തിരുവനന്തപുരം: നെടുമങ്ങാട് ചുള്ളിമാനൂരില്‍ ആളില്ലാത്ത വീട് കുത്തിത്തുറന്ന് കവര്‍ച്ച നടത്തി. ചുള്ളിമാനൂര്‍ സ്വദേശിയായ അനസിന്റെ വീട്ടില്‍ നിന്നാണ് 25 പവന്‍ സ്വര്‍ണം മോഷ്ടാക്കള്‍ കവര്‍ന്നത്. വീട്ടുകാര്‍ വിനോദയാത്രയ്ക്കായി ഊട്ടിയിലേക്ക് പോയ സമയത്തായിരുന്നു മോഷണം നടന്നത്.

ഊട്ടിയില്‍ നിന്നു യാത്ര കഴിഞ്ഞ് വീട്ടുകാര്‍ ഇന്ന് രാവിലെ തിരിച്ചെത്തിയപ്പോഴാണ് കവര്‍ച്ചാ വിവരം പുറത്തറിയുന്നത്. വീടിന്റെ മുന്‍വശത്തെ വാതില്‍ കുത്തിപ്പൊളിച്ച നിലയിലായിരുന്നു. അകത്ത് കയറി പരിശോധിച്ചപ്പോള്‍ ബെഡ്‌റൂമിലെ അലമാരയില്‍ സൂക്ഷിച്ചിരുന്ന സ്വര്‍ണാഭരണങ്ങള്‍ നഷ്ടപ്പെട്ടതായി കണ്ടെത്തുകയായിരുന്നു.

കവര്‍ച്ചയുടെ തെളിവുകള്‍ നശിപ്പിക്കുന്നതിനായി വീട്ടിലുണ്ടായിരുന്ന സിസിടിവി കാമറകളും മോഷ്ടാക്കള്‍ തകര്‍ത്തിട്ടുണ്ട്. വിദഗ്ധരായ മോഷ്ടാക്കളാണ് ഇതിന് പിന്നിലെന്നാണ് പ്രാഥമിക നിഗമനം. സംഭവത്തില്‍ അനസും കുടുംബവും നെടുമങ്ങാട് പൊലിസില്‍ പരാതി നല്‍കി. പൊലിസ് സ്ഥലത്തെത്തി ശാസ്ത്രീയ പരിശോധനകള്‍ ആരംഭിച്ചിട്ടുണ്ട്.

Thieves broke into a locked house in Chullimanoor, Nedumangad, and decamped with 25 sovereigns of gold while the family was on a trip to Ooty, after deliberately destroying the CCTV cameras.