കുവൈത്ത് സിറ്റി: അസാധാരണ സാഹചര്യങ്ങളെത്തുടർന്ന് താൽക്കാലികമായി നിർത്തിവെച്ചിരുന്ന കുവൈത്ത് അന്താരാഷ്ട്ര വിമാനത്താവളത്തിന്റെ പ്രവർത്തനങ്ങൾ പുനരാരംഭിക്കുന്നതിനുള്ള അന്തിമ ഒരുക്കങ്ങൾ പൂർത്തിയായി. പ്രവർത്തനസജ്ജത നേരിട്ട് വിലയിരുത്തുന്നതിനായി പ്രധാനമന്ത്രി ശൈഖ് അഹമ്മദ് അബ്ദുല്ല അൽ-അഹ്മദ് അൽ-സബ വിമാനത്താവളത്തിൽ സന്ദർശനം നടത്തി.

യാത്രക്കാരെ സ്വീകരിക്കുന്നതിനും യാത്രയാക്കുന്നതിനുമുള്ള ക്രമീകരണങ്ങൾ നേരിട്ട് വിലയിരുത്തുന്നതിനായി പ്രധാനമന്ത്രിയും സംഘവും ഡിപ്പാർച്ചർ, അറൈവൽ ഹാളുകളിൽ വിശദമായ പരിശോധന നടത്തി. വിമാനത്താവളത്തിന്റെ പ്രവർത്തനം പുനരാരംഭിക്കുന്നതിന് മുന്നോടിയായി പൊതുജനങ്ങൾക്ക് മികച്ച സേവനം ഉറപ്പാക്കുക എന്ന ലക്ഷ്യത്തോടെയായിരുന്നു സന്ദർശനം.

യാത്രക്കാരുടെ സുരക്ഷയും വിമാനത്താവളത്തിന്റെ സാങ്കേതിക കാര്യക്ഷമതയും ഉറപ്പുവരുത്തുന്നതിനായി കസ്റ്റംസ് പരിശോധനാ കേന്ദ്രങ്ങൾ, ബാഗേജ് ഹാൻഡ്‌ലിംഗ് സംവിധാനങ്ങൾ എന്നിവയുടെ പ്രവർത്തനം പ്രധാനമന്ത്രി സസൂക്ഷ്മം വിലയിരുത്തി. റൺവേകൾ, ഗ്രൗണ്ട് സർവീസുകൾ എന്നിവയുൾപ്പെടെയുള്ള സാങ്കേതിക പിന്തുണാ സംവിധാനങ്ങളുടെ സജ്ജീകരണങ്ങളിൽ അദ്ദേഹം സംതൃപ്തി രേഖപ്പെടുത്തുകയും, സുഗമമായ വ്യോമഗതാഗതത്തിനായി എല്ലാ വിഭാഗങ്ങളും ഒത്തൊരുമിച്ച് പ്രവർത്തിക്കേണ്ടതിന്റെ പ്രാധാന്യം ഓർമ്മിപ്പിക്കുകയും ചെയ്തു.

ALSO READ: കുവൈത്തില്‍ വര്‍ക്ക് പെര്‍മിറ്റ് കാലാവധി കഴിഞ്ഞ പ്രവാസികളുടെ അക്കൗണ്ടുകള്‍ നിരീക്ഷിക്കും; സിവില്‍ ഐ.ഡി വിവരങ്ങള്‍ ബാങ്കുകളുമായി ബന്ധിപ്പിക്കും

വിമാനത്താവളം വീണ്ടും തുറക്കുമ്പോൾ സുരക്ഷയ്ക്കും മുൻകരുതൽ നടപടികൾക്കും പ്രഥമ പരിഗണന നൽകണമെന്ന് പ്രധാനമന്ത്രി നിർദ്ദേശിച്ചു. വ്യോമഗതാഗതം സുഗമമാക്കുന്നതിന് വിവിധ സർക്കാർ ഏജൻസികൾ തമ്മിലുള്ള പൂർണ്ണമായ ഏകോപനം അനിവാര്യമാണെന്ന് അദ്ദേഹം ചൂണ്ടിക്കാട്ടി. ചുരുങ്ങിയ സമയത്തിനുള്ളിൽ പ്രവർത്തനങ്ങൾ പുനരാരംഭിക്കാൻ പരിശ്രമിച്ച ദേശീയ, സാങ്കേതിക ഉദ്യോഗസ്ഥരെ അദ്ദേഹം പ്രശംസിച്ചു.

രാജ്യത്തെ വ്യോമഗതാഗത മേഖലയെ ശക്തിപ്പെടുത്തുന്നതിനുള്ള പദ്ധതികളുടെ ഭാഗമായാണ് വിമാനത്താവളം പുനർപ്രവർത്തനത്തിന് ഒരുങ്ങുന്നത്. വരും ദിവസങ്ങളിൽ വിമാന സർവീസുകൾ പഴയപടിയാകുമെന്നാണ് സൂചന.

kuwait international airport prepares to reopen as the prime minister reviews readiness and safety arrangements. authorities assess facilities, operations, and security to ensure smooth travel resumption while prioritizing passenger safety and efficient airport management