കറാച്ചി: ലോകത്തെ ഏറ്റവും വലിയ ടി20 ലീഗായ ഐപിഎൽ (IPL) ഉപേക്ഷിച്ച് പാകിസ്താൻ സൂപ്പർ ലീഗിൽ (PSL) കളിക്കാൻ തീരുമാനിച്ചതിന് പിന്നിലെ കാരണം വ്യക്തമാക്കി മുൻ ഇംഗ്ലണ്ട് ഓൾറൗണ്ടർ മോയിൻ അലി. കളി സമയം (Game time) വർദ്ധിപ്പിക്കാനും കുടുംബത്തോടൊപ്പം കൂടുതൽ സമയം ചിലവഴിക്കാനുമാണ് താൻ പാകിസ്താനിലെ ലീഗിന് മുൻഗണന നൽകിയതെന്ന് അദ്ദേഹം പറഞ്ഞു.

മോയിൻ അലി പറഞ്ഞ പ്രധാന കാരണങ്ങൾ:

ഐപിഎല്ലിനെ അപേക്ഷിച്ച് പിഎസ്എൽ കുറഞ്ഞ ദിവസങ്ങൾക്കുള്ളിൽ തീരുന്ന ടൂർണമെന്റാണ്. 38 വയസ്സായ തനിക്ക് ഈ ഘട്ടത്തിൽ കുടുംബത്തിന് മുൻഗണന നൽകാൻ ഇത് സഹായിക്കുമെന്ന് അദ്ദേഹം പറഞ്ഞു.കഴിഞ്ഞ ഐപിഎൽ സീസണിൽ കൊൽക്കത്ത നൈറ്റ് റൈഡേഴ്‌സിന് (KKR) വേണ്ടി 6 മത്സരങ്ങൾ കളിച്ചെങ്കിലും ബാറ്റ് ചെയ്യാൻ വെറും രണ്ട് തവണ മാത്രമാണ് അവസരം ലഭിച്ചത്. സൈഡ് ബെഞ്ചിലിരിക്കാതെ കളിക്കളത്തിൽ സജീവമാകാനാണ് താൻ ആഗ്രഹിക്കുന്നതെന്ന് അദ്ദേഹം വ്യക്തമാക്കി.

കരിയറിന്റെ അവസാന ഘട്ടത്തിൽ കൂടുതൽ ക്രിക്കറ്റ് ആസ്വദിച്ചു കളിക്കാനാണ് ആഗ്രഹം. പിഎസ്എല്ലിൽ കളിക്കാൻ താൻ നേരത്തെ ആഗ്രഹിച്ചിരുന്നെങ്കിലും ഐപിഎൽ ഷെഡ്യൂളുമായുള്ള പൊരുത്തക്കേട് മൂലം അത് സാധിച്ചിരുന്നില്ല.

കറാച്ചി കിംഗ്‌സിലെ പ്രകടനം

നിലവിൽ 2026 പിഎസ്എൽ സീസണിൽ കറാച്ചി കിംഗ്‌സിന് വേണ്ടി മിന്നും പ്രകടനമാണ് മോയിൻ അലി കാഴ്ചവെക്കുന്നത്. ക്വറ്റ ഗ്ലാഡിയേറ്റേഴ്‌സിനെതിരായ മത്സരത്തിൽ 29 പന്തിൽ 48 റൺസ് നേടി അദ്ദേഹം കരുത്ത് തെളിയിച്ചിരുന്നു. ഏകദേശം 2.14 കോടി രൂപയ്ക്കാണ് (6.44 കോടി പാകിസ്താനി രൂപ) കറാച്ചി കിംഗ്‌സ് താരത്തെ സ്വന്തമാക്കിയത്.

"ഐപിഎല്ലിൽ പകുതി മത്സരങ്ങളിൽ മാത്രമേ എനിക്ക് അവസരം ലഭിച്ചുള്ളൂ. ഈ പ്രായത്തിൽ എനിക്ക് ബാറ്റ് ചെയ്യണം, മൈതാനത്തിറങ്ങണം. ക്രിക്കറ്റ് പരമാവധി ആസ്വദിക്കാനാണ് ഞാൻ ആഗ്രഹിക്കുന്നതെന്ന്."മോയിൻ അലി ARY പോഡ്‌കാസ്റ്റിൽ സംസാരിക്കവേ പറഞ്ഞു.

കഴിഞ്ഞ ഐപിഎൽ സീസണിൽ 2 കോടി രൂപയ്ക്കാണ് കെകെആർ മോയിൻ അലിയെ വാങ്ങിയിരുന്നത്. എന്നാൽ പ്രതീക്ഷിച്ച പ്രകടനം പുറത്തെടുക്കാൻ താരത്തിന് സാധിച്ചിരുന്നില്ല. നിലവിൽ പിഎസ്എല്ലിനൊപ്പം ഇംഗ്ലീഷ് ആഭ്യന്തര ലീഗായ ടി20 ബ്ലാസ്റ്റിലും താരം സജീവമാകാൻ ഒരുങ്ങുകയാണ്.