വാഷിങ്ടണ്‍: ഇസ്‌റാഈലും, ലബനാനും തമ്മിലുള്ള രണ്ടാം ഘട്ട ചര്‍ച്ചകള്‍ ഈ വരുന്ന വ്യാഴാഴ്ച്ച വാഷിങ്ടണില്‍ നടക്കും. വ്യാഴാഴ്ച്ച മുതല്‍ പ്രാബല്യത്തില്‍ വന്ന 10 ദിവസത്തെ വെടിനിര്‍ത്തലിന് ശേഷം ഇരു രാജ്യങ്ങളും തമ്മില്‍ നടത്തുന്ന ആദ്യ ചര്‍ച്ചയാണിത്. വിവിധ ഇസ്‌റാഈലി മാധ്യമങ്ങളെ ഉദ്ധരിച്ച് അല്‍ജസീറയാണ് വാര്‍ത്ത റിപ്പോര്‍ട്ട് ചെയ്തത്. 

ഏപ്രില്‍ 16നാണ് ഇസ്‌റാഈലും, ലെബനനും തമ്മില്‍ താല്‍ക്കാലിക വെടിനിര്‍ത്തല്‍ കരാര്‍ നിലവില്‍ വന്നത്. യുഎസ് പ്രസിഡന്റ് ഡൊണാള്‍ഡ് ട്രംപാണ് വെടിനിര്‍ത്തല്‍ പ്രഖ്യാപനം നടത്തിയത്. അമേരിക്കയുടെ മധ്യസ്ഥതയില്‍ ഇസ്‌റാഈല്‍ പ്രധാനമന്ത്രി ബെഞ്ചമിന്‍ നെതന്യാഹുവും, ലെബനന്‍ പ്രസിഡന്റ് ജോസഫ് ഔനുമാണ് കരാറിലെത്തിയത്. 

ALSO READ: കരാര്‍ ഇന്നുതന്നെ ഒപ്പിടുമെന്ന് ട്രംപ്; ഉപരോധം പിന്‍വലിക്കാതെ ചര്‍ച്ചക്കില്ലെന്ന് ഇറാന്‍; പശ്ചിമേഷ്യയില്‍ അനിശ്ചിതത്വം 

ഇതിനുപുറമെ നിലവിലെ സംഘര്‍ഷങ്ങള്‍ ലഘൂകരിക്കാനും, വെടിനിര്‍ത്തല്‍ ധാരണകള്‍ മുന്നോട്ട് കൊണ്ടുപോകാനുമാണ് ഇരുരാജ്യങ്ങളെയും ചര്‍ച്ചക്ക് ക്ഷണിച്ചത്. വെടിനിര്‍ത്തല്‍ നിലവിലുണ്ടെങ്കിലും തെക്കന്‍ ലെബനനിലെ 39 ഗ്രാമങ്ങളില്‍ ഇസ്‌റാഈല്‍ വലിയ തോതിലുള്ള നാശനഷ്ടങ്ങള്‍ വരുത്തിയതായി ഹിസ്ബുല്ലയുമായി ബന്ധപ്പെട്ട വൃത്തങ്ങള്‍ വ്യക്തമാക്കുന്നു. 

യുദ്ധഭീതി ഒഴിഞ്ഞതോടെ ലെബനനില്‍ സ്ഥിതിഗതികള്‍ ശാന്തമായതായി മാധ്യമങ്ങള്‍ റിപ്പോര്‍ട്ട് ചെയ്തു. പാലായനം ചെയ്ത ജനങ്ങള്‍ സ്വന്തം സ്ഥലങ്ങളിലേക്ക് മടങ്ങി തുടങ്ങിയിട്ടുണ്ട്. രൂക്ഷമായ ഏറ്റുമുട്ടലില്‍ ഏകദേശം 21000 ലധികം ആളുകള്‍ കൊല്ലപ്പെടുകയും, പത്തുലക്ഷത്തിലധികം പേര്‍ പാലായനം ചെയ്‌തെന്നുമാണ് കണക്ക്. വെടിനിര്‍ത്തല്‍ പ്രാബല്യത്തില്‍ വന്നെങ്കിലും ദക്ഷിണ ലെബനനില്‍ നിന്ന് സൈന്യത്തെ പിന്‍വലിക്കില്ലെന്നാണ് ഇസ്‌റാഈല്‍ നിലപാട്.