അബുദബി: ഗൾഫ് മേഖലയും യുഎഇയും നേരിടുന്ന ഏറ്റവും വലിയ ഭീഷണി ഇറാനിൽ നിന്നാണെന്ന് യുഎഇ പ്രസിഡന്റിന്റെ നയതന്ത്ര ഉപദേഷ്ടാവ് ഡോ. അൻവർ ഗർഗാഷ്. ഇറാൻ നടത്തിയ തീവ്രമായ മിസൈൽ-ഡ്രോൺ ആക്രമണങ്ങളെ രാജ്യം വിജയകരമായി പ്രതിരോധിച്ചതായും അദ്ദേഹം വാർത്താ സമ്മേളനത്തിൽ വ്യക്തമാക്കി.

കഴിഞ്ഞ 40 ദിവസത്തിനിടെ 2,800-ലധികം ഇറാൻ മിസൈലുകളും ഡ്രോണുകളുമാണ് യുഎഇയെ ലക്ഷ്യമിട്ട് എത്തിയത്. എന്നാൽ ഇവയിൽ 96 ശതമാനവും തടയാൻ യുഎഇയുടെ പ്രതിരോധ സംവിധാനത്തിന് സാധിച്ചതായി ഗർഗാഷ് വെളിപ്പെടുത്തി.

"യുഎഇ ദുർബലമായ ഒരു മേഖലയാണെന്നാണ് ഇറാൻ കരുതിയത്. എന്നാൽ ആ ആക്രമണങ്ങളെ പൂർണ്ണ കാര്യക്ഷമതയോടെ ഞങ്ങൾ നേരിട്ടു. യുഎഇയുടെ പ്രതിരോധ മാതൃക ലോകത്തിന് മുന്നിൽ വിജയിച്ചിരിക്കുകയാണ്," അദ്ദേഹം പറഞ്ഞു.

ALSO READ: യുഎഇയിൽ സ്കൂൾ ബസ് സർവീസുകൾ നിർത്തിവെച്ചു; ബദൽ മാർഗ്ഗങ്ങൾ തേടി രക്ഷിതാക്കൾ

തുടർച്ചയായ ആക്രമണങ്ങൾക്കിടയിലും രാജ്യത്തെ ജനജീവിതം സാധാരണ നിലയിലായിരുന്നുവെന്ന് അദ്ദേഹം ചൂണ്ടിക്കാട്ടി. വിതരണ ശൃംഖലകൾ  തടസ്സമില്ലാതെ പ്രവർത്തിച്ചതും സാമ്പത്തിക സ്ഥിരത നിലനിർത്താൻ സാധിച്ചതും രാജ്യത്തിന് കരുത്തായി. എല്ലാ സർക്കാർ-സ്വകാര്യ സേവനങ്ങളും തടസ്സമില്ലാതെ തുടർന്നതിനൊപ്പം, യുഎഇയുടെ ദേശീയ സംവിധാനങ്ങൾ ഒരുമിച്ച് പ്രവർത്തിച്ചത് ജനങ്ങളിൽ ആത്മവിശ്വാസവും പ്രതിരോധ ശേഷിയും വർദ്ധിപ്പിച്ചതായും അദ്ദേഹം കൂട്ടിച്ചേർത്തു.

നയതന്ത്രത്തിന്റെ വാതിലുകൾ തുറന്നിടും

ഇറാന്റെ ഭീഷണിയെക്കുറിച്ച് വ്യക്തമായ ധാരണയുണ്ടെങ്കിലും സമാധാനത്തിനുള്ള സാധ്യതകൾ യുഎഇ തള്ളിക്കളയുന്നില്ല. "ഇത് ഇറാനെ ആക്രമിക്കാനുള്ള ആഹ്വാനമല്ല. മറിച്ച് ഭീഷണിയുടെ ഉറവിടത്തെക്കുറിച്ച് കൃത്യമായ ബോധ്യം പുലർത്തുന്നതിനൊപ്പം തന്നെ നയതന്ത്ര ചർച്ചകൾക്കുള്ള വാതിലുകൾ തുറന്നിടുകയുമാണ് യുഎഇ ചെയ്യുന്നത്," ഗർഗാഷ് വ്യക്തമാക്കി.

യുദ്ധസമാനമായ സാഹചര്യത്തിന് ശേഷം യുഎഇ കൂടുതൽ കരുത്തരായതായും തങ്ങളെ പ്രതിരോധിക്കാനുള്ള കഴിവിൽ പൂർണ്ണ വിശ്വാസമുണ്ടെന്നും അദ്ദേഹം പറഞ്ഞു. ഇസ്റാഈൽ ഉൾപ്പെടെയുള്ള മറ്റ് രാജ്യങ്ങളെ അപേക്ഷിച്ച് കൂടുതൽ വെല്ലുവിളികൾ നേരിട്ടിട്ടും പതറാതെ നിന്നത് യുഎഇയുടെ നേട്ടമാണെന്ന് അദ്ദേഹം ഓർമ്മിപ്പിച്ചു.

a senior diplomatic advisor to the uae president stated that iran “lost” while the uae “prevailed,” highlighting the country’s resilience against missile threats. the statement underscores the uae’s strategic defense, diplomacy, and crisis management model that helped maintain stability during regional tensions.