ടെഹ്‌റാൻ/വാഷിംഗ്ടൺ: പശ്ചിമേഷ്യയിൽ യുദ്ധഭീതി നിലനിൽക്കെ, ഇറാന് മേലുള്ള നാവിക ഉപരോധം പിൻവലിക്കാൻ അമേരിക്ക ഒരുങ്ങുന്നതായി സൂചന. പാകിസ്താൻ സൈനിക മേധാവി ജനറൽ അസിം മുനീർ യുഎസ് പ്രസിഡന്റ് ഡൊണാൾഡ് ട്രംപുമായി നടത്തിയ ചർച്ചയിലാണ് വിഷയത്തിൽ ധാരണയായതെന്ന് സിഎൻഎൻ-ന്യൂസ് 18 റിപ്പോർട്ട് ചെയ്യുന്നു.

ട്രംപിനെ നിലപാട് അറിയിച്ച് പാക് സൈനിക മേധാവി

ഹോർമുസ് കടലിടുക്കിലെ യുഎസ് നാവിക ഉപരോധം ഇറാനുമായുള്ള ചർച്ചകൾക്ക് തടസ്സമാകുന്നുവെന്ന് അസിം മുനീർ ട്രംപിനെ അറിയിച്ചു. ഈ ഉപരോധം നീക്കിയാൽ മാത്രമേ വെടിനിർത്തലിലേക്കും സമാധാന ചർച്ചകളിലേക്കും നീങ്ങാൻ സാധിക്കൂ എന്ന് അദ്ദേഹം ചൂണ്ടിക്കാട്ടി. അസിം മുനീറിന്റെ നിർദ്ദേശം ട്രംപ് മുഖവിലയ്ക്കെടുത്തിട്ടുണ്ടെന്നും ഉപരോധം പിൻവലിക്കുന്നത് പരിഗണിക്കാമെന്ന് അദ്ദേഹം ഉറപ്പുനൽകിയതായും പാക് വൃത്തങ്ങൾ സൂചിപ്പിക്കുന്നു.

ഉപരോധം നീക്കിയാൽ ഇറാന്റെ ഉന്നത സംഘം ചർച്ചകൾക്കായി ഇസ്ലാമാബാദിലെത്തും.വിഷയം ഗൗരവകരമാണെന്നും ആവശ്യമായ നടപടികൾ ആലോചിക്കുമെന്നും ട്രംപ് മറുപടി നൽകി.

ഇറാനിയൻ കപ്പലിന് നേരെ വെടിവെപ്പ്; സംഘർഷം പുകയുന്നു

സമാധാന ചർച്ചകൾക്കിടെയും സമുദ്രമേഖലയിൽ യുഎസ്-ഇറാൻ സംഘർഷം രൂക്ഷമാണ്. ഉപരോധം ലംഘിക്കാൻ ശ്രമിച്ച ഇറാനിയൻ ചരക്ക് കപ്പലായ 'എം/വി ടൗസ്' (M/V Tous) യുഎസ് നാവികസേന വെടിവെച്ച് കീഴടക്കി.അറബിക്കടലിന്റെ വടക്കൻ ഭാഗത്ത് ബന്ദർ അബ്ബാസ് തുറമുഖത്തേക്ക് പോവുകയായിരുന്നു കപ്പൽ.

യുഎസ്എസ് വൻസ് (USS Vance) എന്ന യുദ്ധക്കപ്പലാണ് ഇറാനിയൻ കപ്പലിനെ തടഞ്ഞത്. നിരവധി മുന്നറിയിപ്പുകൾ നൽകിയിട്ടും വഴങ്ങാത്തതിനെ തുടർന്നാണ് വെടിയുതിർത്തതെന്ന് യുഎസ് സെൻട്രൽ കമാൻഡ് അറിയിച്ചു.

തിരിച്ചടിക്കുമെന്ന് ഇറാൻ

വാണിജ്യ കപ്പലിന് നേരെ വെടിയുതിർത്തത് വെടിനിർത്തൽ കരാറിന്റെ ലംഘനമാണെന്ന് ഇറാൻ ആരോപിച്ചു. ചൈനയിൽ നിന്ന് വരികയായിരുന്ന കപ്പലാണ് യുഎസ് പിടിച്ചെടുത്തതെന്നും ഇതിന് ശക്തമായ തിരിച്ചടി നൽകുമെന്നും ഇറാന്റെ സൈനിക കമാൻഡായ ഖത്തം അൽ-അൻബിയ മുന്നറിയിപ്പ് നൽകി.

ഉപരോധം നീക്കാൻ ട്രംപ് തയ്യാറാകുമോ അതോ കടലിലെ ഏറ്റുമുട്ടൽ പുതിയൊരു യുദ്ധത്തിലേക്ക് നയിക്കുമോ എന്ന ആശങ്കയിലാണ് ലോക രാജ്യങ്ങൾ.