തിരുവനന്തപുരം: അടുത്ത രണ്ട് ദിവസങ്ങളില്‍ കേരളത്തില്‍ ഉഷ്ണതരംഗത്തിന് സമാനമായ അതികഠിനമായ ചൂട് അനുഭവപ്പെടുമെന്ന് കേന്ദ്ര കാലാവസ്ഥാ വകുപ്പ് മുന്നറിയിപ്പ് നല്‍കി. വിവിധ ജില്ലകളില്‍ താപനില സാധാരണത്തേക്കാള്‍ രണ്ട് ഡിഗ്രി സെല്‍ഷ്യസ് വരെ ഉയരാന്‍ സാധ്യത. മലയോര മേഖലകള്‍ ഒഴികെയുള്ള 12 ജില്ലകളില്‍ വരും ദിവസങ്ങളില്‍ യെല്ലോ അലര്‍ട്ടും പ്രഖ്യാപിച്ചിട്ടുണ്ട്.

പാലക്കാട് ജില്ലയിലാണ് ഏറ്റവും കൂടുതല്‍ ചൂട് രേഖപ്പെടുത്താനുള്ള സാധ്യത, ഇവിടെ താപനില 40°C വരെ ഉയര്‍ന്നേക്കാം. കൊല്ലത്ത് 39°C, കോട്ടയത്ത് 38°C എന്നിങ്ങനെയും താപനില ഉയരും. ആലപ്പുഴ, പത്തനംതിട്ട, എറണാകുളം, തൃശൂര്‍, മലപ്പുറം, കോഴിക്കോട്, കണ്ണൂര്‍, കാസര്‍കോട് ജില്ലകളില്‍ 37°C വരെയും തിരുവനന്തപുരത്ത് 36°C വരെയുമാണ് ചൂട് പ്രതീക്ഷിക്കുന്നത്.

അന്തരീക്ഷത്തിലെ ഉയര്‍ന്ന ആര്‍ദ്രത (Humidtiy) കാരണം ജനങ്ങള്‍ക്ക് കടുത്ത അസ്വസ്ഥതയും അനുഭവപ്പെട്ടേക്കാം. സൂര്യാഘാതം, നിര്‍ജ്ജലീകരണം എന്നിവ ഒഴിവാക്കാന്‍ പകല്‍ 11 മണി മുതല്‍ 3 മണി വരെ നേരിട്ട് വെയിലേല്‍ക്കുന്നത് ഒഴിവാക്കണമെന്ന് സംസ്ഥാന ദുരന്ത നിവാരണ അതോറിറ്റിയും നിര്‍ദേശിച്ചു. ദാഹമില്ലെങ്കിലും ധാരാളം വെള്ളം കുടിക്കണമെന്നും അയഞ്ഞ കോട്ടണ്‍ വസ്ത്രങ്ങള്‍ ധരിക്കണമെന്നും ജാഗ്രതാ നിര്‍ദേശത്തില്‍ പറയുന്നു.

The India Meteorological Department has issued a yellow alert for 12 districts in Kerala as temperatures are expected to soar up to 40°C, posing risks of sunstroke and dehydration.