തൃശൂർ: മാടക്കത്തറയിൽ വാക്കുതർക്കത്തിനിടെ യുവാവിനെ കുത്തിക്കൊന്നു. മാടക്കത്തറ നാല് സെന്റ് ഉന്നതിയിൽ താമസിക്കുന്ന നിഖിൽ (28) ആണ് കൊല്ലപ്പെട്ടത്. സംഭവവുമായി ബന്ധപ്പെട്ട് പ്രതിയായ ജിന്റോയെ പൊലിസ് കസ്റ്റഡിയിലെടുത്തു. ആക്രമണത്തിൽ നിഖിലിന്റെ സുഹൃത്ത് ഷാമോനും പരിക്കേറ്റിട്ടുണ്ട്.

സംഭവത്തെക്കുറിച്ച് പൊലിസ് പറയുന്നത് ഇങ്ങനെ:

മുൻവൈരാഗ്യമാണ് കൊലപാതകത്തിന് പിന്നിലെ പ്രാഥമിക കാരണമെന്നാണ് പൊലിസ് നിഗമനം. നിഖിലും ജിന്റോയും തമ്മിൽ നേരത്തെ തന്നെ പ്രശ്നങ്ങൾ നിലനിന്നിരുന്നു.സംഭവദിവസം ഇരുവരും തമ്മിൽ വീണ്ടും വാക്കേറ്റമുണ്ടാവുകയും ഇത് കൈയാങ്കളിയിൽ കലാശിക്കുകയുമായിരുന്നു.തർക്കം മുറുകിയതോടെ ജിന്റോ കൈയ്യിൽ കരുതിയിരുന്ന കത്തിയെടുത്ത് നിഖിലിനെ കുത്തുകയായിരുന്നു. തടയാൻ ശ്രമിക്കുന്നതിനിടെയാണ് സുഹൃത്ത് ഷാമോന് പരിക്കേറ്റത്.ഗുരുതരമായി പരിക്കേറ്റ നിഖിലിനെ ഉടൻ തന്നെ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല.

തുടർനടപടികൾ:

സംഭവത്തിന് പിന്നാലെ ഒളിവിൽ പോകാൻ ശ്രമിച്ച പ്രതി ജിന്റോയെ പൊലിസ് അതിവേഗം പിടികൂടി. ഇയാളെ നിലവിൽ ചോദ്യം ചെയ്തുവരികയാണ്. പരിക്കേറ്റ ഷാമോൻ തൃശൂരിലെ സ്വകാര്യ ആശുപത്രിയിൽ ചികിത്സയിലാണ്. നിഖിലിന്റെ മൃതദേഹം പോസ്റ്റ്‌മോർട്ടം നടപടികൾക്കായി മെഡിക്കൽ കോളേജ് മോർച്ചറിയിലേക്ക് മാറ്റി. സംഭവസ്ഥലത്ത് ഫോറൻസിക് വിദഗ്ധരും വിരലടയാള വിദഗ്ധരും പരിശോധന നടത്തി.

"പ്രതിയും കൊല്ലപ്പെട്ട യുവാവും തമ്മിൽ നേരത്തെ തർക്കങ്ങൾ നിലനിന്നിരുന്നതായാണ് വിവരം. സംഭവത്തിൽ കൂടുതൽ പേർക്ക് പങ്കുണ്ടോ എന്നും അന്വേഷിക്കുന്നുണ്ടെന്ന്."പൊലിസ് പറഞ്ഞു.