ഉത്തർപ്രദേശിലെ മതപരിവർത്തന നിരോധന നിയമപ്രകാരം മൂന്നാം കക്ഷികൾ വ്യാജ പരാതികൾ നൽകുന്ന പ്രവണത വർദ്ധിക്കുന്നതിൽ അലഹബാദ് ഹൈക്കോടതി കടുത്ത ആശങ്ക രേഖപ്പെടുത്തി. ഇതൊരു "അസ്വസ്ഥജനകമായ പ്രവണതയാണെന്ന്" കോടതി നിരീക്ഷിച്ചു. നിയമപ്രകാരം കേസെടുക്കപ്പെട്ട മൂന്ന് മുസ്‌ലിം യുവാക്കൾ നൽകിയ ഹർജി പരിഗണിക്കവെയാണ് കോടതിയുടെ സുപ്രധാന നിരീക്ഷണം.

കേസിന്റെ പശ്ചാത്തലം:
പതിനെട്ടു വയസ്സുകാരിയായ പെൺകുട്ടിയുടെ പിതാവ് നൽകിയ പരാതിയിലാണ് കേസിന്റെ തുടക്കം. പ്രതികളിൽ ഒരാൾ തന്റെ മകളെ വശീകരിച്ചുവെന്നും മതം മാറ്റാൻ നിർബന്ധിച്ച് വിവാഹം കഴിക്കാൻ സാധ്യതയുണ്ടെന്നും പിതാവ് ആരോപിച്ചു. തുടർന്ന് യുപി മതപരിവർത്തന നിരോധന നിയമപ്രകാരവും ഭാരതീയ ന്യായ സംഹിതയിലെ വിവിധ വകുപ്പുകൾ പ്രകാരവും പൊലിസ് എഫ്.ഐ.ആർ രജിസ്റ്റർ ചെയ്തു.
എന്നാൽ, മജിസ്‌ട്രേറ്റിന് മുന്നിൽ നൽകിയ മൊഴിയിൽ പെൺകുട്ടി ഈ ആരോപണങ്ങളെല്ലാം നിഷേധിച്ചു. താൻ പ്രതികളിൽ ഒരാളുമായി പരസ്പര സമ്മതത്തോടെയുള്ള ബന്ധത്തിലാണെന്നും തന്നെ ആരും മതം മാറാനോ വിവാഹത്തിനോ നിർബന്ധിച്ചിട്ടില്ലെന്നും പെൺകുട്ടി വ്യക്തമാക്കി. ചില സംഘടനകളിൽ നിന്ന് തനിക്ക് ഉപദ്രവമുണ്ടാകുമെന്ന് ഭയപ്പെടുന്നതായും പെൺകുട്ടി മൊഴി നൽകി.

കോടതിയുടെ നിരീക്ഷണം:
ജസ്റ്റിസ് അബ്ദുൽ മോയിൻ, ജസ്റ്റിസ് പ്രമോദ് കുമാർ ശ്രീവാസ്തവ എന്നിവരടങ്ങുന്ന ഡിവിഷൻ ബെഞ്ച് പെൺകുട്ടിയുടെ മൊഴിയും എഫ്.ഐ.ആറിലെ ആരോപണങ്ങളും തമ്മിലുള്ള വൈരുദ്ധ്യം ചൂണ്ടിക്കാട്ടി. ബലാത്സംഗം ഉൾപ്പെടെയുള്ള ആരോപണങ്ങൾ ഒഴിവാക്കിയിട്ടും മതപരിവർത്തന നിരോധന നിയമപ്രകാരമുള്ള അന്വേഷണം തുടരുന്നത് വിചിത്രമാണെന്ന് കോടതി പറഞ്ഞു. അന്വേഷണം ഏതെങ്കിലും തരത്തിലുള്ള സമ്മർദ്ദത്തിലാണോ നടക്കുന്നതെന്ന് സംശയിക്കുന്നതായും ബെഞ്ച് നിരീക്ഷിച്ചു. 
ഇരയെന്ന് പറയപ്പെടുന്ന വ്യക്തി മൊഴി നൽകിയിട്ടും മൂന്നാം കക്ഷികൾ നൽകുന്ന പരാതിയുടെ അടിസ്ഥാനത്തിൽ നിയമനടപടികൾ തുടരുന്നത് ആവർത്തിച്ചു കാണുന്ന ഒന്നാണെന്നും കോടതി കൂട്ടിച്ചേർത്തു. സമാനമായ വിഷയങ്ങളിൽ നേരത്തെ സുപ്രിംകോടതി നടത്തിയ നിരീക്ഷണങ്ങളും കോടതി പരാമർശിച്ചു.

സർക്കാരിനോടും പരാതിക്കാരനോടും വിശദീകരണം തേടി:
മതപരിവർത്തന നിരോധന നിയമം ദുരുപയോഗം ചെയ്യുന്നത് തടയാൻ സ്വീകരിച്ച നടപടികളെക്കുറിച്ച് സത്യവാങ്മൂലം സമർപ്പിക്കാൻ ഉത്തർപ്രദേശ് സർക്കാരിനോട് കോടതി നിർദ്ദേശിച്ചു. അഡിഷനൽ ചീഫ് സെക്രട്ടറി (ആഭ്യന്തരം) നേരിട്ട് സത്യവാങ്മൂലം നൽകണം. വ്യാജ പരാതികൾ അന്വേഷണ ഏജൻസികളുടെ സമയം പാഴാക്കുന്നത് എങ്ങനെ കൈകാര്യം ചെയ്യുമെന്ന് വിശദീകരിക്കാനും കോടതി ആവശ്യപ്പെട്ടു.
ഹർജിക്കാരുടെ അറസ്റ്റ് തടഞ്ഞ കോടതി, പെൺകുട്ടിക്കും കുടുംബത്തിനും സംരക്ഷണം നൽകാനും നിർദ്ദേശിച്ചു.

The Allahabad High Court has expressed grave concern over the increasing trend of third parties filing false complaints under Uttar Pradesh's anti-conversion law. The court observed that this is a "disturbing trend." These significant observations were made while the court was considering a petition filed by three Muslim youths who were booked under the law.