ശ്രീകണ്ഠപുരം: വീട്ടില്‍ അതിക്രമിച്ചു കയറി മാനഭംഗപ്പെടുത്താന്‍ ശ്രമിച്ച അക്രമിയെ വീട്ടമ്മ നിലവിളക്കു കൊണ്ടു തലക്കടിച്ചു വിഴ്ത്തി. സംഭവത്തില്‍ ഗുരുതരമായി പരുക്കേറ്റ മരുതുംചാലിലെ ചെക്യാറ വീട്ടില്‍ മോഹനനെ (55) പരിയാരം മെഡിക്കല്‍ കോളജില്‍ പ്രവേശിപ്പിച്ചു.
വീട്ടമ്മയെ പരുക്കുകളോടേ തളിപ്പറമ്പിലെ ഗവ.ആശുപത്രിയിലും പ്രവേശിപ്പിച്ചു. 12ന് ഉച്ചയ്ക്ക് 1.30ന് പയ്യാവൂരിലെ മരുതുംചാലിലാണ് സംഭവം. മദ്യലഹരിയില്‍ എത്തിയ മോഹനന്‍ 61കാരിയെ കടന്നു പിടിക്കുകയായിരുന്നു. വീണ്ടും അക്രമിക്കാനെത്തിയ ഇയാളെ സമീപത്തുണ്ടായിരുന്ന നിലവിളക്കു കൊണ്ട് അടിച്ചു വീഴ്ത്തുകയായിരുന്നു. തലക്കും മുഖത്തും പരുക്കേറ്റ് രക്തം വാര്‍ന്നു കിടന്ന മോഹനനെ വിവരമറിഞ്ഞെത്തിയ നാട്ടുകാരാണ് ആശുപത്രിയിലെത്തിച്ചത്. സംഭവത്തില്‍ മോഹനനെതിരേ പയ്യാവൂര്‍ പൊലിസ് കേസെടുത്തു. വീട്ടമ്മയുടെ മൊഴിരേഖപ്പെടുത്തിയതായും നേരത്തെ നിരവധി കേസുകളില്‍ പ്രതിയാണ് ഇയാളെന്നും പയ്യാവൂര്‍ പൊലിസ് പറഞ്ഞു.