ന്യൂഡല്‍ഹി: ഇറാനുമേല്‍ അമേരിക്കയും, ഇസ്‌റാഈലും നടത്തിയ ആക്രമണവും, തുടര്‍ന്ന് മേഖലയിലുണ്ടായ പ്രതിസന്ധിയും ഏറ്റവും കൂടുതല്‍ ബാധിച്ചത് ഇന്ത്യയിലെ അടുക്കളകളിലെന്ന് റിപ്പോര്‍ട്ട്. ആക്രമണത്തിന് തിരിച്ചടിയായി ഇറാന്‍ ഹോര്‍മുസ് കടലിടുക്ക് അടച്ചതോടെ രാജ്യത്തെ പാചകവാതക ഉപയോഗം ഗണ്യമായി കുറഞ്ഞു. 

മാര്‍ച്ച് മാസത്തില്‍ ഇന്ത്യയിലെ ഗാര്‍ഹിക, വാണിജ്യ പാചകവാതകങ്ങളുടെ ഉപയോഗം 13 ശതമാനം കുറഞ്ഞതായാണ് റിപ്പോര്‍ട്ട് സൂചിപ്പിക്കുന്നത്. 2025 മാര്‍ച്ചില്‍ രാജ്യത്തെ എല്‍പിജി ഉപയോഗം 2.729 ദശലക്ഷം ടണ്‍ ആയിരുന്നെങ്കില്‍ ഈ വര്‍ഷം മാര്‍ച്ചില്‍ അത് 2.379 ദശലക്ഷം ടണ്‍ ആയി കുറഞ്ഞു. മുന്‍വര്‍ഷത്തെ അപേക്ഷിച്ച് 12.8 ശതമാനത്തിന്റെ കുറവാണ് രേഖപ്പെടുത്തിയതെന്നും കേന്ദ്ര സര്‍ക്കാരിന്റെ പെട്രോളിയം പ്ലാനിങ് ആന്‍ഡ് അനലിസിസ് സെല്‍ (പിപിഎസി) റിപ്പോര്‍ട്ട് ചൂണ്ടിക്കാട്ടുന്നു. 

ഇന്ത്യയിലേക്കുള്ള പാചകവാതക ചരക്കുനീക്കം പ്രധാനമായും നടക്കുന്നത് ഹോര്‍മുസ് കടലിടുക്ക് വഴിയാണ്. ആവശ്യമുള്ള എല്‍പിജിയുടെ 60 ശതമാനവും ഇറക്കുമതി ചെയ്യുന്ന സാഹചര്യമുള്ളതിനാല്‍ യുദ്ധം വലിയ പ്രതിസന്ധിയാണ് രാജ്യത്ത് സൃഷ്ടിച്ചത്. ഗാര്‍ഹിക പാചകവാതക വിതരണം 8.1 ശതമാനവും, ഗാര്‍ഹികേതര വിതരണം 48 ശതമാനവും, വന്‍കിട-വ്യാവസായിക ആവശ്യങ്ങള്‍ക്കുള്ള എല്‍പിജി വിതരണം 75.5 ശതമാനവും തടസപ്പെട്ടെന്നാണ് റിപ്പോര്‍ട്ട്. ഹോര്‍മുസ് അടച്ചിടുമെന്ന് ഇറാന്‍ പ്രഖ്യാപിച്ചതോടെ പ്രതിസന്ധി കൂടുതല്‍ കനക്കുമെന്നാണ് നിഗമനം.

പശ്ചിമേഷ്യന്‍ സംഘര്‍ത്തില്‍ നാളെ പാകിസ്താനില്‍ വെച്ച് നടക്കുന്ന ചര്‍ച്ചയില്‍ ഇറാന്‍ പങ്കെടുത്തേക്കില്ലെന്ന് റിപ്പോര്‍ട്ട്. നാവിക ഉപരോധം നീക്കാതെ അമേരിക്കയുമായി ചര്‍ച്ചക്കില്ലെന്ന നിലപാടിലാണ് ഇറാനെന്ന് തസ്‌നിം ഏജന്‍സി റിപ്പോര്‍ട്ട് ചെയ്തു. അടുത്ത ഘട്ട ചര്‍ച്ചക്കായി യുഎസ് പ്രതിനിധികള്‍ പാകിസ്താനിലേക്ക് പോയെന്ന ട്രംപിന്റെ പ്രഖ്യാപനത്തിന് പിന്നാലെയാണ് ഇറാന്റെ മറുപടി. 

ഇരുരാജ്യങ്ങളും തമ്മിലുള്ള ആദ്യഘട്ട നയതന്ത്ര ചര്‍ച്ചകള്‍ അലസിയതോടെ നാളെ നടക്കുന്ന ചര്‍ച്ച ഏറെ നിര്‍ണായകമാണ്. ചര്‍ച്ചക്ക് തയ്യാറായില്ലെങ്കില്‍ ഇറാന്റെ ഊര്‍ജ നിലയങ്ങളും, ജനവാസ മേഖലകളും ലക്ഷ്യംവെച്ച് ആക്രമണം നടത്തുമെന്ന് ട്രംപ് ഭീഷണിപ്പെടുത്തിയിട്ടുണ്ട്. 

അതേസമയം ചര്‍ച്ചക്ക് സംഘത്തെ അയക്കില്ലെന്ന നിലപാട് ആവര്‍ത്തിക്കുകയാണ് ഇറാന്‍. യുഎസിന്റെ നാവിക ഉപരോധം വെടിനിര്‍ത്തല്‍ ലംഘനവും, യുദ്ധക്കുറ്റവുമാണെന്ന് ഇറാന്‍ വ്യക്തമാക്കി. ആണവ സാധ്യതകള്‍ ഇറാന്റെ അടിസ്ഥാന അവകാശമാണെന്നും, ഇറാന്‍ പ്രസിഡന്റ് മസൂദ് പെസഷസ്‌കിയാന്‍ വ്യക്തമാക്കി. തടയാന്‍ ആര്‍ക്കും അവകാശമില്ലെന്നും അദ്ദേഹം കൂട്ടിച്ചേര്‍ത്തു. അതിനിടെ ചര്‍ച്ചയില്‍ മധ്യസ്ഥ ശ്രമവുമായി പാകിസ്താന്‍ രംഗത്തെത്തി. പാക് വിദേശകാര്യ മന്ത്രി ഇറാന്‍ വിദേശകാര്യ മന്ത്രിയെ വിളിച്ചതായാണ് റിപ്പോര്‍ട്ട്.