മുംബൈ: ഐപിഎല്ലിൽ മുംബൈ ഇന്ത്യൻസിന്റെ 'കഷ്ടകാലം' തുടരുമ്പോൾ, ടീമിനെ രക്ഷിക്കാൻ രോഹിത് ശർമ്മ തന്നെ തിരിച്ചുവരണമെന്ന് മുൻ ഇന്ത്യൻ താരം മനോജ് തിവാരി. ക്രിക്ബസിൽ നടന്ന ചർച്ചയ്ക്കിടെയാണ് തിവാരി തന്റെ നിലപാട് വ്യക്തമാക്കിയത്. ഹാർദിക് പാണ്ഡ്യയുടെ ക്യാപ്റ്റൻസി ദുർബലമാണെന്നും ടീമിന് ശരിയായ ദിശ നൽകുന്നതിൽ അദ്ദേഹം പരാജയപ്പെട്ടുവെന്നും തിവാരി ആരോപിച്ചു.

തിവാരിയുടെ പ്രധാന നിരീക്ഷണങ്ങൾ:

2015 മുതൽ 2023 വരെ മുംബൈ ഇന്ത്യൻസിനെ വിജയങ്ങളുടെ നെറുകയിലെത്തിച്ചത് രോഹിത് ശർമ്മയാണ്. വിജയകരമായി പോയിരുന്ന ഒരു ക്യാപ്റ്റനെ മാറ്റിയത് വലിയ അനീതിയായിരുന്നു.ടീം ഇപ്പോൾ നേരിടുന്ന പ്രതിസന്ധിക്ക് പരിഹാരം വേണമെങ്കിൽ ഹാർദിക് പാണ്ഡ്യ സ്വയം ക്യാപ്റ്റൻ സ്ഥാനത്ത് നിന്ന് മാറിനിൽക്കണം. നായകസ്ഥാനം വീണ്ടും രോഹിത്തിന് കൈമാറുന്നതാണ് ടീമിന്റെ താൽപ്പര്യത്തിന് നല്ലത്.പഞ്ചാബ് കിങ്സിനെതിരായ മത്സരത്തിൽ ശ്രേയസ് അയ്യരുടെ നേതൃത്വം മികച്ചതായിരുന്നുവെന്നും എന്നാൽ ഹാർദിക്കിന്റെ തീരുമാനങ്ങൾ പാളിയെന്നും തിവാരി ചൂണ്ടിക്കാട്ടി.

പ്രതിരോധവുമായി മഹേല ജയവർധനെ

വിമർശനങ്ങൾ ഹാർദിക്കിന് നേരെ തിരിയുമ്പോഴും, തോൽവിയുടെ ഉത്തരവാദിത്തം ഒരാളിൽ മാത്രം ചുമത്തുന്നത് ശരിയല്ലെന്ന നിലപാടിലാണ് മുംബൈ ഇന്ത്യൻസ് ഹെഡ് കോച്ച് മഹേല ജയവർധനെ. തോൽവി ഒരു വ്യക്തിയുടെ മാത്രം ഉത്തരവാദിത്തമല്ലെന്നും മാനേജ്‌മെന്റിനും പരിശീലകർക്കും തുല്യ പങ്കുണ്ടെന്നും അദ്ദേഹം വാർത്താ സമ്മേളനത്തിൽ പറഞ്ഞു. നിലവിൽ ടീം നല്ല ക്രിക്കറ്റാണ് കളിക്കുന്നതെന്നും എന്നാൽ ക്ലിനിക്കൽ പ്രകടനം പുറത്തെടുക്കുന്ന മറ്റ് ടീമുകൾക്ക് മുന്നിൽ മുംബൈയ്ക്ക് കാലിടറുന്നുവെന്നും അദ്ദേഹം കൂട്ടിച്ചേർത്തു.

മുംബൈയുടെ ദയനീയ കണക്കുകൾ:

ഈ സീസണിൽ ഇതുവരെ കളിച്ച 5 മത്സരങ്ങളിൽ ഒന്നിൽ മാത്രമാണ് മുംബൈയ്ക്ക് വിജയിക്കാനായത്.5 മത്സരങ്ങളിലായി മുംബൈ ബൗളർമാർ 972 റൺസാണ് വഴങ്ങിയത്. 10.26 എന്ന ഉയർന്ന ഇക്കോണമി റേറ്റ് ടീമിന്റെ ബൗളിംഗ് തകർച്ച വെളിപ്പെടുത്തുന്നു.

നായകനെന്ന നിലയിലും താരമെന്ന നിലയിലും ഹാർദിക്കിന് തിളങ്ങാനായിട്ടില്ല. കളിച്ച 4 മത്സരങ്ങളിൽ നിന്ന് വെറും 81 റൺസും 2 വിക്കറ്റും മാത്രമാണ് അദ്ദേഹം നേടിയത്.പഞ്ചാബ് കിങ്സിനോട് ഏറ്റ 7 വിക്കറ്റ് തോൽവി മുംബൈ ടീമിനുള്ളിലെ അസ്വാരസ്യങ്ങൾ കൂടുതൽ രൂക്ഷമാക്കിയിരിക്കുകയാണ്. തിങ്കളാഴ്ച ഗുജറാത്ത് ടൈറ്റൻസിനെതിരെ നടക്കാനിരിക്കുന്ന മത്സരം മുംബൈയ്ക്കും ഹാർദിക്കിനും നിർണ്ണായകമാണ്.