ചെന്നൈ: നിയമസഭാ തിരഞ്ഞെടുപ്പിൽ ജനവിധി തേടുന്ന തമിഴക വെട്രി കഴകം (TVK) അധ്യക്ഷൻ വിജയ് തന്റെ പ്രവർത്തനശൈലി വ്യക്തമാക്കി രംഗത്ത്. താൻ ജയിച്ചു വന്നാൽ മാസത്തിലൊരിക്കൽ മണ്ഡലത്തിൽ നേരിട്ടെത്തി ജനങ്ങളെ കാണുമെന്ന വിജയ്‌യുടെ പ്രഖ്യാപനം ടിവികെ പ്രവർത്തകർ ആവേശത്തോടെയാണ് ഏറ്റെടുത്തത്. ചെന്നൈ പെരമ്പൂർ, തിരുച്ചി കിഴക്ക് എന്നീ രണ്ട് മണ്ഡലങ്ങളിലാണ് വിജയ് മത്സരിക്കുന്നത്.

പ്രഖ്യാപനത്തിലെ പ്രധാന കാര്യങ്ങൾ:

"തമിഴ്‌നാടിന് ഞാൻ ആരായാലും എന്റെ മണ്ഡലത്തിലെ ജനങ്ങൾക്ക് ഞാൻ വെറുമൊരു എംഎൽഎ മാത്രമായിരിക്കും," വിജയ് വ്യക്തമാക്കി.മണ്ഡലത്തിലെ വോട്ടർമാർക്ക് തന്നെ നേരിട്ട് കാണാനും പരാതികൾ ബോധിപ്പിക്കാനും അവസരമുണ്ടാകും. ഇതിനായി മാസത്തിലൊരിക്കൽ മണ്ഡലത്തിൽ തങ്ങുമെന്നാണ് വിജയ് വാഗ്ദാനം ചെയ്തിരിക്കുന്നത്.വോട്ടെടുപ്പ് ദിനമായ ഏപ്രിൽ 23-ന് എല്ലാ വീടുകൾക്ക് മുന്നിലും പാർട്ടിയുടെ ചിഹ്നമായ 'വിസിൽ' കോലം വരയ്ക്കണമെന്നും വിജയ് അണികളോട് ആഹ്വാനം ചെയ്തു.

വിമർശനവുമായി രാഷ്ട്രീയ എതിരാളികൾ

വിജയ്‌യുടെ 'മാസത്തിലൊരിക്കൽ' സന്ദർശനത്തെ രാഷ്ട്രീയ ആയുധമാക്കുകയാണ് ഡിഎംകെയും എഐഎഡിഎംകെയും അടക്കമുള്ള കക്ഷികൾ.ഒരു എംഎൽഎ എപ്പോഴും മണ്ഡലത്തിൽ ഉണ്ടാകേണ്ട ആളാണെന്നും മാസത്തിലൊരിക്കൽ വരുന്നത് ഒരു 'വിസിറ്റിംഗ് പ്രൊഫസറുടെ' ജോലിയല്ലെന്നും എതിരാളികൾ പരിഹസിക്കുന്നു.സിനിമാ ഷൂട്ടിംഗിനിടയിലുള്ള ഒഴിവുസമയമാണോ ജനസേവനത്തിനായി മാറ്റിവെച്ചിരിക്കുന്നതെന്ന ചോദ്യവും സോഷ്യൽ മീഡിയയിൽ ഉയരുന്നുണ്ട്.

ഒരു കർഷകന് ആദ്യ പകർപ്പ് നൽകിക്കൊണ്ടാണ് വിജയ് ടിവികെയുടെ തിരഞ്ഞെടുപ്പ് പ്രകടനപത്രിക പ്രകാശനം ചെയ്തത്. കർഷകർക്കും യുവാക്കൾക്കും മുൻഗണന നൽകുന്ന വാഗ്ദാനങ്ങളാണ് പത്രികയിലുള്ളതെന്നാണ് സൂചന.