്തിക ഫലങ്ങൾ കൈവരിക്കുകയാണ് ലക്ഷ്യമെന്നും വിദേശ വ്യാപാര മന്ത്രി ഡോ. താനി ബിൻ അഹമ്മദ് അൽ സെയൂദി പറഞ്ഞു.

ALSO READ: യുഎഇയിൽ വിദൂര പഠനം മെയ് 1 വരെ നീട്ടിയെന്ന വാർത്ത വ്യാജം; ഔദ്യോഗിക അറിയിപ്പുകൾ ശ്രദ്ധിക്കാൻ മന്ത്രാലയത്തിന്റെ നിർദ്ദേശം

കരാറിലെ പ്രധാന മേഖലകൾ

'ദർശനത്തിൽ നിന്ന് മൂല്യത്തിലേക്ക്' (From Vision to Value) എന്ന പ്രമേയത്തിൽ നടന്ന സമ്മേളനത്തിൽ താഴെ പറയുന്ന മേഖലകളിലാണ് സഹകരണം ഉറപ്പാക്കിയത്:

• നിക്ഷേപവും നവീകരണവും: പുതിയ നിക്ഷേപ അവസരങ്ങളും സാങ്കേതിക വിദ്യകളും പര്യവേക്ഷണം ചെയ്യും.
• ലോജിസ്റ്റിക്സും ഊർജ്ജവും: ചരക്ക് നീക്കം സുഗമമാക്കുന്നതിനും ഊർജ്ജ മേഖലയിലെ പങ്കാളിത്തം വർദ്ധിപ്പിക്കുന്നതിനും മുൻഗണന.
• എണ്ണയിതര വ്യാപാരം: ചൈനയിൽ നിന്നുള്ള ഇറക്കുമതിയും ചൈനയിലേക്കുള്ള കയറ്റുമതിയും കൂടുതൽ വിപുലീകരിക്കും.

തന്ത്രപരമായ പങ്കാളിത്തം

യുഎഇയുടെ ഏറ്റവും വലിയ വ്യാപാര പങ്കാളിയാണ് നിലവിൽ ചൈന. രാജ്യത്തിന്റെ മൊത്തം എണ്ണയിതര വ്യാപാരത്തിന്റെ 11 ശതമാനവും ചൈനയുമായാണ് നടക്കുന്നത്. അറബ് ലോകത്തേക്കും ആഫ്രിക്കൻ വിപണികളിലേക്കുമുള്ള ചൈനയുടെ പ്രധാന കവാടമായി ഇതിനകംതന്നെ യുഎഇ മാറിക്കഴിഞ്ഞു. പുതിയ കരാറുകൾ ഒപ്പുവച്ചതോടെ ഇരുരാജ്യങ്ങളിലെയും സ്വകാര്യ മേഖലയിലെ ബിസിനസുകൾക്ക് കൂടുതൽ അവസരങ്ങൾ ലഭിക്കുമെന്നാണ് പ്രതീക്ഷിക്കുന്നത്.

uae strengthens ties with china by signing 24 new agreements aimed at boosting trade, investment, and economic cooperation. the move is expected to accelerate growth across key sectors and deepen strategic partnership between the two nations.