കൊച്ചി: ചികിത്സയ്ക്കായി ആശുപത്രിയിലേക്ക് കൊണ്ടുപോകാമെന്ന് വിശ്വസിപ്പിച്ച് വയോധികയെ എറണാകുളം സൗത്ത് ബസ് സ്റ്റാൻഡിൽ ഉപേക്ഷിച്ചു. ആലപ്പുഴ തോട്ടപ്പള്ളി സ്വദേശിനിയായ കമലാക്ഷിയെയാണ് ഭർത്താവും സഹോദരീ പുത്രനും ചേർന്ന് പെരുവഴിയിലാക്കിയത്. ഇന്നലെയായിരുന്നു മനസാക്ഷിയെ മരവിപ്പിക്കുന്ന ഈ സംഭവം നടന്നത്.

വീട്ടിൽ നിന്നും ആശുപത്രിയിലേക്ക് എന്ന വ്യാജേനയാണ് ബന്ധുക്കൾ ഇവരെ കൊച്ചിയിലെത്തിച്ചത്. തുടർന്ന് തിരക്കേറിയ ബസ് സ്റ്റാൻഡിൽ തനിച്ചാക്കി ഇവർ കടന്നുകളയുകയായിരുന്നു. സ്റ്റാൻഡിൽ അവശയായി കാണപ്പെട്ട വയോധികയെ ശ്രദ്ധയിൽപ്പെട്ട ഗാർഡ് ഡ്യൂട്ടിയിലുണ്ടായിരുന്ന ജീവനക്കാരനാണ് പൊലിസിൽ വിവരമറിയിച്ചത്. എറണാകുളം വനിതാ പൊലിസ് സ്റ്റേഷനിലെ ഉദ്യോഗസ്ഥർ സ്ഥലത്തെത്തി വയോധികയെ സുരക്ഷിത കേന്ദ്രത്തിലേക്ക് മാറ്റി. നിലവിൽ ഇവർ ഷെൽട്ടർ ഹോമിൽ സംരക്ഷണയിലാണ്.

വയോധികയ്ക്ക് ചെറിയ രീതിയിലുള്ള ഓർമ്മക്കുറവ് അനുഭവപ്പെടുന്നുണ്ട്. ഇവരെ ഉപേക്ഷിച്ചു കടന്നവരെ കണ്ടെത്താൻ ബസ് സ്റ്റാൻഡിലെ സി.സി.ടി.വി ദൃശ്യങ്ങൾ പൊലിസ് വിശദമായി പരിശോധിച്ചു വരികയാണ് എന്ന് പൊലിസ് വൃത്തങ്ങൾ അറിയിച്ചു.

കുടുംബാംഗങ്ങൾക്കെതിരെ കർശനമായ നിയമനടപടികൾ സ്വീകരിക്കാനാണ് പൊലിസ് നീക്കം. സ്വന്തം വീട്ടുകാരാൽ തന്നെ തെരുവിലുപേക്ഷിക്കപ്പെട്ട വയോധികയുടെ ദുരവസ്ഥ നഗരവാസികൾക്കിടയിൽ വലിയ പ്രതിഷേധത്തിന് കാരണമായിട്ടുണ്ട്.

An elderly woman from Alappuzha was abandoned by her husband and nephew at the Ernakulam South bus stand after they lied to her about a hospital visit. KSRTC staff noticed her sitting alone and alerted the authorities. Officers from the Ernakulam Women’s Police Station rescued her and moved her to a shelter home.