തൃശ്ശൂർ: തൃശ്ശൂർ മുണ്ടത്തിക്കോട്ടെ പടക്ക നിർമ്മാണ ശാലയിലുണ്ടായ സ്ഫോടനത്തിൽ നിന്ന് തലനാരിഴയ്ക്ക് രക്ഷപ്പെട്ടതിന്റെ നടുക്കം മാറാതെ തൊഴിലാളി. കളത്തിൽ തിരി ഉണക്കാനിടുന്നതിനിടെ സെക്കൻഡുകൾക്കുള്ളിലാണ് ദുരന്തം സംഭവിച്ചതെന്ന് അദ്ദേഹം വെളിപ്പെടുത്തി. തൃശ്ശൂർ പൂരത്തിനുള്ള തിരുവമ്പാടി വിഭാഗത്തിന്റെ പടക്കങ്ങൾ നിർമ്മിക്കുന്ന പുരയിലാണ് ഇന്ന് ഉച്ചയോടെ വൻ സ്ഫോടനം നടന്നത്.

സെക്കൻഡുകൾ മാറ്റിവെച്ച ആയുസ്സ്

"കളത്തിൽ തിരി ഉണക്കാൻ ഇടുന്നതിനിടെയാണ് പെട്ടെന്ന് തീ പടരുന്നത് കണ്ടത്. സെക്കൻഡുകൾ മാത്രമാണ് എനിക്ക് ലഭിച്ചത്. ഞാൻ നിൽക്കുന്നിടത്തേക്ക് തീ ആളിപ്പടരുകയായിരുന്നു. ഉടൻ തന്നെ അവിടെനിന്ന് ഇറങ്ങിയോടി. പിന്നാലെ വലിയ ശബ്ദത്തോടെ പൊട്ടിത്തെറികൾ തുടങ്ങി. തിരിഞ്ഞുനോക്കിയപ്പോൾ കണ്ടത് വലിയൊരു തീഗോളമാണ്. വേലിക്കമ്പി ചാടിക്കടന്നാണ് അടുത്തുള്ള പാടത്തേക്ക് എത്തിയത്. എന്തോ ഭാഗ്യത്തിനാണ് ഞാൻ ഇപ്പോഴും ജീവനോടെ ഇരിക്കുന്നതെന്ന്" അദ്ദേഹം മാധ്യമങ്ങളോട് പറഞ്ഞു.

ചൂട് കാരണമാകാം തിരിക്ക് തീപിടിച്ചതെന്നാണ് പ്രാഥമിക നിഗമനം. ഓടാൻ ആർക്കെങ്കിലും സമയം ലഭിച്ചിട്ടുണ്ടെങ്കിൽ അത് വെറും രണ്ട് മൂന്ന് സെക്കൻഡുകൾ മാത്രമായിരിക്കുമെന്നും അദ്ദേഹം കൂട്ടിച്ചേർത്തു.

13 മരണം; രക്ഷാപ്രവർത്തനം ദുഷ്‌കരം

സ്ഫോടനത്തിൽ ഇതുവരെ 13 പേർക്ക് ജീവൻ നഷ്ടപ്പെട്ടതായാണ് ഏറ്റവും പുതിയ വിവരം. അഞ്ചോളം പേരുടെ നില അതീവ ഗുരുതരമായി തുടരുന്നു. അഞ്ച് താൽക്കാലിക പുരകളിലായാണ് പടക്ക നിർമ്മാണം നടന്നിരുന്നത്. ഒന്നിനു പുറകെ ഒന്നായി അഞ്ച് പുരകളും പൊട്ടിത്തെറിച്ചതോടെ പ്രദേശം യുദ്ധക്കളത്തിന് സമാനമായി.

പ്രദേശത്ത് ഇപ്പോഴും പുകയും പൊട്ടിത്തെറികളും തുടരുന്നത് രക്ഷാപ്രവർത്തനത്തെ സങ്കീർണ്ണമാക്കുന്നുണ്ട്. പടക്ക നിർമ്മാണ ശാലയിൽ എത്രപേർ ഉണ്ടായിരുന്നു എന്നതിൽ ഇപ്പോഴും വ്യക്തതയില്ല. സ്ഫോടനത്തിന്റെ ആഘാതത്തിൽ പലരും ചിതറിത്തെറിച്ചു പോയതായാണ് സംശയിക്കുന്നത്. പരിസരത്തെ പാടത്തുനിന്നും ശരീരഭാഗങ്ങൾ കണ്ടെടുത്തു.

പൂരപ്രേമികളെ നടുക്കിയ ദുരന്തം

ഏപ്രിൽ 24-ന് നടക്കാനിരിക്കുന്ന സാമ്പിൾ വെടിക്കെട്ടിനുള്ള ഒരുക്കങ്ങൾക്കിടെയാണ് ഈ ദുരന്തം. സ്ഫോടന വസ്തുക്കൾ നിർവീര്യമാക്കാനുള്ള ശ്രമങ്ങൾ അഗ്നിരക്ഷാസേനയും പൊലിസും തുടർന്നു വരികയാണ്. മുഖ്യമന്ത്രിയും ആരോഗ്യ മന്ത്രിയും സംഭവത്തിൽ അനുശോചനം രേഖപ്പെടുത്തുകയും പരിക്കേറ്റവർക്ക് വിദഗ്ധ ചികിത്സ ഉറപ്പാക്കാൻ നിർദ്ദേശം നൽകുകയും ചെയ്തിട്ടുണ്ട്.