കോട്ടയം: ഗാന്ധിനഗറില്‍ റിട്ടയേര്‍ഡ് ഡോക്ടറുടെ വീട്ടില്‍ അതിക്രമിച്ചുകയറിയ ജോലിക്കാരന്‍ കാര്‍ കത്തിക്കുന്നതിനിടെ ദേഹത്ത് തീ പടര്‍ന്ന് ഗുരുതരമായി പൊള്ളലേറ്റു മരിച്ചു. ചെങ്ങളം സ്വദേശി ചെല്ലപ്പന്‍ (84) ആണ് മരിച്ചത്. കോട്ടയം മെഡിക്കല്‍ കോളജ് എന്‍ഡോക്രൈനോളജി വിഭാഗം മുന്‍ മേധാവി ഡോ. സി.ആര്‍ ജയകുമാറിന്റെ ഗാന്ധിനഗറിലെ വീട്ടില്‍ തിങ്കളാഴ്ച രാവിലെ ഒന്‍പതോടെയായിരുന്നു സംഭവം.

14 വര്‍ഷമായി ഡോക്ടറുടെ വീട്ടില്‍ രാത്രികാല കാവല്‍ക്കാരനായിരുന്ന ചെല്ലപ്പന്‍ കഴിഞ്ഞ മാര്‍ച്ച് മാസത്തിലാണ് ജോലി നിര്‍ത്തുന്നത്. അന്ന് നല്‍കിയ തുകയെച്ചൊല്ലി ഡോക്ടറുമായി തര്‍ക്കമുണ്ടായിരുന്നു. ഇതിലുള്ള വൈരാഗ്യമാണ് ആക്രമണത്തിന് പ്രേരിപ്പിച്ചതെന്നാണ് പ്രാഥമിക നിഗമനം.

കന്നാസില്‍ പെട്രോളുമായെത്തിയ ചെല്ലപ്പന്‍ പോര്‍ച്ചിലിരുന്ന കാറിലേക്ക് അത് ഒഴിക്കുകയായിരുന്നു. ഈ സമയം അവിടെയുണ്ടായിരുന്ന മറ്റ് തൊഴിലാളികള്‍ ചെല്ലപ്പന്‍ കാര്‍ കഴുകുകയാണെന്നാണ് കരുതിയത്. എന്നാല്‍ പെട്ടെന്ന് തീ കൊളുത്തിയതോടെ കാറില്‍ നിന്നും ചെല്ലപ്പന്റെ ദേഹത്തേക്ക് തീ ആളിപ്പടരുകയായിരുന്നു.

95 ശതമാനത്തോളം പൊള്ളലേറ്റ ഇദ്ദേഹത്തെ ഉടന്‍ മെഡിക്കല്‍ കോളജ് ആശുപത്രിയിലെ തീവ്രപരിചരണ വിഭാഗത്തില്‍ പ്രവേശിപ്പിച്ചെങ്കിലും രാത്രി എട്ടരയോടെ മരണം സംഭവിക്കുകയായിരുന്നു. തീപിടിത്തത്തില്‍ കാര്‍ പൂര്‍ണമായും നശിച്ചു. ഗാന്ധിനഗര്‍ പൊലിസ് കേസെടുത്ത് അന്വേഷണം ആരംഭിച്ചു. മന്ത്രി വി.എന്‍ വാസവന്‍, കോട്ടയം ഡിവൈ.എസ്.പി എന്നിവര്‍ സ്ഥലം സന്ദര്‍ശിച്ചിരുന്നു.

An 84-year-old former security guard, Chellappan, died from severe burn injuries sustained while setting fire to a retired doctor's car in Kottayam, reportedly due to a dispute over his final settlement.