തിരുവനന്തപുരം: പ്രധാനമന്ത്രി പങ്കെടുത്ത ഔദ്യോഗിക ചടങ്ങിനിടെ മദ്യപിച്ച് ബഹളമുണ്ടാക്കിയ പൊലിസ് ഉദ്യോഗസ്ഥന് സസ്പെൻഷൻ. തിരുവനന്തപുരം മ്യൂസിയം പൊലിസ് സ്റ്റേഷനിലെ പ്രൊബേഷനറി എസ്ഐ കൃഷ്ണമോഹനെയാണ് സർവീസിൽ നിന്നും സസ്പെൻഡ് ചെയ്തത്. തിരുവനന്തപുരം സിറ്റി പൊലിസ് കമ്മീഷണറുടേതാണ് നടപടി.

സുരക്ഷാ വീഴ്ചയും അച്ചടക്ക ലംഘനവും

രാജ്യത്തിന്റെ പ്രധാനമന്ത്രി പങ്കെടുക്കുന്ന അതീവ സുരക്ഷാ പ്രാധാന്യമുള്ള യോഗത്തിനിടെയാണ് കൃഷ്ണമോഹൻ മദ്യപിച്ച് എത്തി ബഹളമുണ്ടാക്കിയത്. ഡ്യൂട്ടിയിലുണ്ടായിരുന്ന മറ്റ് ഉദ്യോഗസ്ഥരോടും ഇയാൾ മോശമായി പെരുമാറിയതായി റിപ്പോർട്ടുകളുണ്ട്. പൊലിസിന്റെ ഭാഗത്തുനിന്നുണ്ടായ ഗുരുതരമായ അച്ചടക്ക ലംഘനമായാണ് കമ്മീഷണർ ഈ സംഭവത്തെ വിലയിരുത്തിയത്.

മുൻപും 'കൈക്കരുത്ത്' കാട്ടിയ ഉദ്യോഗസ്ഥൻ

സസ്പെൻഷനിലായ കൃഷ്ണമോഹൻ ഇതിനു മുൻപും വിവാദങ്ങളിൽ ഉൾപ്പെട്ടിട്ടുള്ള വ്യക്തിയാണ്.ഡ്യൂട്ടിക്കിടെ കൊടുമൺ സിഐയെ കയ്യേറ്റം ചെയ്ത സംഭവത്തിൽ കൃഷ്ണമോഹൻ നേരത്തെ പ്രതിയായിരുന്നു.സിഐ നൽകിയ പരാതിയുടെ അടിസ്ഥാനത്തിൽ ഇയാൾക്കെതിരെ പൊലിസ് നേരത്തെ കേസെടുത്തിട്ടുണ്ട്.സംഭവത്തെക്കുറിച്ച് കൂടുതൽ അന്വേഷണം നടത്തി വരികയാണെന്ന് സിറ്റി പൊലിസ് അറിയിച്ചു.