ലൂസിയാന: അമേരിക്കയിലെ ലൂസിയാനയിലുള്ള ഷ്രീവ്‌പോർട്ട് നഗരത്തിൽ പിതാവ് നടത്തിയ വെടിവയ്പിൽ എട്ട് പിഞ്ചുകുഞ്ഞുങ്ങൾ കൊല്ലപ്പെട്ടു. ഞായറാഴ്ച പുലർച്ചെയോടെയാണ് നഗരത്തെ നടുക്കിയ കൂട്ടക്കുരുതി അരങ്ങേറിയത്. ഷമർ എൽക്കിൻസ് (31) എന്നയാളാണ് തന്റെ ഒരു വയസ്സു മുതൽ 12 വയസ്സു വരെ പ്രായമുള്ള സ്വന്തം മക്കളെയും മറ്റൊരു കുട്ടിയെയും ക്രൂരമായി കൊലപ്പെടുത്തിയത്.

ക്രൂരത നാല് ഇടങ്ങളിൽ; ഭാര്യയ്ക്ക് ഗുരുതര പരിക്ക്

കുടുംബവഴക്കിനെത്തുടർന്നാണ് ഷമർ എൽക്കിൻസ് അക്രമം നടത്തിയതെന്നാണ് പ്രാഥമിക നിഗമനം. ഷ്രീവ്‌പോർട്ടിലെ സീഡർ ഗ്രോവ് പരിസരത്തുള്ള നാല് വ്യത്യസ്ത സ്ഥലങ്ങളിലായാണ് ഇയാൾ വെടിയുതിർത്തത്.കൊല്ലപ്പെട്ടവരിൽ 7 പേർ ഷമറിന്റെ സ്വന്തം മക്കളാണ്.

അക്രമിയുടെ ഭാര്യയ്ക്കും അയൽവാസിയായ മറ്റൊരു സ്ത്രീയ്ക്കും വെടിവയ്പിൽ ഗുരുതരമായി പരിക്കേറ്റു. ഇവരെ ആശുപത്രിയിൽ പ്രവേശിപ്പിച്ചിരിക്കുകയാണ്.

പൊലിസ് ഏറ്റുമുട്ടലിൽ അക്രമി കൊല്ലപ്പെട്ടു

കുട്ടികളെ വെടിവച്ചു വീഴ്ത്തിയ ശേഷം ഒരു കാർ തട്ടിയെടുത്ത് രക്ഷപ്പെടാനായിരുന്നു ഷമറിന്റെ ശ്രമം. എന്നാൽ വിവരമറിഞ്ഞ് സ്ഥലത്തെത്തിയ പൊലിസ് പ്രതിയെ പിന്തുടരുകയും തുടർന്നുണ്ടായ വെടിവയ്പിൽ ഇയാൾ കൊല്ലപ്പെടുകയും ചെയ്തു. പ്രതിയെ ജീവനോടെ പിടികൂടാൻ ശ്രമിച്ചെങ്കിലും പൊലിസിന് നേരെ വെടിയുതിർത്തതോടെ തിരിച്ചടിക്കുകയായിരുന്നുവെന്ന് അധികൃതർ വ്യക്തമാക്കി.

"നഗര ചരിത്രത്തിലെ കറുത്ത ദിനം"

ഷ്രീവ്‌പോർട്ട് നഗരത്തിന്റെ ചരിത്രത്തിലെ ഏറ്റവും ദാരുണമായ ദുരന്തമാണിതെന്ന് മേയർ ടോം ആർസെനോക്സ് പ്രതികരിച്ചു. ഗൺ വയലൻസ് ആർക്കൈവ് (Gun Violence Archive) നൽകുന്ന കണക്കുകൾ പ്രകാരം 2026-ൽ അമേരിക്കയിൽ നടക്കുന്ന ഏഴാമത്തെ വലിയ കൂട്ടക്കൊലയാണിത്. ലൂസിയാന പൊലിസും ഫെഡറൽ ഏജൻസികളും സംഭവത്തിൽ വിശദമായ അന്വേഷണം ആരംഭിച്ചിട്ടുണ്ട്.